උතුරු මැද පළාත් ප්‍රධාන අමාත්‍යවරයා ලෙස කටයුතු කරමින් සිටියදී නීතියට පටහැණිව ඉන්ධන දීමනාව ලෙස රුපියල් ලක්ෂ 26කට අධික මුදලක් ලබා ගැනීම ඇතුළු චෝදනා කිහිපයකට වරදකරු වූ එස්.එම්. රංජිත් සමරකෝන්ට සහ ඔහුගේ පෞද්ගලික ලේකම්වරිය හැටියට කටයුතු කළ හිටපු ඇමැති එස්.එම්. චන්ද්‍රසේනගේ බිරිය වන ශාන්ති චන්ද්‍රසේන යන දෙදෙනාට කොළඹ ප්‍රධාන මහාධිකරණ විනිසුරු ආදිත්‍යය පටබැඳි මහතා ඊයේ (02) බරපතළ වැඩ සහිතව වසර 16ක සිරදඬුවමක් නියම කළේය.
මෙයට අමතරව විත්තිකරුවන්ට රුපියල් ලක්ෂ 2 බැඟින් දඩ ගෙවීමට සහ එය නොගෙවන්නේ නම් බරපතළ වැඩ සහිතව අමතර සිරදඬුවම් ද නියම කෙරිණි.
විත්තිකරුවන්ට මෙලෙස දඬුවම් නියම වූයේ ගලෙන්බිඳුණුවැව – කැකිරාව පාරේ පදිංචි කේ. නිමල් විජේතිලක නම් පුරවැසියා විසින් 2015 වසරේදී දූෂණ මර්දන කමිටුව මඟින් අල්ලස් කොමිසමට ඉදිරිපත් කළ පැමිණිල්ලක් විභාගයට ගැනීමෙන් අනතුරුවය.
උතුරු මැද පළාතේ ප්‍රධාන ඇමැතිවරයා ලෙස කටයුතු කළ සමරකෝන් මුදියන්සේලාගේ රංජිත් සමරකෝන් යන අය රජයේ සේවකයකු ලෙස කටයුතු කරමින් ඔහුගේ තනතුරට නීත්‍යනුකූලව හිමි වන ඉන්ධන දීමනාව වැටුප සමඟ දී තිබියදී ඉන්ධන දීමනාව ලෙස රුපියල් 2,680,528.10ක මුදලක් 2012 – 2014 වසර දෙක සඳහා ලබාගෙන තිබේ. ඔහුගේ පෞද්ගලික ලේකම්වරිය ලෙස හිටපු ඇමැති එස්.එම්. චන්ද්‍රසේනගේ බිරිය වන ශාන්ති චන්ද්‍රසේන කටයුතු කර ඇත. අයුතු ලාභ ලැබීම සඳහා 2 වැනි විත්තිකාරියට අනුබල දීම හා කුමන්ත්‍රණය කිරීම ඔවුන්ට විරුද්ධව ඉදිරිපත්ව ඇති චෝදනාවය.
විත්තිකරුවන් වැරදිකරුවන් කිරීමෙන් පසු දඬුවම් නියම කිරීමට පෙර කරුණු දැක්වීමට මහාධිකරණ විනිසුරු ආදිත්‍යය පටබැඳි මහතා දෙපාර්ශ්වයට අවස්ථාව දෙන ලදි. ඒ අනුව අල්ලස් හෝ දූෂණ කොමිසමේ සහකාර අධ්‍යක්ෂ ජනරාල් අමා විජේසිංහ මහත්මිය මෙසේ කරුණු දැක්වූවාය.
Òගරු ස්වාමීනි, විත්තිකරුවන්ට රජයෙන් ලැබෙන වැටුප් හා දීමනාවලට අමතරව ඔවුන් බලය අයුතු ලෙස යොදවා මේ මුදල් වංචා කර තිබෙනවා. මෙසේ වංචා කළ මුදල් ලක්ෂ 26ක් නිසා සරල කාරණයක් ලෙස කෙනෙක්ට පෙනෙන්න පුළුවන්.
නමුත් ස්වාමීනි, මේ අවුරුදු දෙකකදී ලබාගෙන ඇති අමතර දීමනාව පමණයි. අවුරුදු 13කට පෙර මේ මුදලේ වටිනාකම ගැන සිතා බලන්න. මේ වරදට 1994 අංක 20 දරන සංශෝධිත අල්ලස් පනත අනුව විත්තිකරුවන්ට වසර 10ක සිරදඬුවමක් සමඟ රුපියල් ලක්ෂයක සිරදඬුවමක් නියම කිරීමේ හැකියාව තිබෙනවා. වරදේ බරපතළකම සලකා උපරිම දඬුවම ප්‍රකාශ කරන ලෙස ඉල්ලා සිටිනවාÓ යැයි කියා සිටියාය.
අනතුරුව මහාධිකරණ විනිසුරු ආදිත්‍යය පටබැඳි මහතා තීන්දුව ප්‍රකාශ කළේය.
Òආණ්ඩුක්‍රම ව්‍යවස්ථාව මඟින් ජනතාවගේ පරමාධිපත්‍යය ක්‍රියාත්මක කිරීමේ හා භුක්ති විඳිමේ බලය ජනතා නියෝජිතයන්ට පැවරී තිබෙනවා. එකී විශ්වාසය ආරක්ෂා කිරීම ඔවුන්ගේ කාර්යයක්. මහජන නියෝජිතයන් සුවිශේෂ කොටසක් නෙමෙයි. රජයේ සේවකයන් වන ඔවුන්ගෙන් හා අධිකරණ නිලධාරීන්ගෙන් සෙසු පුරවැසියන් අයුතු ලාභ, අනුග්‍රහ හෝ වාසි පිණිස බලය භාවිත කිරීම බලාපොරොත්තු වෙන්නේ නැහැ.
රට ආර්ථික වශයෙන් බංකොළොත් වීමට අල්ලස සහ දූෂණය බෙහෙවින් බලපා තිබෙනවා. මේ නිසා විත්තිය ඉල්ලා සිටින ආකාරයේ ලිහිල් දඬුවමක් හෝ යළි සමාජගත විය හැකි ආකාරයේ දඬුවමක් චුදිතයන්ට නියම කළ නොහැකියි.Ó යැයි පැවසීය.
අල්ලස් හෝ දූෂණ කොමිසම මඟින් විත්තිකරුවන්ට විරුද්ධව 2021 වසරේදී ජූලි 09 වැනිදා නඩු පැවරීම සිදු විය. එහිදී චුදිතයන්ට විරුද්ධව චෝදනා 8ක් ඉදිරිපත් වූ අතර පසුව චෝදනා පත්‍රය සංශෝධනය කරන ලදි. එහිදී අධිචෝදනා 6ක් ඉදිරිපත් කෙරිණි.
තීන්දුව ප්‍රකාශ කිරීමේදී විනිසුරුවරයා චෝදනා 3ක් ප්‍රතික්ෂේප කර වැරදි 3කට පමණක් දඬුවම් නියම කරන ලදි.
ඉදිරිපත් වූ චෝදනා දෙකකට වැරදිකරු කළේය. එක් චෝදනාවකට වසර 8 බැඟින් චෝදනා දෙක සඳහා වසර 16ක සිරදඬුවම් නියම කෙරිණි.
අල්ලස් කොමිසමේ සහකාර අධ්‍යක්ෂ ජනරාල් අසිත ඇන්තනි පැමිණිල්ල මෙහෙයවූ අතර විත්තිකරු වෙනුවෙන් චින්තක උඩදෙණිය, සහන් වීරසේකර, තරුෂි ගමගේ සමඟ දර්ශන කුරුප්පු යන නීතිඥ මහත්ම මහත්මීහු පෙනී සිටියහ. –චන්දන ජයවීර
එස්.එම්. රංජිත්-ශාන්ති චන්ද්‍රසේන වැලිකඩට
බරපතළ වැඩ සහිත වසර 16ක සිරදඬුවම් නියම වූ උතුරු මැද පළාතේ හිටපු ප්‍රධාන අමාත්‍ය එස්.එම්. රංජිත් සහ ඔහුගේ පෞද්ගලික ලේකම්වරිය ලෙස කටයුතු කළ ශාන්ති චන්ද්‍රසේන ඊයේ (02) පස්වරු 3.00ට පමණ වැලිකඩ බන්ධනාගාරයට රැගෙනවිත් තිබිණි.
බන්ධනාගාර උසස් නිලධාරියකු පැවසුවේ ශාන්ති චන්ද්‍රසේන ඊයේ (02) වැලිකඩ කාන්තා අංශයට යොමු කළ බවය.
එස්.එම්. රංජිත් වැලිකඩ නවක සිරකරුවන් රඳවන සාමාන්‍ය සිර වාට්ටුවකට යොමු කළ බව ද එම නිලධාරියා පැවසීය.
බන්ධනාගාර වෛද්‍යවරයා විසින් ඊයේ (02) රාත්‍රියේ ඔවුන්ව පරීක්ෂා කිරීමට නියමිතව තිබූ අතර හිටපු ප්‍රධාන අමාත්‍යවරයා අද (03) බොහෝ විට වෙනත් සිරවාට්ටුවකට යොමු කරනු ඇති බවත් හෙතෙම පැවසීය.
බුද්ධිකා ඉඹුලාන
