ශ්‍රී ලංකාව සමඟ බෞද්ධාගමික වශයෙන් සුවිශාල සම්බන්ධතා පවතින මියන්මාරයට සහ තායිලන්තයට සිදුව තිබෙන ව්‍යසනය සම්බන්ධයෙන් මල්වතු මහානායක නාහිමියන් ප්‍රමුඛ මහා සංඝරත්නයේ ශෝකය පළ කරන බවත්, මේ ඛේදනීය අවස්ථාවේ ශ්‍රී ලාංකිකයන් ලෙස ජාති සහ ආගම් භේදයෙන් තොරව එම රටවලට සහාය දිය යුතු බවත් මල්වතු පාර්ශ්වයේ අනුනායක දිඹුල්කුඹුරේ විමලධම්ම නාහිමියෝ පවසති. මේ පිළිබඳව වැඩිදුරටත් අදහස් දක්වමින් උන් වහන්සේ මෙලෙස ද කීහ.
“අනපේක්ෂිත අවස්ථාවක ඇති වූ භූමිකම්පාවකින් මියන්මාරයට සහ තායිලන්තයට විශාල හානි සිදුව තිබෙනවා. මේ අවස්ථාවේ එම රටවලට අවශ්‍ය සහාය දීමට කටයුතු කරන ලෙස ජනපති ප්‍රමුඛ රජයෙන් ද ඉල්ලා සිටිනවා. මියන්මාරයේ භික්ෂූන් වහන්සේලා ඇතුළු දහස් ගණනකට ජීවිත අහිමි වී තිබෙනවා. පවතින තත්ත්වයෙන් ගොඩඒමට නම් ඔවුන්ට සෙසු රටවල සහාය අත්‍යවශ්‍යයි. මේ වනවිටත් රටවල් ගණනාවක් ඒ සඳහා ඉදිරිපත්ව සිටිනවා.
මෙරට උපසම්පදාව ලද භික්ෂූන් වහන්සේ නොමැතිව සිටි අවස්ථාවක එකල සියම ලෙසින් හැඳින්වූ වත්මන් තායිලන්තයෙන් සහ මියන්මාරයෙන් උපසම්පදාලාභී භික්ෂූන් වහන්සේලා වැඩම කර යළි ලක්දිව උපසම්පදාව ස්ථාපිත කළා. ථෙරවාදී බෞද්ධ දර්ශනය පවත්නා රටවල් අතර ශ්‍රී ලංකාව, තායිලන්තය සහ මියන්මාරය ප්‍රමුඛයි.
සුනාමි ව්‍යසනය හේතුවෙන් අප රට ද මෙවැනිම විපතකට මුහුණදුන්නා. එම අවස්ථාවේ ජාත්‍යන්තරය අපට විශාල සහයෝගයක් දැක්වූවා. විපතට පත්ව රටක් සහාය ඉල්ලා සිටින අවස්ථාවක එම සහාය දීම පාලකයන්ගේ මෙන්ම රටවැසියන්ගේ යුතුකමක් සහ වගකීමක්. ශෝකය පළ කිරීමට පමණක් සීමා නොවී විපතට පත් ජනතාව වෙනුවෙන් යම් ආධාර උපකාර කිරීම මේ අවස්ථාවේ ප්‍රමුඛ වගකීමක්. ඒ සඳහා පෙරමුණ ගැනීමට භික්ෂූන් වහන්සේලා සූදානම්.”
අසේල කුරුළුවංශ
