Home » ඔලබොඩුව කන්ද හා අන්නාසි වත්තේ හොර අරක්කු පෙරූ දෙන්නෙක් මාට්ටු

ඔලබොඩුව කන්ද හා අන්නාසි වත්තේ හොර අරක්කු පෙරූ දෙන්නෙක් මාට්ටු

by mahesh
April 2, 2025 4:00 pm 0 comment

බණ්ඩාරගම සමූහ - බිමල් ජයසිංහ

ගෝනපොළ, ඔලබොඩුව කන්දේ ගන කැලෑවෙන් වටවූ ප්‍රදේශයක හා අන්නාසි වත්ත ප්‍රදේශයේ පවත්වාගෙන ගිය නීති විරෝධී මත්පැන් පෙරන ස්ථාන දෙකක් වටලා පුද්ගලයන් දෙදෙනකු නීති විරෝධි මත්පැන් සහ ගෝඩා සමඟ අත්අඩංගුවට ගත් බව මොරගහහේන පොලීසිය පැවසීය.

සැකකරුවන් දෙදෙනා සමඟ බැරල් 28ක අඩංගු ගෝඩා ලීටර් 55,000කට ආසන්න ප්‍රමාණයක්, නීති විරෝධි මත්පැන් මිලිලීටර් ලක්ෂයකට අධික ප්‍රමාණයක්, කිලෝ 50 සීනි මිටි 7ක්, මත්පැන් පෙරීමට යොදා ගන්නා දඟර, ගෑස් ළිප්, යීස්ට් ආදී උපකරණ රැසක් පොලිස් භාරයට ගෙන ඇත. පොලීසිය සඳහන් කළේ, එම දේපොළවල වටිනාකම රුපියල් ලක්ෂ 15කට ආසන්න බවයි. අත්අඩංගුවට ගත් එක් සැකකරුවෙක් ගල් මෝලක හිමිකරුවකු වන අතර, නීති විරෝධී ලෙස මාර්ගයෙන් විදුලිය ලබාගෙන මත්පැන් පෙරීම සිදු කර තිබූ බව පොලීසිය පැවසීය. ජලය ලබාගෙන ඇත්තේ ගල්වළකට පිරි වතුර වළකින් බවත්, මෝටර් යොදා ජලය ලබාගෙන ඇති බවත් පොලිස් විමර්ශනවලදී අනාවරණය වී ඇත. අනෙක් සැකකරු ඒ ආසන්නයේ කැලෑබද ප්‍රදේශයක මත්පැන් පෙරීම සිදු කර තිබිණි. අත්අඩංගුවට ගත් සැකකරුවන් වයස අවුරුදු 32ක් හා 47ක් වන ඔලබොඩුව සහ බණ්ඩාරගම පදිංචිකරුවන්ය. සැකකරුවන් හොරණ මහේස්ත්‍රාත් අධිකරණයට ඉදිරිපත් කිරීමට නියමිතය.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT