පාර්ලිමේන්තු මන්ත්‍රී නාමල් රාජපක්ෂ මහතාගේ නීති උපාධිය වංචනික ලෙස ලබාගෙන තිබේද යන්න සම්බන්ධයෙන් පුළුල් විමර්ශනයක් පවත්වා වහාම අධිකරණයට කරුණු දක්වන ලෙස කොළඹ ප්‍රධාන මහේස්ත්‍රාත් තනුජා ලක්මාලි මහත්මිය අද(03) අපරාධ පරීක්ෂණ දෙපාර්තමේන්තුවට නියෝග කළාය.
සිද්ධිය සම්බන්ධයෙන් අද අපරාධ පරීක්ෂණ දෙපාර්තමේන්තුව විමර්ශන නිලධාරීන් නාමල් රාජපක්ෂ මහතාගේ නිතීඥ භාවය ලබා ගැනීම සම්බන්ධයෙන් අධිකරණයට ඉදිරිපත් කළ කරුණු සලකා බැලීමෙන් පසුව මෙම නියෝගය නිකුත් කෙරිණී.
අල්ලස හෝ දූෂණය පිටුදැකීමේ පුරවැසි බලය විසින් සිදුකළ පැමිණිල්ලක් අනුව මෙම විමර්ශනය ආරම්භ කළ බව විමර්ශන නිලධාරී අධිකරණයට කරුණු දැක්වීය.
නාමල් රාජපක්ෂ මහතා නීතිඥ භාවය ලබා ගැනීමට අදාල ශ්‍රී ලංකා නීති විද්‍යාලයේ විභාගයට මුහුණ දීමේ දී වංචාවක් සිදු කර ඇද්ද යන්න පිළිබඳව තවදුරටත් විමර්ශන සිදු කර ප්‍රගතිය සඳහන් වාර්තාවක් අධිකරණයට ඉදිරිපත් කරන ලෙසට ද නියෝග කළාය.
