මෙවර සිංහල දෙමළ අලුත් අවුරුදු සමය වෙනුවෙන් රතිඤ්ඤා ඇතුළු ගිනිකෙළි භාණ්ඩ අලෙවිය විශාල ලෙස ඉහළ ගොස් ඇතැයි කිඹුලාපිටිය ගිනි කෙළි භාණ්ඩ නිෂ්පාදකයෝ කියති.
අප්‍රේල් මාසය ආරම්භ වීමත් සමඟම එම අ‍ෙලවිය සියයට 80ක් දක්වා පවතින බවත්, ඉදිරි දිනවලදී එම අ‍ෙලවිය ස්ථීර වශයෙන්ම සියයට 100ක් දක්වා වැඩිවන බවත් ඔවුහු කියා සිටිති. ඉකුත් වසරේ මැතිවරණ සහ නත්තල් සමය ඉලක්ක කර නිපදවූ රතිඤ්ඤා ඇතුළු ගිනිකෙළි භාණ්ඩ අලෙවිය නොසිතූ ලෙස බිඳ වැටීම හේතුවෙන් තමන් දැඩි ලෙස පීඩාවට පත්ව සිටි බව කී රතිඤ්ඤා නිෂ්පාදකයෝ, මේ වන විට රතිඤ්ඤා, අහස් කූරු, මල් වෙඩි සඳහා විශාල වශයෙන් ඉල්ලුමක් පවතින බවත්, ඒවා මිලදී ගැනීම සඳහා රට පුරා සිටින තොග සහ සිල්ලර වෙළෙඳුන් මෙන්ම අනෙකුත් පාරිභෝගික ජනතාව ද විශාල ලෙස පැමිණෙමින් සිටින බවත් කියා සිටියහ.
කෙසේ වෙතත් ඔවුන් පෙන්වා දෙන්නේ, ගිනිකෙළි භාණ්ඩ නිපදවීමට අවශ්‍ය වෙඩි බෙහෙත් ඇතුළු අමුද්‍රව්‍යවල මිල මේ වන විට ඉහළ ගොස් තිබුණද කිසිදු අයුරකින් තම නිෂ්පාදනවල මිල වැඩි කර නොමැති බවයි. ඩොලරයේ මිල අඩු වීමේ වාසිය තවම ගිනිකෙළි භාණ්ඩ නිෂ්පාදන කර්මාන්තයට ලැබී නැති බව පවසන එම කර්මාන්තකරුවෝ, ගිනි කෙළි භාණ්ඩ නිෂ්පාදනයට අවශ්‍යය වෙඩි බෙහෙත් ඇතුළු අමුද්‍රව්‍යවල මිල කර්මාන්තයට දරා ගත නොහැකි ලෙස ඉහළ ගොස් ඇති බවත්, මෙම කර්මාන්තය තවදුරටත් පවත්වා ගැනීමට අවශ්‍ය වෙඩි බෙහෙත් ඇතුළු අමුද්‍රව්‍යවල මිල අඩු කිරීමට රජය පියවර ගත යුතු බවත් පෙන්වා දුන්හ.
