මහර, දළුපිටිය, කිරිබත්ගොඩ ශරීර සුවතා මංතීරුවේ සවිකර ඇති ඇතැම් විදුලි පහන් මේ වන විට අක්‍රිය වී ඇති බැවින් එම ස්ථානයට ශරීර සුවතා කටයුතු සිදු කිරීමට පාන්දර සහ සවස අඳුර පවතින වේලාවන්හි එන පිරිස කිඹුලන්ගෙන් අනතුරට ලක්වීමේ දැඩි අවදානමක් මතුව ඇති බව ප්‍රදේශවාසීහු පවසති.
මේ වන විට මෙම භූමිය අශ්‍රිතව විවිධ ප්‍රමාණයේ කිඹුලන් කිහිප දෙනකු ගැවසෙන බවට ප්‍රදේශයේ ජනතාව පවසති. මීට අමතරව මෙම ශරීර සුවතා මංතීරුවේ පොළවට සවි කර ඇති ඉන්ටර්ලොක් ගල් උඩට ඉස්සි ගැලවී ඇති බැවින් මෙම ස්ථානයේ ව්‍යායාම කටයුතුවලට පැමිණෙන ජනතාව විවිධ දුෂ්කරතාවලට මුහුණ පා සිටිති. මෙම ශරීර සුවතා මංතීරුවේ මාර්ගය දෙපස විවිධ ගස් වර්ග සැදී ඇති නිසා ඒවායේ මුල් දික්වී මෙම ඉන්ටර්ලොක් ගල් උඩට ඉස්සී ගැලවී ඇති බව එහි ගිය අපට දැක ගත හැකි විය.
මෙම ස්ථානයට පැමිණෙන ඇතැම් තරුණ තරුණියන් මෙහි අශෝභන ලෙස හැසිරිම හේතුවෙන් ද විවිධ ගැටලු මතුව තිබේ. මීට අමතරව මෙම භූමියට පැමිණෙන ජනතාව ඉවත දමන ප්ලාස්ටික් බෝතල්, කෝප්ප සහ ඉටි උර අසල ඇළ මාර්ගයට බැහැර කිරීම හේතුවෙන් පරිසරයට දැඩි බලපෑමක් සිදු වන බව ද ඔවුහු වැඩිදුරටත් පෙන්වා දෙති. එමෙන්ම මෙහි පැමිණෙන ජනතාවට සිය වැසිකිළි, කැසිකිළි අවශ්‍යතා සඳහා වැසිකිළි පද්ධතියක් ඉදි කර නොමැති වීමද ගැටලුවකි. මෙම ශරීර සුවතා මංතීරුව මහර සහ කැලණිය යන ප්‍රාදේශීය සභා බල ප්‍රදේශවල පිහිටා ඇති නමුත් මහර ප්‍රාදේශීය සභාව මඟින් සිවිල් අරක්ෂක බළකාය යොදවා නඩත්තු කිරීම් කටයුතු සිදු කරනු ලබයි. ඒ අනුව ජනතාව අදාළ අංශවලින් ඉල්ලා සිටින්නේ, මෙම ශරීර සුවතා මංතීරුවේ ඇති ගැටලු සහ අඩුපාඩු නිසි පරිදි පිළිසකර කර දෙන ලෙසයි.
