බණ්ඩාරනායක ජාත්‍යන්තර ගුවන්තොටුපොළ සංවර්ධන ව්‍යාපෘතියට අදාළව දිගින් දිගටම සැලසුම් ප්‍රතිනිර්මාණය කිරීම හේතුවෙන් 2014 වසරේ සිට 2024 වසර දක්වා සැලසුම් සහ උපදේශන ගාස්තුව ලෙස රුපියල් කෝටි 388කට (මිලියන 3884.8) අධික මුදලක් ගෙවා ඇති බවට පොදු ව්‍යාපාර පිළිබඳ කාරක සභාවේදී ඊයේ (02) අනාවරණය වී ඇත.
මෙවැනි මුදලක් මෙලෙස උපදේශන සේවා සමාගමට ගෙවා තිබීම මහජන මුදල් අවභාවිත කිරීමක් බව ද පොදු ව්‍යාපාර පිළිබඳ කාරක සභාව අවධාරණය කර ඇත.
ගුවන්තොටුපොළ හා ගුවන් සේවා සමාගමට අදාළව 2022, 2023 වසරවලට අදාළව විගණකාධිපති වාර්තා හා කාර්යසාධනය පිළිබඳ පරීක්ෂා කිරීම සඳහා පොදු ව්‍යාපාර පිළිබඳ කාරක සභාව හෙවත් කෝප් කමිටුව වෙත ඊයේ (02) කැඳවූ අතර එහිදී මේ බව අනාවරණය වී ඇත.
පොදු ව්‍යාපාර පිළිබඳ කාරක සභාව එහි සභාපති, පාර්ලිමේන්තු මන්ත්‍රී වෛද්‍ය නිශාන්ත සමරවීර මහතාගේ ප්‍රධානත්වයෙන් ඊයේ (02) පාර්ලිමේන්තු සංකීර්ණයේදී රැස්විය.
ගුවන්තොටුපොළ සංවර්ධන ව්‍යාපෘතියට අදාළව මගී ධාරිතාව මිලියන 06 සිට මිලියන 12 දක්වා වැඩි කර ගැනීම වෙනුවෙන් සැලසුම් සහ උපදේශන සේවා ලබා ගැනීම වෙනුවෙන් 2007 වසරේදී ජපන් හවුල් සමාගමක් තෝරාගෙන ඇති අතර එම සමාගම මඟින් 2009 වසරේ සිට 2012 වසර දක්වා රුපියල් මිලියන 344.5ක මුදලක් වැය කර ඇති බව ද කාරක සභාවේදී අනාවරණය වී ඇත. එසේ වුවද 2013 වසරේදී එම ව්‍යාපෘතිය නැවත ප්‍රතිනිර්මාණය කිරීම හේතුවෙන් එම ව්‍යාපෘතිය වෙනුවෙන් 2013 වසර දක්වා කාලය තුළ වැය කර ඇති මුදල අසාර්ථක ලෙස යොදවා ඇති බව කාරක සභාවේදී අනාවරණය වී ඇත.
ව්‍යාපෘතියට අදාළව සැලසුම ප්‍රතිනිර්මාණය කිරීම සඳහා ගුවන්තොටුපොළ හා ගුවන් සේවා සමාගම මඟින් පෙර සමාගම සමඟ ගිවිසුම් අත්සන් කළ ද අවස්ථා ගණනාවකදී ගිවිසුම් සංශෝධනය කිරීම හේතුවෙන් මූලික උපදේශන ගාස්තුවට අමතරව විශාල මුදලක් ගෙවීමට සිදුව ඇති බවත් ගිවිසුම් කාල සීමාව මාස 47 සිට මාස 131 දක්වා තවත් අවුරුදු හතකින් දීර්ඝ වී තිබූ බව ද කාරක සභාවේදී අනාවරණය වී තිබේ.
ඒ අනුව 2014 වසරේ සිට 2024 වසර දක්වා සැලසුම් සහ උපදේශන ගාස්තුව ලෙස මිලියන 3884.8ක මුදලක් මෙම උපදේශන සේවා සමාගමට ගෙවා තිබීම මහජන මුදල් අවභාවිත කිරීමක් බව ද කමිටුව අවධාරණය කර ඇත.
මේ සම්බන්ධයෙන් පොදු ව්‍යාපාර පිළිබඳ කාරක සභාවේ සභාපති, පාර්ලිමේන්තු මන්ත්‍රී වෛද්‍ය නිශාන්ත සමරවීර මහතාගෙන්ද විමසීමක් කළ අතර ඒ මහතා සඳහන් කළේ ගුවන්තොටුපොළ හා ගුවන් සේවා සමාගම නැවත වතාවක් කාරක සභාව හමුවට කැඳවන බවයි.
මෙම ව්‍යාපෘතිය මේ වන විට අවසන් කර තිබුණ ද ප්‍රයෝජනයට ගැනීමට හැකි මට්ටමක නොපවතින බවයි. මගී ධාරිතාව වැඩි කිරීම වෙනුවෙන් සිදු කර ඇති ව්‍යාපෘතියෙහි ගැටලු ගණනාවක් ඇති බවත් ඒ මහතා පැවසීය.
ස්වර්ණා විජේකෝන්, සන්ධ්‍යා කරුණාරත්න
