මිනුවන්ගොඩ ප්‍රාදේශීය සහා බල ප්‍රදේශයේ විගොඩ ග්‍රාමයේ ඉදිකර ඇති දෙමහල් බැංකු ගොඩනැඟිල්ල නිසි පරිදි නඩත්තු නොකිරීම හේතුවෙන් විනාශ වී යෑමේ අවදානමකට ලක්ව ඇත.
දිවංගත ඇමැතිවරයකු වූ රෙජී රණතුංග, හිටපු පළාත් සභා මන්ත්‍රී ලයනල් මාරසිංහ යන මහත්වරුන්ගේ ප්‍රතිපාදන මත ගම්වාසීන්ගේ ද ආධාර ඇතිව 1986 වර්ෂයේ මෙය ඉදිකර තිබේ. පසුව 1994 වර්ෂයේ මෙම ගොඩනැඟිල්ල එහි නිලධාරීන් කිහිපදෙනකු විසින් තෑගි ඔප්පුවකින් ප්‍රාදේශීය සභාවට පවරා දෙන ලද බව ගම්වාසීහු පවසති. 1983 / 84 / 85 / 86 වර්ෂවල දිවයිනේ ග්‍රාමෝදය මණ්ඩල අතර පැවැති තරගවලින් ප්‍රථම ස්ථානය දිනාගත් විගොඩ ග්‍රාමෝදය මණ්ඩලය එයින් ලැබූ මුදල් ත්‍යාගවලින් පර්චස් 40ක ඉඩමක් මිලට ගෙන මෙම ගොඩනැඟිල්ල ඉදි කර තිබිණි. දෙමහල් ගොඩනැඟිල්ලේ ඉහළ මාලයේ වහලය වැඩකටයුතු 1994 වර්ෂයේ අවසන් කිරීමෙන් පසු කිසිදු අලුත්වැඩියාවක් කර නොතිබීම නිසාත්, මෙය ඉදිකළ කොන්ත්‍රාත්කරුවන් බාල වර්ගයේ දැව යොදා සකස් කර ඇති නිසාත්, වහලය දිරාපත් වී කඩා වැටීමට ආසන්න බව ගම්වාසීහු පෙන්වා දෙති. ඔවුන් පවසන්නේ, ප්‍රධාන ගොඩනැඟිල්ලේ කණුවල කම්බි දිරා මලකඩ ද බැඳී ඇති බවයි.
ග්‍රාමීය බැංකුව, සමුපකාරය පවතින ස්ථානවල වහලය දිරාපත් වී පතුරු ගැලවී ඇත. ඉහළ මාලය විගොඩ සණස සමිතිය මඟින් වසර ගණනාවක්
ප්‍රයෝජනයට ගෙන විශාල හිඟ විදුලි බිලක් විදුලිබල මණ්ඩලයට ගෙවීමට ඉතිරි කිරීමෙන් විදුලිය විසන්ධි කළ අතර, පසුව විගොඩ ගම්වාසීන්
විසින් ප්‍රජා මණ්ඩලයක් ආරම්භ කරන ලදුව එහි එකතු වූ අරමුදල්වලින් විදුලි බිල ගෙවා විදුලිය යළි යථා තත්ත්වයට පත් කරගෙන තිබිණි. මීට වසර කිහිපයකට පෙර ප්‍රාදේශීය සභාව විසින් අවස්ථා කිහිපයකදී රුපියල් ලක්ෂ 30ක ප්‍රතිපාදන යොදවා ජල පහසුකම් සඳහා ළිඳක්, ගොඩනැඟිල්ල වටා අරක්ෂිත වැටක් ඉදි කිරීම මෙන්ම වැසිකිළි පහසුකම් සපයා දීම සිදු කර තිබේ. කෙසේ වෙතත් මෙතෙක් ගොඩනැඟිල්ල ඉදිරිපිට අරක්ෂිත ගේට්ටුවක් ඉදි කර නොමැත. වැසි දිනවලට ගොඩනැඟිල්ල ඉදිරිපිට එකම මඩ වගුරකි. පහත මාලයේ ග්‍රාමීය බැංකුව, සමුපකාරය, තැපැල් කාර්යාලය ආදිය ස්ථාපිත කර තිබුණත් එහි කිසිදු පොදු පහසුකමක් නැතැයි එහි සේවක පිරිස් පවසති.
ප්‍රදේශවාසීන් පවසන්නේ, ග්‍රාමීය බැංකුව, සමුපකාරය, තැපැල් කාර්යාලය ආදී මූල්‍ය ආයතන තිබුණද ආරක්ෂාව අතින් කිසිදු අයුරකින් සෑහීමකට පත් විය නොහැකි බවයි. ඒ අනුව, දිනෙන් දින පරිහානියට පත්වන විශාල අනතුරකට අත වනන විගොඩ බැංකු ගොඩනැඟිල්ල නිසි කළමනාකරණයක් යටතේ
කඩිනමින් අලුත්වැඩියා කර රැක ගැනීමට කටයුතු කිරීම වගකිවයුතු බලධාරින්ගේ වගකීමක් බවද ඔවුහු පෙන්වා දෙති.
