ඉන්දීය අගමැති නරේන්ද්‍ර මෝදි මහතාගේ සංචාරය අතරතුර ශ්‍රී ලංකාව සහ ඉන්දියාව අතර ද්විපාර්ශ්වික ගිවිසුම් කිහිපයකට අත්සන් තබන බව කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවසීය.
රජයේ ප්‍රවෘත්ති දෙපාර්තමේන්තුවේ ඊයේ (02) කැබිනට් තීරණ දැනුම්දීමේ මාධ්‍ය හමුවේදී ඇමැතිවරයා මේ බව සඳහන් කළේය.
එම ගිවිසුම් අතර බලශක්ති, සෞඛ්‍ය, ඩිජිටල් ආර්ථික සහ ආරක්ෂාව ඇතුළු ද්විපාර්ශ්වික ගිවිසුම් කිහිපයකට එළඹෙන බව ඒ මහතා කියා සිටියේය. ඇමැතිවරයා වැඩිදුරටත් මෙසේ ද පැවසීය. අප්‍රේල් 04 වැනිදා ඉන්දීය අගමැතිවරයා ලංකාවට පැමිණෙනවා. අප්‍රේල් 05 නිදහස් චතුරස්‍රයේදී අගමැතිවරයා පිළිගැනීම සිදු වෙනවා. ඉන් අනතුරුව ජනාධිපතිවරයා සමඟ ද්විපාර්ශ්වික සාකච්ඡා පැවැත්වෙනවා. එම සාකච්ඡාවලින් පසු ඉන්දීය අගමැතිවරයාත් ජනාධිපතිවරයාත් අතර ද්විපාර්ශ්වික සාකච්ඡා සම්බන්ධයෙන් මාධ්‍යවලට අදහස් දක්වනවා.
ඉන්පසුව සාම්පූර් සූර්ය බලාගාර ව්‍යාපෘතිය ආරම්භ කිරීම සහ අප රටේ ආගමික ස්ථාන කිහිපයකට සූර්යබල පද්ධති දීම සහ දඹුල්ල ශීතාගාරය විවෘත කිරීම කොළඹ සිට සිදු කරනවා. අප්‍රේල් 06 වැනිදා ඉන්දීය අගමැතිවරයා අනුරාධපුර ශ්‍රී මහා බෝධිය වන්දනා කිරීමට යනවා. අනුරාධපුර දුම්රිය සංඥා පද්ධතිය ආරම්භ කිරීමත් දැනට ඉදිකරලා තිබෙන මාර්ගය විවෘත කිරීමත් සිදු වෙනවා.
නුවන් කොඩිකාර
