පානදුර සුමංගල සහ මොරටුව මහා විද්‍යාලය අතර 73 වැනි ‘රන් සටන’ වාර්ෂික මහ ක්‍රිකට් තරගය මොරටුව ද සොයිසා ක්‍රීඩාංගණයේදී ජය පැරදුමෙන් තොරව නිමාවට පත් විය.
මේ තරගයේ පළමුව පන්දුවට පහර දුන් මොරටු විදුහල් පළමු ඉනිම ලකුණු 87කට සීමා කළ ශ්‍රී සුමංගල ක්‍රීඩකයෝ පළමු ඉනිම වෙනුවෙන් ලකුණු 144ක් රැස් කළහ. පළමු ඉනිමෙන් ලකුණු 57ක අවාසියක් ද අතැතිව දෙවැනි ඉනිම ක්‍රීඩා කළ මොරටු විදුහල තරගයේ දෙවැනි දිනය වන විට කඩුලු 4කට ලකුණු 87ක් රැස් කර සිටි අතර, තරගය නිමා වන විට කඩුලු 7ක් දැවී ලකුණු 217ක් රැස් කරමින් ශ්‍රී සුමංගල ජයග්‍රහණයේ සිහින බොඳ කළේය.
දිවයිනේ ප්‍රමුඛතම සම්බන්ධතා සම්පාදකයා වන ඩයලොග් ආසිආටා පීඑල්සී බලගැන්වූ මේ තරගයේ දක්ෂතම ක්‍රීඩකයා ලෙස මොරටු විදුහලේ සංජන සෙනෙවිරත්න සම්මාන දිනාගත් අතර, තරගයේ දක්ෂතම පිතිකරු ලෙස සඳුන් සුවාරිස් (මොරටු විදුහල), තරගයේ දක්ෂතම පන්දු යවන්නා ලෙස මෙවිඳු කුමාරසිරි (ශ්‍රී සුමංගල) සහ තරගයේ දක්ෂතම පන්දු රකින්නා ලෙස අනූෂ ද සිල්වා (ශ්‍රී සුමංගල) සම්මාන දිනා ගත්හ.
