අනුරාධපුර කැකිරාව සහ උලුක්කුලම ප්‍රදේශවල ඊයේ (2) සිදුවූ මාරක රිය අනතුරු දෙකකින් කාන්තාවක් ජීවිතක්ෂයට පත්ව, කුඩා ළමුන් දෙදෙනෙකු ඇතුළු පුද්ගලයන් හතර දෙනකු බරපතල තුවාල ලැබූ බවත් ඉන් එක් අයෙකුගේ පාදයක් ශෛල්‍ය කර්මයක් මගින් ඉවත් කිරීමට සිදුවූ බව පොලිසිය පවසයි.
යාපනය මහනුවර ඒ 9 මාර්ගයේ, ඔලුකරද දුම්රිය හරස් මාර්ගය ආසන්නයේදී තීරෝද රථයක් අනුරාධපුර සිට පානදුර දක්වා ගමන් කල පෞද්ගලික බස් රථයක ගැටී සිදු වූ රිය අනතුරකින් එම ත්‍රිරෝද රථයේ ගමන් කල මවක් ජීවිතක්ෂයට පත්ව ඇගේ සැමියා සහ දරුවන් දෙදෙනා බරපතළ තුවාල ලැබූ බව කැකිරාව පොලිසිය පවසයි.
මෙලෙස ජීවිතක්ෂයට පත්ව ඇත්තේ අංක 29/2 දුම්රියපල පාර, ඔලු කරද, කැකිරාව ලිපිනයේ පදිංචිව සිටි කහදව ආරච්චිලාගේ දීපිකා පියදර්ශනී නැමැති 39 හැවිරිදි කාන්තාවකි,
මෙම අනතුර සම්බන්ධයෙන් බස් රථයේ රියදුරා වන අලව්ව පාර, පොල්ගහවෙල ලිපිනයේ පදිංචි 27 හැවිරිදි පුද්ගලයෙකු අත්අඩංගුවට ගෙන අධිකරණයට ඉදිරිපත් කිරීමට නියමිතව සිටියේය.
අනුරාධපුර පුත්තලම ඒ 12 මාර්ගයේ , හොරකහා වැව පිහිටි වන සංරක්ෂණ නිවාඩු නිකේතනය ඉදිරිපිටදී පෙරේදා 2දා අළුයම 4 පමණ ලොරි රථ දෙකක් එකිනෙක ගැටී සිදුවූ රිය අනතුරකින් එක් ලොරි රථයක ගමන් කල රිය සහායකයෙකු බරපතල තුවාල ලබා අනුරාධපුර ශික්ෂණ රෝහලට ඇතුළත් කිරීමෙන් අනතුරුව ඔහුගේ වම් පාදය ශෛල්‍ය කර්මයක් මගින් ඉවත් කිරීමට සිදුවූ බව පොලිසිය කියයි.
කොළඹ සිට යාපනය දක්වා සිල්ලර බඩු තොගයක් ප්‍රවාහනය කරමින් තිබූ එම ලොරි රථය, ඉදිරියෙන් ගමන් කල ලොරි රථයේ පිටුපස ගැටීමෙන් මෙම අනතුර සිදුව තිබුණි.
මෙම රිය අනතුරු දෙක සම්බන්ධයෙන් කැකිරාව පොලිසියේ රථ වාහන අංශයේ නිලධාරීහු කණ්ඩායමක් සහ අනුරාධපුර මූලාස්ථාන පොලිසියේ රථ වාහන අංශයේ සැරයන් චන්ද්‍ර කුමාර (24503) , පො.කො. පුෂ්පකුමාර (79773) යන නිලධාරීහු වැඩි දුර විමර්ශන සිදු කරති.
