වත්තල – හේකිත්ත පාරේ ලැගුම්හලකදී ගෙල වැලලාගෙන සියදිවි හානිකර ගැනීමට සූදානම් වූ කාන්තාවකගෙන් කළ ප්‍රශ්න කිරීමේදී හෙළිවූ තොරතුරු මත බ්ලූමැන්ඩල් රවී නමැති විදෙස්ගතව සිටින පාතාල අපරාධකරු ඇයට සුරක්ෂිතව සඟවා තබා ගැනීමට දී තිබුණු ටී-56 අවියක් සමඟ පතරොම් 113ක් සොයා ගැනීමට වත්තල පොලීසිය පෙරේදා (01) සමත් විය.
වයස අවුරුදු 35ක් වන කොළඹ 15, බ්ලූමැන්ඩල් හි පදිංචිකාරියක වන එම කාන්තාව ඒ අනුව සැකපිට පොලීසිය අත්අඩංගුවට ගෙන ඇත.
මත්කුඩු ජාවාරම සම්බන්ධයෙන් අත්අඩංගුවට ගැනීමට පොලීසිය සොයමින් සිටි ඇය පසුගිය 31 වැනිදා රාත්‍රී කාලයේ වත්තල හේකිත්ත පාරේ ලැගුම්හලට පැමිණ කාමරයක් වෙන්කරගෙන එහි නවාතැන් ගෙන සිට ඇති බව පොලීසියට ලැබී ඇති තොරතුරුවල සඳහන්ය. එදින රාත්‍රී කාලයේ ඇයව මුණ ගැසීමට කිහිප දෙනකුම එහි පැමිණ ගොස් ඇති බවටද තොරතුරු පොලීසියට ලැබී ඇත.
මෙම කාන්තාව කාමරය තුළ ගෙල වැලලාගෙන ඇති බවට වත්තල පොලීසියට පෙරේදා (01) ලද තොරතුරකට අනුව පොලිස් කණ්ඩායමක් එම ලැගුම්හලට ගොස් පරීක්ෂා කළ බව බස්නාහිර පළාත් උතුරු දිසා නියෝජ්‍ය පොලිස්පති ප්‍රියන්ත ලියනගේ මහතා පැවැසීය.
එහිදී පෙනී ගොස් ඇත්තේ ගෙල වැලලාගැනීමක් සඳහා ඇඳ ඇතිරිල්ලකින් තොණ්ඩුවක් සකස්කර කාමරයේ එල්ලා තිබෙන අයුරුය. වැඩිදුර සොයා බැලීමේදී ඇය නාන කාමරයේ සිහිසුන්ව සිටි බව වත්තල පොලීසිය සඳහන් කළේය.
සිහිසුන්ව සිටි ඇයට පොලීසිය මැදිහත්ව මූලික ප්‍රතිකාර ලබා දී සිහි ගැන්වීමෙන් පසු කළ ප්‍රශ්න කිරීමේදී මත්කුඩු ජාවාරම සම්බන්ධයෙන් පොලීසිය සොයමින් සිටින කාන්තාවක් බව පෙනී ගොස් තිබේ.
සියදිවි හානිකර ගැනීමට ඇය උත්සාහ ගෙන ඇති බව ද ප්‍රශ්න කිරීම් හා විමර්ශන ඔස්සේ අනාවරණය වී ඇත.
පරීක්ෂා කිරීමේදී ඇය සන්තකයේ තිබී අයිස් මත්ද්‍රව්‍ය ග්‍රෑම් 06යි මිලිග්‍රෑම් 100ක් හමුවී තිබේ.
කුප්‍රකට මත්කුඩු ජාවාරම්කරුවෙක් වන බ්ලූමැන්ඩල් රවී නමැත්තා සමඟ ඇය සමීප ඇසුරක් පවත්වා ඇති බවටද තොරතුරු අනාවරණය වී ඇත.
ප්‍රශ්න කිරීමේදී ඇය පොලීසියට පවසා ඇත්තේ රවී නමැති මත්කුඩු ජාවාරම්කරු වසරකට පෙර දුරකතන ඇමතුමක් දෙමින් ටී-56 වර්ගයේ ගිනි අවියක් සුරක්ෂිතව සඟවා තබා ගැනීමට පුද්ගලයකු මඟින් ලබාදුන් බවය. එම අවිය තමා රාගම හීන්කෙන්දේ පදිංචිව සිටින සිය අනියම් සැමියාගේ නිවසේ සඟවා තැබූ බව ද ප්‍රශ්න කිරීම් හමුවේ ඇය පවසා තිබේ.
ඇය විසින් කළ එම හෙළිකිරීම් මත පොලිස් කණ්ඩායමක් හීන්කෙන්දේ පිහිටි නිවසට ගොස් ටී-56 අවිය සමඟ පතරොම් 113ක් සොයාගෙන ඇත.
මෙම අවියත් සමඟ ඇගේ අනියම් සැමියා බව කියන 40 හැවිරිදි පුද්ගලයාවද අත්අඩංගුවට ගෙන තිබේ.
මෙම අවිය මෑතකදී අපරාධ සඳහා යොදාගෙන ඇති බවට තොරතුරු අනාවරණය නොවන බව පොලීසිය සඳහන් කරයි. එහෙත් යම් අපරාධයක් සඳහා මෙම අවිය යොදාගෙන තිබේදැයි තහවුරුකර ගැනීමට අවිය රජයේ රස පරීක්ෂක වෙත ඉදිරිපත් කිරීමට පියවර ගන්නා බව පොලීසිය සඳහන් කළේය.
මෙම සැකකරුවන් දෙදෙනා රඳවාගැනීමේ නියෝග මත රඳවාගෙන විමර්ශන පැවැත්වීමට අවශ්‍ය පියවර ගන්නා බව පොලීසිය පැවසීය.
ගයාන් කුමාර වීරසිංහ
