අස්ගිරි මහනායක අතිපූජ්ය වරකාගොඩ ශ්රී ඤාණරතන ස්වාමින්ද්රයන් වහන්සේ මියන්මාර් තානාපතිනිය වෙත රුපියල් මිලියන 15ක මූල්ය පරිත්යාගය සිදුකළ අයුරු. දියඩවන නිලමේ ප්රදීප් නිලංග දෑල මහතා ද මෙහි සිටියි.
භූමිකම්පාවෙන් විපතට පත් මියන්මාර් ජනතාව වෙනුවෙන් මල්වතු අස්ගිරි උභය මහා විහාර හා ශ්රී දළදා මාලිගාව මඟින් රුපියල් මිලියන 15ක මුදලක් ඊයේ (02) පරිත්යාග කරනු ලැබීය. අදාළ මුදල් පරිත්යාගය ශ්රී දළදා මාලිගාවේ දී සිදු කෙරුණු අතර එම අවස්ථාවට මියන්මාර් තානාපති Marlar Than Htaik මහත්මිය ද සහභාගි වූවාය.
ශ්රී දළදා මාලිගාවේ උඩු මහලේ පිරිත් මණ්ඩපය ආශ්රිත පරිශ්රයට අස්ගිරි මහානායක අතිපූජ්ය වරකාගොඩ ශ්රී ඤාණරතන නාහිමි ප්රමුඛ මල්වතු අස්ගිරි උභය මහා විහාරීය අනුනායක ස්වාමින්ද්රයන් වහන්සේලා සිව් නම ඇතුළු සියක් නමක් මහා සංඝරතනය වැඩම කර විපතට පත් මියන්මාර් ජනතාවට සෙත්පතා පැයක පමණ කාලයක් සෙත් පිරිත් සජ්ඣායනය කළහ. අනතුරුව මල්වතු අස්ගිරි උභය මහා විහාර නියෝජනය කරමින් දිඹුල්කුඹුරේ විමලධම්ම හා වේඬරුවේ උපාලි අනුනායක ස්වාමින්ද්රයන් වහන්සේලා, මේ අවස්ථාවේ අප රටක් ලෙස මියන්මාර් ජනතාවගේ සහායට සිටිය යුතු බව ද අවධාරණය කළහ.
මෙරට උපසම්පදාව ලත් භික්ෂූන් වහන්සේලා නොමැති අවස්ථාවක තායිලන්තයෙන් හා මියන්මාරයෙන් උපසම්පදාව ලත් භික්ෂූන් වහන්සේ වැඩමකර ලක්දිව යළි උපසම්පදාව පිහිටවූ බව උන්වහන්සේලා සිහිපත් කළහ. මියන්මාර් ජනතාව විපතට පත්ව සිටින මෙම අවස්ථාවේ ශ්රී ලංකාවේ මහා සංඝරත්නය ප්රමුඛ ජනතාව ශක්තියක් ලබාදීම අගය කරන බව තානාපතිනිය ප්රකාශ කළාය. භූමිකම්පාවෙන් 2500ක පමණ පිරිසකට ජීවිත අහිමි වෙත් දී 4500ක පමණ පිරිසක් තුවාල ලබා සිටින බවත් ඊටත් වඩා වැඩි පිරිසක් අතුරුදන්ව ඇති බවත් මෙහිදී ඇය කීවාය. මැන්ඩලේ නුවර පුරාතන විහාරස්ථාන මෙන්ම වෙනත් ආගමික ස්ථාන ද පාසල් ඇතුළු බොහෝ ගොඩනැඟිලි ද භූමි කම්පාවෙන් විනාශ වී තිබෙන බවත් මෙම ඛේදනීය සිදුවීම මඟින් මියන්මාරයට බොහෝ දේ අහිමිකර තිබුණද මේ ආකාරයෙන් ශ්රී ලංකාව පිහිටට සිටීම සම්බන්ධව ස්තූතිය පළ කරන බවත් තානාපතිනිය ප්රකාශ කළාය. මෙම අවස්ථාවට ශ්රී දළදා මාලිගාවේ දියවඩන නිලමේ ප්රදීප් නිලංග දෑල මහතා ද සහභාගි විය.
අසේල කුරුළුවංශ
ඡායාරූපය – අසේල කුරුළුවංශ