ජනතාවට සහන ලබාදීමට රජය කැමැත්තෙන් පසුවුවත් එහිදී ජත්‍යන්තර මූල්‍ය අරමුදලේ කොන්දේසි ද සැලකිල්ලට ගත යුතුව තිබෙන බව විද්‍යා හා තාක්ෂණ ඇමැති, මහාචාර්ය ක්‍රිෂාන්ත අබේසිංහ මහතා පවසයි.
ඉන්ධන මිල අවස්ථා කීහිපයකදී සැලකිය යුතු ලෙස අඩුකර තිබෙන බවත් මෙහිදී රජයේ ආදායම් හා වියදම් ගැනද අවධානය යොමු කළ යුතුව තිබෙන්නේ යැයි ඒ මහතා කීය.
මහනුවරදී පෙරේදා (01) පැවති මාධ්‍ය හමුවේ අදහස් දක්වමින් ඇමැති ක්‍රිෂාන්ත අබේසිංහ මහතා මෙසේද පැවසීය.
සහන ලබාදෙන අතරතුර රජය සෑමවිටම ආදායම් හා වියදම් අතර පරතරය අවම කර ගැනීම සම්බන්ධයෙන් අවධානය යොමු කළ යුතුව තිබෙනවා. මීටත් වඩා සෑම භාණ්ඩයකම මිල අඩු කරන්න තියෙනවා නම් අපි කැමතියි. නමුත් එහෙම කරන්න විදියක් නැහැ. ජාත්‍යන්තර මූල්‍ය අරමුදලේ කොන්දේසි සමඟ අපි ඉදිරියට යා යුතුයි. ඉන්ධන මිල විශාල ලෙස එකවර අඩු කිරීම අසීරුයි. අපි පුනර්ජනනීය බලශක්ති ක්‍රමවේද පිළිබඳව අවධානය යොමු කළ යුතුයි. ඉන්දීය අගමැතිවරයා මෙවර ලංකාවට පැමිණි පසු ඒ සම්බන්ධයෙන් විශේෂ ගිවිසුමකට එළැඹීමට අපි බලාපොරොත්තු වෙනවා. ඉන් අනතුරුව විදුලි බිල වගේම ඉන්ධන මිල තවත් අඩු කරන්න අපට පුළුවන්.
ඇතැමුන් කියන ආකාරයෙන් බටලන්ද වධකාගාරය සම්බන්ධ සිද්ධිය මඟට ගෙනල්ලා අත්හැරදාන්න අපි සූදානම් නැහැ. මේ ඝාතනවලට වගකිවයුත්තන් සොයා ඔවුන්ට දඬුවම් දිය යුතුයි. පාර්ලිමේන්තුවේ මේ සම්බන්ධයෙන් දින දෙකක විවාදයක් තිබෙනවා. ඉන්පසු අපි මේ පිළිබඳව කටයුතු කිරීම නීතිපති දෙපාර්තමේන්තුව වෙත යොමු කරනවා. මේ සම්බන්ධයෙන් චෝදනා එල්ල වන පුද්ගලයන්ට එරෙහිව කරුණු ඔප්පු කිරීමට නියමිත පරිදි සාක්කි තිබේ නම් ඔවුන්ට අනිවාර්යයෙන්ම දඬුවම් විඳින්න වෙනවා. අපට කවුරුවත් ආරක්ෂා කරන්න අවශ්‍ය නැහැ. පරීක්ෂණවලට දේශපාලන බලපෑම් එල්ල වන්නේ නැහැ. පාස්කු දින ප්‍රහාරයට අදාළ පරීක්ෂණත් මේ වන විට සිදු වෙමින් තිබෙනවා. හිටපු දේශපාලනඥයන් සමඟ සම්බන්ධතා පවත්වමින් පරීක්ෂණ නිසි ලෙස නොකරන නිලධාරීන් ඉන්න පුළුවන්. අපි කිසිම දේශපාලන බලපෑමක් නොකරන නිසා ඔවුන් පහසුවෙන් හඳුනාගත හැකියි. එවැනි අය ඉවත් කර සාධාරණ පරීක්ෂණ ක්‍රියාවලියක් ඔස්සේ මේ සිදුවීම්වලට වගකිවයුතු පුද්ගලයන් කඩිනමින් නීතිය හමුවට ගෙන ඒම තමයි රජයේ අරමුණ.
අසේල කුරුළුවංශ
