තෝලංගමුව ඩඩ්ලි සේනානායක මධ්‍ය විද්‍යාලයේ 80 වැනි අභිමානවත් ජන්ම සංවත්සරය නිමිත්තෙන් අද (03) සහ හෙට (04) පින්කම් රැසක් සිදුකෙරේ. ඒ අනුව අද (03) සර්වරාත්‍රික පරිත්‍රාණ ධර්ම දේශනාවක් සහ හෙට (04) මහා සංඝරත්නය 80 නමක් විෂයයෙහි සපිරිකර සහිත දානමය පින්කමක් පැවැත්වෙන බව විදුහල්පති ජේ. ඒ. අයි. යූ. ජයකොඩි මහතා ප්‍රකාශ කළේය. නිදහස් අධ්‍යාපනයේ පියා ලෙස විරුදාවලි ලැබූ හිටපු අධ්‍යාපන ඇමැතිවරයකු වූ ආචාර්ය සී. ඩබ්. ඩබ්. කන්නන්ගර ශ්‍රීමතාණන් විසින් ආරම්භ කරනු ලැබූ මධ්‍ය විද්‍යාල සංකල්පය යටතේ ප්‍රමුඛ පාසලක් ලෙස මේ විදුහල බිහිවූ බවද විදුහල්පතිවරයා වැඩිදුරටත් කීවේය. කෑගල්ල දිස්ත්‍රික්කයේ පමණක් නොව සබරගමුව පළාතේ අධ්‍යාපන, ආගමික, සාමාජික කේන්ද්‍රස්ථානයක් ලෙස දිදුලන නමක් දිනා සිටින මේ විදුහලින් කීර්තිමත් දේශපාලනඥයන්, ආචාර්ය මහාචාර්යවරුන්, වෛද්‍ය, ඉංජිනේරු, අධිකරණ, බැංකු, ජනමාධ්‍ය, ආරක්ෂක, සංස්කෘතික, කලා වැනි ක්ෂේත්‍ර රැසක බුද්ධිමතුන් සහ නිර්මාණශීලී ආදී විද්‍යාර්ථීන් රාශියක් බිහිකර ඇත.
ජයසිරි මුණසිංහ
