Home » එක්ස්ප්‍රස් පර්ල් නැවේ නඩු පැවරීමේ බලය පසුගිය රජය සිංගප්පූරුවට පවරලා

එක්ස්ප්‍රස් පර්ල් නැවේ නඩු පැවරීමේ බලය පසුගිය රජය සිංගප්පූරුවට පවරලා

-ශ්‍රේෂ්ඨාධිකරණයේදී අනාවරණය වෙයි

by sachintha
April 3, 2025 4:00 pm 0 comment

එක්ස්ප්‍රස් පර්ල් නැව ගිනි ගැනීමේ සිද්ධිය සම්බන්ධයෙන් වන අධිකරණ බලය සිංගප්පූරුවට සීමා කිරීම සම්බන්ධයෙන් වන ගිවිසුමකට ඉකුත් රජය සමයේදී එවකට සිටි නීතිපතිවරයා සහ අධිකරණ අමාත්‍යාංශ බලධාරීන් විසින් එළැඹී ඇති බවට ඊයේ (02) ශ්‍රේෂ්ඨාධිකරණයේදී කරුණු අනාවරණය විය. එම නැව ගිනි ගැනීමෙන් ධීවරයන්ට සහ පරිසරයට සිදු වූ හානිය වෙනුවෙන් වන්දි දෙන ලෙස ඉල්ලා ගොනු කළ මූලික අයිතිවාසිකම් පෙත්සම් හතරක් පංචපුද්ගල ශ්‍රේෂ්ඨාධිකරණ විනිසුරු මඬුල්ල හමුවේ විභාගයට ගත් අවස්ථාවේදී ජනාධිපති නීතිඥ රොමේෂ් ද සිල්වා මහතා අදාළ ගිවිසුම අධිකරණයට ඉදිරිපත් කළ අවස්ථාවේදී මේ බව ප්‍රකාශ කෙරිණි.

අගවිනිසුරු මුර්දු ප්‍රනාන්දු මහත්මිය සහ ශ්‍රේෂ්ඨාධිකරණ විනිසුරුවරුන් වන යසන්ත කෝදාගොඩ, ශිරාන් ගුණරත්න, අචල වෙංගප්පුලි සහ ප්‍රියන්ත ප්‍රනාන්දු යන මහත්ම මහත්මීන්ගෙන් සමන්විත පංචපුද්ගල ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම් කැඳවන ලදි.

එහිදී අදාළ නැව අයත් සිංගප්පූරු සමාගම වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා කරුණු ඉදිරිපත් කරමින් සඳහන් කළේ අදාළ නැව ගිනි ගැනීමේ සිද්ධියෙන් සිදු වූ හානිය වෙනුවෙන් වන්දි ගෙවීමට සිය සමාගම කටයුතු කළ බවය.

එහෙත් එම වන්දි මුදල් අදාළ පුද්ගලයන්ට ලැබී තිබේ ද යන්න සම්බන්ධයෙන් පැහැදිලි නොමැති බවට ඒ මහතා සඳහන් කළේය.

කෙසේ වුවද නීතිඥ හිමාලී කුලරත්න මෙණෙවියගේ සේවාදායකයන් වන වන්දි ඉල්ලා සිටින ධීවර ජනතාවට වන්දි දීමට සිය සමාගම සූදානම් බව ද ජනාධිපති නීතිඥවරයා සඳහන් කළේය.

මෙම නැව ගිනි ගැනීමෙන් සිදු වූ හානිය වෙනුවෙන් නඩු පැවරීමේ අධිකරණ බලය සිංගප්පූරුවට පමණක් සීමා වන පරිදි ගිවිසුමක් 2023 වසරේ අගෝස්තු මාසයේදී එවකට සිටි නීතිපතිවරයා සහ අධිකරණ අමාත්‍යාංශ බලධාරීන් විසින් ඇති කරගෙන ඇති බව එහිදී සඳහන් කෙරිණි.

ඒ සම්බන්ධයෙන් අවධානය යොමු කළ විනිසුරු මඬුල්ල ප්‍රශ්න කර සිටියේ මෙරට ශ්‍රේෂ්ඨාධිකරණය ඇතුළු අධිකරණවල බලය සම්බන්ධයෙන් ගිවිසුමකට එළැඹීමට නීතිපතිවරයාට බලය තිබේ ද යන්නය.

කෙසේ වුවද සිංගප්පූරු අධිකරණයේ පවරා ඇති වන්දි නඩුව ද මේ වන විට විභාගයට නොගන්නා බව ද එහිදී පෙන්වා දෙන ලදි.

පෙත්සම් සම්බන්ධයෙන් වැඩිදුර කරුණු සලකා බැලීම අදට (03) කල් තැබිණි.

කොළඹ අගරදගුරු මැල්කම් කාදිනල් රන්ජිත් හිමිපාණන්,

මානව හිමිකම් ක්‍රියාකාරිකයකු වන සරත් ඉද්දමල්ගොඩ පියතුමා, වෘත්තීය ධීවරයන් දෙදෙනකු වන ඩබ්ලිව්. ගාමිණී ප්‍රනාන්දු, වර්ණකුලසූරිය ක්‍රිස්ටෝපර් සරත් ප්‍රනාන්දු සහ පරිසර විද්‍යාඥවරියක වන ආචාර්ය අජන්තා පෙරේරා, ජේ. ජෙගතීෂ්වරන්, පරිසර යුක්ති කේන්ද්‍රය සහ එහි විධායක අධ්‍යක්ෂ හේමන්ත විතානගේ විසින් මෙම පෙත්සම් ගොනු කර තිබිණි.

පරිසර ඇමැතිවරයා, ධීවර ඇමැතිවරයා, වරාය ඇමැති, වරාය අධිකාරියේ සභාපතිවරයා, පරිසර අමාත්‍යාංශයේ ලේකම්වරයා, එක්ස්ප්‍රස් පර්ල් නෞකාවේ දේශීය නියෝජිත සමාගම වන සී. කොන්සෝටියම් ලංකා පෞද්ගලික සමාගම, සමුද්‍ර දූෂණ වැළැක්වීමේ අධිකාරිය, මධ්‍යම පරිසර අධිකාරිය, නීතිපති ඇතුළු 12 දෙනෙක් එහි වගඋත්තරකරුවෝ ලෙස නම් කර සිටිති.

නෙල්කා මැදගෙදර

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT