රාජාංගණයේ සද්ධාරතන හිමියන් ශ්‍රී ලංකා රාමඤ්ඤ මහා නිකාය විසින් භික්ෂුභාවයෙන් නෙරපා හැර ඇතැයි ශ්‍රී ලංකා රාමඤ්ඤ මහා නිකාය වෙනුවෙන් අධිකරණයට කරුණු දක්වමින් ජනාධිපති නිතිඥ අනුර මැද්දගොඩ මහතා කොටුව මහේස්ත්‍රාත් නිලුපුලී ලංකාපුර මෙණෙවිය හමුවේ ඊයේ (02) දැනුම් දුන්නේය.
සැකකාර හිමියන්ගේ නම සාමණේර නාමයෙන් ඉවත් කරන ලෙස බුද්ධ ශාසන කොමසාරිස් ජනරාල්වරයාට ලිඛිතව දැනුම් දී ඇතැයි ද හෙතෙම දන්වා සිටියේය.
රාජාංගණයේ සද්ධාරතන නමින් යූ ටියුබ් නාළිකාව හරහා අසභ්‍ය ප්‍රකාශ සිදු කිරීමකට අදාළ නඩුව කොටුව මහේස්ත්‍රාත් අධිකරණය හමුවේ කැඳවූ අවස්ථාවේදී ඒ මහතා මේ බව කියා සිටියේය.
ශ්‍රී ලංකා රාමඤ්ඤ මහා නිකායේ අයිතිවාසිකම් වෙනුවෙන් කරුණු දක්වමින් ජනාධිපති නීතිඥවරයා අධිකරණයට කියා සිටියේ රාජාංගණයේ හාමුදුරුවෝ නමින් යූ ටියුබ් චැනල් පවත්වාගෙන යමින් අසභ්‍ය ප්‍රකාශ සිදු කිරීම හේතුවෙන් පසුගිය චෝදනා පත්‍ර ලබා දී විද්වත් මහා සංඝයාවහන්සේ සිවුනමක් ඉදිරියේ පසුගිය පෙබරවාරි 21 දින විනය කමිටුවට ඉදිරිපත් කළ බවය. ඉන් වැරදිකරු කර උන්වහන්සේ භික්ෂුභාවයෙන් නෙරපා හැර ඇති බව ද ඔහු අධිකරණය හමුවේ සඳහන් කළේය.
“සැකකාර හිමිනම 2006.05.13 වැනිදා පැවිදි වී 2008.07.10 වැනි දින උපසම්පදාව ලබා තිබෙනවා. මෙවැනි අසභ්‍ය වචන භාවිත කරමින් ශ්‍රී ලංකා රාමඤ්ඤ මහා නිකායට සහ සම්බුද්ධ ශාසනයට අගතිදායක ලෙස හැසිරීම හේතුවෙන් ශ්‍රී ලංකා රාමඤ්ඤ මහා නිකායේ උපරිමාධිකරණ විනිශ්චය මණ්ඩලයක් මඟින් 25.01.2025 චෝදනා පත්‍රයක් ගොනු කරනු ලැබුවා. ඊට අදාළව සාක්ෂිත් කැඳවා අදාළ විනිශ්චය පෙබරවාරි මස 21 වැනිදා සිදු කරනු ලැබුවා. ඕමල්පේ සෝභිත හිමියන්, මාතලේ ධම්මකුසල හිමියන්, වලේගොඩ ගුණධීර හිමියන්, රජවත්තේ රේවත හිමියන් ඇතුළු මහාසංඝරත්නයගෙන් සැදුම් ලත් විනිශ්චය මණ්ඩලයක් විසින් මේ තීරණය ගෙන තිබෙනවා. සියලු කරුණුවලට සැකකාර හිමියන් විසින් වරද පිළිගෙන තිබෙනවා. ඒ අනුව භික්ෂු විනය හික්මීමට පරිවාස කාලයක් ලබා දීමට තීරණය කර තිබුණත් එය සැකකාර හිමියන් විසින් ප්‍රතික්ෂේප කර තිබෙනවා. ඒ අනුව නිකායේ පැවැත්ම සම්බුද්ධ ශාසනයේ චිරස්ථිතිතය වෙනුවෙන් මේ තීරණය ගෙන තිබෙනවා. එම තීරණය පසුගිය මාර්තු මහස 20 වැනිදා බුද්ධංගල ආරණ්‍ය සේනාසනයේ පැවති රැස්වීමේදී සැකකාර හිමියන් සාමණේර නාමයෙන් ඉවත් කිරීම අනුමත වී තිබෙනවා” යැයි ජනාධිපති නීතිඥවරයා වැඩිදුරටත් අධිකරණය හමුවේ දන්වා සිටියේය.
