රාජ්‍ය අංශයේ කාර්යක්ෂමතාව වැඩිදියුණු කිරීම සඳහා වූ රුහුණු විශ්වවිද්‍යාලයීය ආදි විද්‍යාර්ථීන්ගේ කොළඹ සංගමය සකස් කළ වාර්තාවක් අග්‍රාමාත්‍ය ආචාර්ය හරිනි අමරසූරිය මෙණෙවියට පසුගියදා භාර දෙන ලදී.
රාජ්‍ය හා පෞද්ගලික අංශවල පළපුරුදු වෘත්තීයවේදින්ගෙන් සමන්විත සාමාජිකයින් කණ්ඩායමක් සැකසූ මෙම යෝජනාවලිය මඟින් මහජන සේවා වඩා කාර්යක්ෂම හා ජනහිතකාමී කිරීම, කාර්යක්ෂම ජනතා සේවයක් සඳහා අත්හදා බැලිය හැකි කඩිනම් ජාතික වැඩසටහනක් උදෙසා සංකල්ප පත්‍රිකාව, කාර්යක්ෂම පොදු ප්‍රවාහන සේවයක් පිළිබඳ යෝජනා, අධ්‍යාපන ප්‍රතිසංස්කරණ යෝජනා හා යහපත් සමාජ ආකල්ප සංවර්ධනය කිරීම සඳහා භාවිත කළ හැකි ක්‍රියාකාරකම්වලින් සමන්විතය.
රජයේ ක්ලීන් ශ්‍රී ලංකා වැඩසටහන, මහජනතාවගේ අදහස් සහ 2025 අය-වැය යෝජනා සැලකිල්ලට ගනිමින් සකස් කර ඇති මෙම යෝජනාවලිය වඩා හොඳ සමාජයක් ගොඩනැඟීම සඳහා රජයේ උත්සාහයන්ට සහාය වීමක් බවත් එය නිදහස් අධ්‍යාපනයෙන් ප්‍රතිලාභ ලැබූවන් ලෙස ජාතික වගකීමක් බවත් හිටපු මිනුම්පති පාලිත උදයකාන්ත මහතා පෙන්වා දෙයි.
මෙයට සමගාමීව ‘නවනෙත්’ නමින් විවෘත චිත්‍ර, පෝස්ටර් සහ කෙටි වීඩියෝ පට තරගයක්ද සංවිධානය කෙරේ. ‘අලුතින් සිතමු වෙනස් ලෙස දකිමු’ යන තේමාවෙන් මෙම තරගාවලිය පවත්වයි.
සමාජ ආකල්ප වෙනස් කිරීම අරමුණු කර ගනිමින් සමාජයේ සියලුම ස්තරයන්ට සහභාගි විය හැකි ලෙස සැලසුම් කර තිබෙන මෙම තරගය සඳහා ශ්‍රව්‍ය, දෘශ්‍ය හා කථන ආබාධිත ප්‍රජාව්ජ සහභාගී කර ගැනේ.
රන්මලී සෝමසිරි
