වසර 40ක් තිස්සේ බාඳුරාගොඩ ප්‍රදේශවාසීන්ට දහම් දැනුම බෙදූ ආනන්ද මහා විහාරාධිපති හිමියන්ට සහ වසර විසි පහක පමණ කාලයක් තිස්සේ ප්‍රදේශයේ ජනතාවට නොමිලේ මෙන්ම, සහන මුදලකට වෛද්‍ය ප්‍රතිකාර ලබා දීමේ නිරතව සිටින විශ්‍රාමික වෛද්‍යවරයකුට උපහාර දැක්වීමට බාඳුරාගොඩ ප්‍රදේශවාසීහු ඉකුත්දා කටයුතු කළහ.
ශ්‍රී ලංකා රාමඤ්ඤ මහා නිකායේ අඹේපුස්ස ප්‍රාදේශීය සංඝ සභාවේ උපාධ්‍යාය, හඟවත්ත විජය ශ්‍රී මුනින්දෝභාෂ පිරිවෙන් කෘත්‍යාධිකාරී, බාඳුරාගොඩ ශ්‍රී ආනන්ද මහා විහාරයේ විහාරාධිපති තවලම්පිටියේ ධම්මපාල හිමියන් හා ගල්ගාන, කුකුල්නාපේ පදිංචි විශ්‍රාමික වෛද්‍ය ජී.ආර්. සුනිල් සුසිල කුමාර මහතා මෙසේ ජනතා උපහාරයට පාත්‍ර වූහ. විහාරාධිපති හිමියන්ගේ උපහාර තිළිණය අඹේපුස්ස සේනානායක මුදලින්දාරාම පරිවේණාධිපති, මීගමුව විජයපාල මෙන්ඩිස් බෞද්ධ මධ්‍යස්ථානාධිපති, දෙල්වල අංගිරස නාහිමියන්ගේ අතින් පිරිනැමුණු අතර, වෛද්‍යවරයාගේ උපහාර තිළිණය මින්දික ගුණසේකර මහතා විසින් පිරිනමනු ලැබීය.
බාඳුරාගොඩ ග්‍රාම නිලධාරී ටී.එම්. දිලිප් නිශාන්ත මහතා ඇතුළු ප්‍රදේශවාසීන්ගේ මෙහෙයවීම මත මෙම උපහාර උත්සවය සංවිධානය කර තිබිණි. මැටියගනේ, කසුන්ගම ශ්‍රී සුගතඤාණ යෝගාශ්‍රමයේ විහාරාධිපති ඇන්නරුවේ රතනසිරි හිමියන්ගේ ධර්ම දේශනාවක් ද මීට සමගාමීව පැවැත්වීය.
