අමෙරිකානු සෙනෙට් සභික ඩිමොක්‍රටික් නියෝජිත කොරි බුකර් එරට සෙනෙට් සභා ඉතිහාසයේ දීර්ඝතම කතාව සිදු කළ බව විදෙස් මාධ්‍ය වාර්තා කරයි. ජනාධිපති ඩොනල්ඩ් ට්‍රම්ප් දැඩි විවේචනයට ලක් කරමින් ඔහු පැය 25කුත්, මිනිත්තු 4ක කාලයක් සිය කතාව සිදුකළ බව විදෙස් මාධ්‍ය වැඩිදුරටත් වාර්තා කරයි. මීට පෙර 1957 දී රිපබ්ලිකන් සෙනෙට් සභික ස්ටෝම් තුර්මන්ඩ් සිවිල් අයිතිවාසිකම් පනතට එරෙහිව පැය 24කුත්, මිනිත්තු 18ක කතාවක් සිදු කරමින් එම වාර්තාවට හිමිකම් කී බව විදෙස් මාධ්‍ය සඳහන් කරයි.
නිව්ජර්සි ප්‍රාන්තය නියෝජනය කරන කොරි බුකර් සිය දීර්ඝ කතාවේදී රිපබ්ලිකන් පක්ෂයේ ජනාධිපතිවරයාගේ නියෝග සහ ට්‍රම්ප් පාලනයේ අණපනත් රැසක් විවේචනයට ද ලක් කර ඇතැයි වාර්තා වේ. ශාරිරීකව වෙහෙසට පත්වනතුරු සිය කතාව නතර නොකරන බව කියමින් පසුගිය සඳුදා පස්වරු 7.00ට සිය කතාව ආරම්භ කළ 55 හැවිරිදි කොරි බුකර් නැවත අසුන් ගෙන ඇත්තේ අඟහරුවාදා රාත්‍රී 8.06 ට බව විදෙස් මාධ්‍ය වාර්තා කරයි.
