Home » මහනුවර පිල ක්ලිෆර්ඩ් කුසලාන අවසන් තරගයට
සීඑච් පිලට එරෙහිව ජය ලැබූ

මහනුවර පිල ක්ලිෆර්ඩ් කුසලාන අවසන් තරගයට

by mahesh
April 2, 2025 4:00 pm 0 comment

ෆවුස් මොහොමඩ්

සීඑච් ඇන්ඩ් එෆ්සී. ක්‍රීඩා සමාජයට එරෙහිව පැවැති අවසන් පූර්ව තරගයෙන් ලකුණු 38-21ක ජයක් ලැබූ මහනුවර ක්‍රීඩා සමාජය ක්ලිෆර්ඩ් කුසලාන අවසන් මහා තරගයට සුදුසුකම් ලැබීමට ඊයේ සමත් විය.

වසර 6කට පසුව ක්ලිෆර්ඩ් කුසලානය හඹා යන මහනුවර පිල නිත්තවෙල ක්‍රීඩාංගණයේදී ඊයේ පස්වරුවේ පැවති මේ තරගයේ පළමු භාගයේ ලකුණු 26-0කින් පෙරමුණ ගත් අතර, තරගය පුරා ගෝල් 4ක් සහ උත්සාහක දිනුම් 2ක් තබමින් සිය ජයග්‍රහණය තහවුරු කරගත්තේය. සියවසකට අධික ඉතිහාසයකට හිමිකම් කියන ආසියාවේ පැරැණිතම රග්බි තරගාවලිය වන ‘ක්ලිෆර්ඩ් කුසලාන’ පිළිමලුන් පිටුදැකීමේ තරගාවලියේ මෙතෙක් ශූරතා 22ක් දිනා සිටින මහනුවර පිල හමුවේ තරගයේ දෙවැනි භාගයේදී සීඑච් ක්‍රීඩකයන් දැඩි සටනක නිරත වුවද ජයග්‍රහණයට එය ප්‍රමාණවත් නොවීය.

මහනුවර පිල වෙනුවෙන් ශහීඩ් සුම්රි සහ දිල්රුක්ෂ දංගේ උත්සාහක දිනුම් 2 බැගින් තැබූ අතර, දිනාල් ඒකනායක සහ නයිජල් රත්වත්ත එක් උත්සාහක දිනුම බැගින් තැබීමට සමත්වූහ. මින් උත්සාහක දිනුම් 4ක්ම ගෝල බවට පත් කරනු ලැබුවේ නයිජල් විසිනි. පළමු භාගයේ දැඩි පීඩනයට ලක්වී සිටි සීඑච් ක්‍රීඩකයන් දෙවැනි භාගයේදී උත්සාහක දිනුම් 3ක් තැබීමට සමත්වීම කැපී පෙනුණි. අනුක් ප්‍රනාන්දු, ජනිඳු ඩිල්ෂාන් සහ රමේෂ් ප්‍රනාන්දු තැබූ එම උත්සාහක දිනුම් ගෝල බවට පත් කිරීමට ජනිත් චන්දිමාල් සමත් විය.

අද (2) හැව්ලොක් ක්‍රීඩා සමාජය සහ සීආර් ඇන්ඩ් එෆ්සී ක්‍රීඩා සමාජය අතර හැව්ලොක් පිටියේදී පැවැත්වෙන ක්ලිෆර්ඩ් කුසලාන තරගාවලියේ දෙවැනි අවසන් පූර්ව තරගයේ ජයග්‍රාහකයන් සමඟ මහනුවර පිල ලබන 6 වැනිදා අවසන් මහා තරගයට ක්‍රීඩා කිරීමට නියමිතය.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT