ශ්‍රී ලංකාව නියෝජනය කරමින් ආසියානු පැසිෆික් සවි එසැවීමේ ශූරතාවලියට එක්වූ ඔස්ට්‍රේලියානු ජාතික කාන්තාවක වන ලීඩියා පෝල් රන් පදක්කම් 5ක් දිනා ගැනීමට සමත් වූවාය. ඔස්ට්‍රේලියාවේ මෙල්බර්න් නුවර පසුගියදා පැවති මේ ශූරතාවලියේදී කිලෝග්‍රෑම් 100 බර පන්තියෙන් තරග වැදුණු ඇය ලෝකඩ පදක්කමක් ද ඇතුළුව සමස්ත පදක්කම් 6ක් ශ්‍රී ලංකාවට අත්කර දුන්නාය. ශ්‍රී ලංකාව නියෝජනය කරමින් තරගකරුවන් 5 දෙනකු මෙවර ආසියානු පැසිෆික් සවි එසැවීමේ ශූරතාවලියට එක්වූ අතර, කණ්ඩායමේ එකම ක්‍රීඩිකාව වූ ලීඩියා පෝල්ගේ ජයග්‍රහණයට අමතරව ඇගේ සැමියා වන රුවන් පෝල්, රන්සිලු ජයතිලක, විකුම් පෙරේරා සහ මිනුර කන්නන්ගර ද පදක්කම් දිනා ගැනීමට සමත්වූහ. ඒ අනුව මේ ශූරතාවලියේදී ශ්‍රී ලංකාව රන් පදක්කම් 10ක්, රිදී පදක්කම් 2ක් සහ ලෝකඩ පදක්කම් 2ක් දිනා ගැනීමට සමත් විය.
වසර ගණනාවක සිට ජාත්‍යන්තර සවි එසැවීමේ රන් පදක්කම් රැසකට හිමිකම් කියන රුවන් පෝල් කිලෝග්‍රෑම් 120 බර පන්තිය නියෝජනය කරමින් රන් පදක්කම් 3ක් සහ ලෝකඩ පදක්කමක් දිනාගත් අතර, ශ්‍රී ලංකාවේ සවි එසැවීමේ ජාතික ශූරයකු වන රන්සිලු ජයතිලක ද කිලෝග්‍රෑම් 120 බර පන්තිය යටතේ රන් පදක්කමක් දිනා ගැනීමට සමත් විය.
මීට අමතරව කනිෂ්ඨ අංශයෙන් තරග වැදුණු මිනුර කන්නන්ගර කිලෝග්‍රෑම් 95 බර පන්තියෙන් රන් පදක්කමක් සහ රිදී පදක්කමක් දිනාගත් අතර, කිලෝග්‍රෑම් 105 බර පන්තියෙන් රිදී පදක්කමක් දිනා ගැනීමට විකුම් පෙරේරා සමත් විය.
