අදානි සුළං විදුලි බලාගාර ව්‍යාපෘතිය නතර කරනවා නම් එයට හේතු මොනවාදැ’යි දැනගත යුතු බව හිටපු ජනාධිපති රනිල් වික්‍රමසිංහ මහතා පැවසීය.
ව්‍යාපෘතිය සඳහා මුදල් ගත්තා යැයි චෝදනා කරනවා නම් මුදල් දුන්නේ අදානි දැයි විමසූ රනිල් වික්‍රමසිංහ මහතා, ඉන්දියාවේ අගමැති මෝදි මහතා මෙරට සංචාරයකට පැමිණෙන මේ අවස්ථාවේ ව්‍යාපෘතිය නොදෙන කතා ඇද ගත යුතු නැති බවද සඳහන් කළේය.
මාධ්‍ය වෙත විශේෂ ප්‍රකාශයක් කරමින් හිටපු ජනාධිපතිවරයා ඊයේ (02) මෙසේද සඳහන් කළේය. 2023-2024 සමයේදී අපේ ආණ්ඩුව පුනර්ජනනීය බලශක්තිය පිළිබඳ යෝජනා ගණනාවක් අනුමත කළා. අප ඒ වැඩ කටයුත්ත කළේ මේ රටට බලශක්තිය වුවමනා වූ නිසයි. විදේශ ආයෝජන සමඟ රටට අලුත් විදේශ ආයෝජන ලැබුණා. ඒ අනුව ඩොලර් බිලියන දෙකක් හෝ දෙකහමාරක පමණ ව්‍යාපෘති අප අනුමත කළා. මේ ව්‍යාපෘති අනුමත කරන අවස්ථාවේදී එක් එක් ව්‍යාපෘති වෙනුවෙන් කමිටුවලින් මිල නියම කළා. ඊට හේතු ගණනාවක් තිබෙනවා. මේ වැඩ කටයුත්ත කළේ ඒ කාරණා සියල්ල සලකා බැලීමෙන් පසුවයි. ඉන්දියාව හා ලංකාව අතර බලශක්ති වැඩසටහන ක්‍රියාත්මක කිරීම සම්බන්ධයෙන් අප ආණ්ඩුවට සහාය දෙනවා. අනෙක් වැඩ කටයුතු කරන විටත් අප අදාළ සහාය දෙනවා. ඉන්දියාව සමඟ අප එකට වැඩ කළ යුතුයි.
ශිරෝමි අබයසිංහ
