හොරු අල්ලනවාට අපි කවදත් පක්ෂයි
වියදම් පාලනය හොඳයි. ඒත්, ආර්ථිකයත් ඉදිරියට ගෙන යා යුතුයි
පළාත් පාලන ඡන්දයේ ආයතන රැසකට අපි තරග කරනවා
ආණ්ඩුවේ සියලු හොඳ දේවල්වලට අපි ඕනෑම වෙලාවක සහාය ලබා දෙනවා
පළාත් පාලන මැතිවරණය සඳහා සිදු වන දේශපාලන පෙළගැසීම්, ආණ්ඩුවේ ගමන් මඟ පිළිබඳ සිය මතය කුමක්ද සහ තවත් දේශපාලන, කාලීන සහ සමාජ කරුණු පිළිබඳව ප්‍රජාතන්ත්‍රවාදී ජනතා පෙරමුණේ සහ දෙමළ ප්‍රගතිශීලී සන්ධානයේ නායක පාර්ලිමේන්තු මන්ත්‍රී මනෝ ගනේෂන් මහතා සමඟ සිදු කළ සාකච්ඡාවකි මේ.
ප්‍රජාතන්ත්‍රවාදී ජනතා පෙරමුණ පසුගිය කාලය තුළ විපක්ෂය තුළ කැපී පෙනෙන දේශපාලන පක්ෂයක් විදිහටයි කටයුතු කළේ. වරෙක කඳුරට පෙරමුණ සහ දිගම්බරම් මහතාගේ පක්ෂය ඇතුළු කණ්ඩායම් සමඟ එක්ව දෙමළ ප්‍රගතිශීලි සන්ධානය ලෙස ඔබ කටයුතු කළා. මෙවර පළාත් පාලන මැතිවරණය සඳහා ඔබ පක්ෂයේ සූදානම කොහොමද?
අපි දේශපාලන පක්ෂයක් විදිහට පළාත් පාලන මැතිවරණය සඳහා විවිධ ආකාරයට තරග කරනු ලබනවා. සමහර පළාත් පාලන ආයතන සඳහා අප තරග කරනු ලබන්නේ දෙමළ ප්‍රගතිශීලි සන්ධානය විදිහටයි. තවත් සභාවලට කඳුරට ජනතා පෙරමුණ විදිහටත් අපේ ප්‍රජාතන්ත්‍රවාදී ජනතා පෙරමුණ ලාංඡනය යටතේත් අප පළාත් පාලන මැතිවරණය සඳහා තරග කරනු ලබනවා. මෙම මැතිවරණය තුළ අපට සැලකිය යුතු නියෝජනයක් ලබා ගැනීමට අපට හැකියාව තිබෙනවා. සමගි ජන බලවේගය සමඟ සන්ධානගතවත් තරග කරනු ලබනවා.
මෙම මැතිවරණය තුළ අදාළ ප්‍රදේශවලට ආවේණික ප්‍රශ්න මොනවාද, ඒ ප්‍රශ්න විසඳීම සඳහා ගන්න ඕනෑ පියවර මොනවාද යන්න පිළිබඳව අප විශේෂයෙන්ම අවධානය යොමු කර තිබෙනවා. අප අපේ දේශපාලන ධාරාව තුළ වඩාත් ජනතාවට හිතකර ආකාරයට අපේ දේශපාලන ප්‍රතිපත්ති ක්‍රියාත්මක කළ හැකි ආකාරයේ වැඩපිළිවෙළක් නිර්මාණය කිරීම සඳහා තමයි කටයුතු කරනු ලබන්නේ.
පළාත් පාලන මැතිවරණ ක්‍රමය පිළිබඳව පසුගිය කාලයේදී විවිධ චෝදනා එල්ල වුණා. ඒ චෝදනා අතර බොහෝ අය සඳහන් කළේ, මේ මැතිවරණ ක්‍රමය ඉතාමත් සංකීර්ණ මැතිවරණ ක්‍රමයක් නිසා එහි යම් සංශෝධන ඇති කළ යුතු බවයි.?
ඔව්. අනිවාර්යෙන්ම මෙම පළාත් පාලන මැතිවරණ ක්‍රමය සංශෝධනය කළ යුතු බවට අප එදා සිට අදහස් පළ කළා. යෝජනා සිදු කළා. ඒත්, මේ මැතිවරණ ක්‍රමයේ සංශෝධනයක් ඇති කිරීමට හැකියාව ලැබුණේ නැහැ. මෙවරත් පැරැණි ක්‍රමය යටතේයි මැතිවරණය පවත්වනු ලබන්නේ. මේ අදහස එදා ජාතික ජන බලවේගයේ නායකයා විදිහට වර්තමාන ජනාධිපති අනුර කුමාර දිසානායක මහතා තුළත් තිබුණා. එහෙත් දැන් පැරැණි මැතිවරණ ක්‍රමය යටතේම පළාත් පාලන මැතිවරණය සඳහා කටයුතු සම්පාදනය වෙලා තිබෙනවා.
වත්මන් ජනාධිපතිවරයා පත්ව මාස හයක් ඉක්මවා ගොස් තිබෙනවා. මේ ආණ්ඩුව පිළිබඳව ඔබේ අදහස කුමක්ද?
ආණ්ඩුව බලයට පැමිණීමේදී ලබා දුන් ප්‍රධානම පොරොන්දුවක් වූයේ හොරකම, දූෂණය, අල්ලසට තිත තබන බවයි. ඒවායේ නියැළී අයථා ලෙස මුදල් සෙවූ පිරිස් සොයා නීතිමය පියවර ගන්නා බවයි. ඇත්තෙන්ම ඒ දේවල් ඒ විදිහට සිදු කරනවා නම් හොඳයි. අපි මේවා ඉටු කරනවා නම්, අප දේශපාලන පක්ෂයක් විදිහට වගේම රටේ පුරවැසියකු විදිහට හදවතින්ම කැමැතියි. අත් දෙකම ඔසවා ඒකට සහාය ලබා දෙනවා. ජනාධිපතිවරයා කීවා පාස්කු මහමොළකරුවන් අල්ලනවා කියලා, ඔවුන් පාස්කු මහමොළකරුවන් අල්ලන්න මේ අපරාධය කළේ කවුද කියලා පරීක්ෂණ කරලා අපරාධකරුවන් හඳුනා ගන්න, මහබැංකු වංචාව ගැන අවුරුදු දහයක සිට කතා කරනවා, ජනතාවත් අපේක්ෂා කරනු ලබනවා, මේ මහ වංචා පිළිබඳව වරදකරුවන් හඳුනාගෙන අවශ්‍ය දඬුවම් ලබා දීම සඳහා නීතිමය පියවර කඩිනම් කළ යුතුයි. මේවා හොඳ දේවල්. ඒවාට අපිත් ඕනෑම වෙලාවක සහාය ලබා දෙනවා. ඒත්, තවමත් ඒ හෙළිදරවු කිරීම් නිසි විදිහට සිදුව නැහැ. අප හිතනවා ඒවා ඉක්මනින් සිදු කර ජනතාව වෙත ප්‍රතිඵල හෙළිදරවු කරයි කියලා.
ඒත් විපක්ෂයට නඟන චෝදනාවක් වන්නේ විපක්ෂය රටේ ප්‍රතිරූපය හානි කරන බවයි. ඒ චෝදනා පිළිබඳව විපක්ෂයේ ප්‍රබලයෙකු විදිහට ඔබේ අදහස කුමක්ද?
ඒ චෝදනාව වැරැදියි. දැන් ආණ්ඩුව බලයට ඇවිත් මාස හයක් වෙනවා. පාර්ලිමේන්තුව තුළ තුනෙන් දෙකක බලයක් තිබෙනවා. ඒ නිසා ඔවුනට අවශ්‍ය තීන්දු ගැනීමට පුළුවන්කම තිබෙනවා. ආර්ථිකය දීර්ඝ කාලීනව ශක්තිමත් වෙන්න නම් මෙරටට ආයෝජකයන් ඇද ගැනීමට වැඩපිළිවෙළක් තිබෙන්න ඕනෑ. ඒත්, මේ මාස හය තුළ කිසිදු ආයෝජකයකු නිසි විදිහට දිනා ගැනීමට හැකියාව ලැබී නැහැ. එහෙත්, ආයෝජකයන් දිනා ගැනීමට නොහැකි වෙලා තිබෙන්නේ, විපක්ෂය රටේ ප්‍රතිරූපයට හානි කිරීම නිසා නොවෙයි. ආණ්ඩුව විසින්ම සිදු කළ අනුවණකම් නිසයි. ඒ නිසා අප රටක් විදිහට ආණ්ඩුවක් විදිහට වැරැදි සංඥා ලබා දීම නරක දෙයක් විදිහටයි හඳුන්වන්න පුළුවන්කම තිබෙන්නේ. ඉදිරි දිනවලදී ඉන්දීය අගමැතිතුමා මෙරටට පැමිණෙනවා. එහිදී අපේ රටට වාසිදායක තත්ත්වයක් උදාකර ගැනීමට හැකියාව තිබෙනවා. අප රටට හැකියාව තිබෙන්න ඕනෑ රට ගැන ලොකු චිත්‍රයක් ඇති කර ගැනීමට. ඒ සඳහා ආණ්ඩුව වැඩ කළ යුතුයි.
වියදම් පාලනය කිරීම හොඳ දෙයක්. ඒත් තවමත් ආර්ථිකය ඉදිරියට ගෙන යාමේ අංශයෙන් ආණ්ඩුව අසමත් බවක් පෙනෙනවා.
ජාතිය නැවත ගොඩනැඟීම පිළිබඳව කතාබහක් ඇතිව තිබෙනවා. ජාතිය ගොඩනැඟීම, ව්‍යවස්ථාව අලුත් කිරීම වැනි කරුණු පිළිබඳව අදහස් කාලයක් තිස්සේ කතාබහ වෙනවා. මේ ගැන ඔබේ අදහස පැහැදිලි කළ හැකිද?
ජාතිය ගොඩනැඟීම සඳහා අලුත් ව්‍යවස්ථාවක් අවශ්‍ය වෙනවා. අප අවුරුදු ගණනක සිට අලුත් ව්‍යවස්ථාවක් අවශ්‍යයි කියන මතයේ සිටින්නේ. අලුත් ව්‍යවස්ථාව නිර්මාණය කළ යුතුයි කියන සංවාදය විතරක් නොවෙයි ව්‍යවස්ථාවක් ඇති කිරීම සඳහාත් කටයුතු ආරම්භ වී තිබුණේ. එදා අප පමණක් නොවෙයි. ජනතා විමුක්ති පෙරමුණේ නායකයා සහ සහ එහි පාර්ලිමේන්තු මන්ත්‍රීවරයකු විදිහට කටයුතු කළ අනුර කුමාර දිසානායක මහතාත් අලුත් ව්‍යවස්ථාවක් ඇති කිරීමේ කාර්යභාරය තුළ සිටියා. ඇත්තෙන්ම එතුමා සහ මම එකම ළඟ පුටු දෙකක සිට තමයි අලුත් ව්‍යවස්ථාවක් නිර්මාණය කිරීම සඳහා සාකච්ඡාවල නිරත වුණේ. ඒ නිසා මම ඉල්ලා සිටිනවා අද ජනාධිපති ධුරය දරන අනුර කුමාර දිසානායක මහතාට අලුත් ව්‍යවස්ථාවක් බිහි කර ජාතිය ගොඩනැඟීමේ කාර්ය සඳහා ඉක්මනින් මැදිහත් වෙන්න කියලා. එදා ව්‍යවස්ථාවක් හදන කාර්ය සඳහා අනුර කුමාර දිසානායක මහතා ලොකු මැදිහත් වීමක් සිදු කළා.
ඔබ ව්‍යවස්ථාවක් බිහි කිරීම ඉක්මනින් කළ යුතුයි කියලා කියන්නේ ඇයි?
