නීති විරෝධී ලෙස මෙරටට රැගෙන ඒම‍‍ට උත්සාහ කළ බීඩි කොළ කිලෝග්‍රෑම් හයසීය හැත්ත පහක තොගයක් සමඟ ඩිංගි යාත්‍රාවක් සහ සැකකරුවන් දෙදෙනකු ශ්‍රී ලංකා නාවික හමුදාව, කල්පිටිය පරාමුනේ මුහුදු ප්‍රදේශයේ පෙරේදා (01) සිදු කළ විශේෂ සෝදිසි මෙහෙයුමක් මඟින් නාවික හමුදා භාරයට ගැනීමට කටයුතු කර තිබේ.
වයඹ නාවික විධානයේ ශ්‍රී ලංකා නාවික විජය ආයතනයට අනුයුක්ත නාවික හමුදා විශේෂ යාත්‍රා බලඝණ කණ්ඩායමක් මඟින් කල්පිටිය පරාමුනේ මුහුදු ප්‍රදේශය ආවරණය වන පරිදි සිදු කළ මෙම විශේෂ සෝදිසි මෙහෙයුමේදී එම මුහුදු ප්‍රදේශයේ තිබූ සැකකටයුතු ඩිංගි යාත්‍රාවක් නිරීක්‍ෂණ‍ය කර පරීක්‍ෂාවට ලක් කර ඇත.
එම ඩිංගි යාත්‍රාව තුළ තිබූ නීති විරෝධී ලෙස මෙරටට රැගෙන ඒම‍‍ට උත්සාහ කළ උර විස්සක අසුරන ලද බීඩි කොළ කිලෝග්‍රෑම් හයසීය හැත්ත පහක පමණ තොගයක් සමඟ සැකකරුවන් දෙදෙනෙක් සහ එම ඩිංගි යාත්‍රාව (01) මෙලෙස නාවික හමුදා භාරයට ගැනීමට කටයුතු කර තිබේ.
මෙම මෙහෙයුම මඟින් නාවික හමුදා භාරයට ගත් සැකකරුවන් වයස අවුරුදු 27ත් 29ත් අතර වන කල්පිටිය ජනසවිපුර සහ සිංහපුර යන ප්‍රදේශයන්හි පදිංචිකරුවන් බවට හඳුනාගෙන ඇත.
එම සැකකරුවන්, බීඩි කොළ තොග‍ය සහ ඩිංගි යාත්‍රාව ඉදිරි නීතිමය කටයුතු සඳහා වයඹ පළාත් සුරාබදු විශේෂ ඒකකය වෙත භාරදීමට කටයුතු කළ බව නාවික හමුදාව පවසයි.
රක්ෂණ ශ්‍රියන්ත