එහිදී පැමිණිල්ල ඉදිරිපත් කළ බළන්ගොඩ කස්සප හිමියන් වෙනුවෙන් පෙනී සිටි නීතිඥවරයා අධිකරණයට දන්වා සිටියේ අධිකරණය විසින් ඇප ලබා දීමේදී ලබා දී ඇති කොන්දේසි සැකකාර හිමිනම සහමුලින්ම කඩ කර ඇති බවය.
මෙහිදී අපරාධ පරීක්ෂණ දෙපාර්තමේන්තුව ද දන්වා සිටියේ සැකකාර හිමිනම ඇප කොන්දේසි උල්ලංඝනය කර ඇති බවය. එලෙස ඇප කොන්දේසි උල්ලංඝනය කර ඇති බවට පැමිණිල්ලක් සහ එම වීඩියෝ 8ක සීඩී තැටි අපරාධ පරීක්ෂණ දෙපාර්තමේන්තුවට ලැබුණු බවත් ඒවාට අදාළව විමර්ශන කළ බවත් පොලිසිය අධිකරණයට දන්වා සිටියේය.
මෙහිදී තමන්ට යමක් පැවසීමට ඇතැයි දෑත් ඔසවමින් සැකකාර හිමිනම කළ ඉල්ලීම සහ නීතිඥවරයකු පෙනී නොසිටීම සලකා බලා කීමට ඇති දේ පවසන ලෙස මහේස්ත්‍රාත්වරිය සැකකාර හිමිනමට දැනුම් දුන්නාය.
“ස්වාමීනි, ස්වාමීනි මම පෙනී සිටින්නේ මේ රටේ අහිංසක ජනතාව වෙනුවෙන්. මා සමඟ වෛරය පිරිමහන්නේ ජාතික ජන බලවේගය ආණ්ඩුව ගේන්න වැඩ කළ නිසා. ජාතිවාදය, ආගම්වාදය කරන අයවලුන් හොරකම, කපටිකම, වංචාව කරන අයට මාව පේන්න බෑ. කුඩුකාර මාධ්‍යය පාතාලයට උදව් කරන මාධ්‍ය, දේශපාලනුවන්ට උදව් කරන මාධ්‍යය මට හැමවිටම ගහනවා. බැංකු ගිණුම් තුනයි බැංකු ගිණුම් පහළොවක් තියෙනවා කිව්වා හොරු සමඟ හිටියනම් හොඳයි. මගේ ජීවිතය තීරණය තියෙන්නේ ඔබතුමිය අතෙයි. කැමැති කාලයක් මාව හිරේ තියන්න මම මැරිලා යන්නම්, මට වනාන්තරේට ගිහිල්ල විමුක්තිය සොයා ගන්න තිබුණා. මම හැමදාම උදව් කළේ නැති බැරි මිනිස්සුන්ට. මට කුඩුකාරයෝ, පාතාලකාරයෝ පේන්න බෑ. මගේ යූටියුබ් චැනලය පරීක්ෂා කරන්න පැමිණිලිකර ස්වාමීන් වහන්සේගේ නමින් තියෙන යූටියුබ් චැනලයත් පරීක්ෂා කරන්න. මාව හිරේ දාලා මට වධ දෙන්න එපා. පාතාලකාරයෝ, කුඩුකාරයෝ මාව හිරගෙදරදී මරා දමාවී. මාව වෙඩි තියලා මරලා දාන්න. හොරකම් ගැන, තක්කඩිකම් ගැන අනාවරණය කිරීම වරදක් නම් වෙඩිතියා මරා දාන්න” යැයි සැකකාර හිමිනම පවසා සිටියහ.
එහිදී මහේස්ත්‍රාත්වරිය සිය නියෝගය ප්‍රකාශයට පත් කරමින් අශිෂ්ට, අසභ්‍ය නොගැළපෙන වචන භාවිත කරන්නේ ද යන්න අධීක්ෂණය කිරීමට මාස තුනක අධීක්ෂණ කාලයක් සැකකාර හිමිනමට පවරන බවට නියෝග කළාය.
තරයේ අවවාද කරමින් මහේස්ත්‍රාත්වරිය සැකකාර රාජාංගණයේ ධම්මරතන හිමියන්ට මාස තුනක් අධීක්ෂණ සමා කාලයක් ලබා දුන් අතර, එම කාලය තුළ වැරදි අනාවරණය වන්නේ නම් අධිකරණයට වාර්තා කරන ලෙස පොලීසියට නියෝග කළාය.
ඇප කොන්දේසි කඩකළහොත් පෙර දඬුවම් ක්‍රියාත්මක කර රක්ෂිත බන්ධනාගාර ගත කරන බවට ද මහේස්ත්‍රාත්වරිය දැනුම් දුන්නාය.
සුභාෂිණී සේනානායක