අලුත් ව්‍යවස්ථාවක් ඇති කිරීමේ කාර්ය ඉක්මනින් කළ යුතුයි. ජාතිය ගොඩනැඟීමට සහ රට නව මාර්ගයක් වෙත ගෙන යාමට අලුත් ව්‍යවස්ථාවක් අවශ්‍ය කරනු ලබනවා. තවම මේ ආණ්ඩුව අලුත් නිසා, නව ව්‍යවස්ථාවක් ඇති කිරීම සඳහා සුදුසුම කාලය තමයි දැන් පැමිණ තිබෙන්නේ. ආණ්ඩුව පරණ වෙද්දී අලුත් ව්‍යවස්ථාවක් ඇති කිරීම වගේ කාර්ය සිදු කරන්න අමාරුයි. අනෙක දැන් නව ආණ්ඩුවට අලුත් ව්‍යවස්ථාවක් ඇති කිරීම සඳහා පාර්ලිමේන්තුව තුළ ලොකු බලයක් තිබෙනවා. එනිසා ඉක්මනින් පාර්ලිමේන්තුවේ සෙසු පාර්ශ්ව රටේ සිවිල් කණ්ඩායම් සමඟ එක්ව සාකච්ඡා කර නව ව්‍යවස්ථාවක් ඇති කිරීම සඳහා අවශ්‍ය කාර්ය ඉටු කිරීම ආරම්භ කළ යුතුයි.
ආණ්ඩුව අලුත් ව්‍යවස්ථාව ඉදිරිපත් කිරීම පිළිබඳව නැවත අදහස් ලබා ගැනීම ආරම්භ කරන බවට සඳහන් වෙනවා?
ඒක හොඳ දෙයක් විදිහට සඳහන් කළ යුතුයි. ඒ වගේම කාලය ගත නොකර මේ කාර්ය ආරම්භ කළ යුතුයි. මොකද මේ අවුරුද්දේ අලුත් ව්‍යවස්ථාවක් ඇති කිරීම ආරම්භ නොකළොත් එය ලබන අවුරුද්දේදී කොහොමවත් කළ නොහැකි දෙයක් වෙනවා. එනිසා ජාතිය ගොඩනැඟීමට නම් අලුත් ව්‍යවස්ථාවක් ඇති කර ඉක්මනින් සම්මත කිරීමයි කළ යුත්තේ.
පළාත් පාලන මැතිවරණයේදී රටේම අවධානය ලැබී තිබෙන පළාත් පාලන ආයතනයක් බවට පත්ව තිබෙන්නේ කොළඹ මහනගර සභාවයි. පසුගිය මහමැතිවරණයේදී කොළ බළකොටුවක් වූ කොළඹ නගරයේ ආසන පහම වැඩි ඡන්දයෙන් ආණ්ඩුව ජයග්‍රහණය කළා. ඒ තත්ත්වය තුළ කොළඹ නගරයේ වාසිය මෙවරත් ආණ්ඩුවටද?
ජනාධිපතිවරණයේදී ජනධිපතිතුමා සියයට හතළිස් දෙකක් ගත්තා. ඒ ජයග්‍රහණය මහමැතිවරණයේදී තුනෙන් දෙකද ඉක්මවා ගිය රැල්ලක් බවට පත්වුණා. ඒත්, අද වෙද්දී ආණ්ඩුව වෙත තිබූ ඒ මහජන රැල්ල පහළ යමින් තිබෙන්නේ. ඒ නිසා තමයි රාමසාන්, සිංහල අවුරුද්ද, අය – වැය ඇතුළු විශේෂ අවස්ථා රැසක් මැද පළාත් පාලන මැතිවරණය පවත්වන්නට ආණ්ඩුව කටයුතු කරන්නේ. අය – වැය තුළ විපක්ෂයට තමයි කතා කිරීමේ වැඩි අවස්ථා ලැබෙන්නේ. ඒත්, අය – වැයට සහභාගි වීමට තිබූ අවස්ථා ගණනාවක් මට අහිමි වුණා. මට පමණක් නොවෙයි, විපක්ෂයේ සෙසු අයටද සිදු වුණේ ඒ දේමයි. ඒත්, ආණ්ඩුව දන්නවා කාලය ගත වීමත් සමඟ තිබෙන රැල්ල තවත් අඩු වෙනවා කියලා. මැතිවරණය ජුනි, ජූලිවල පැවැත්වූවා නම්, තත්ත්වය වඩාත් බරපතළ වෙන්න තිබුණා.
අපට කොළඹ මහනගර සභාව තුළ ආණ්ඩුවට බලය නොදී, ඒකාබද්ධ පාලනයක් පිහිටුවීමට පුළුවන්කම තිබෙනවා. ඒ ගැන කිසිදු සැකයක් තබාගත යුතු නැහැ.
උදිත ගුණවර්ධන
