මහවැලි ව්‍යාපාරයේ අවසාන මහා ජලාශ දෙක වන මොරගහකන්ද සහ කළුගඟ ජලාශවලට තම ගම්බිම් සියල්ල කැප කළ නැවත පදිංචි කළ ලග්ගල ගම්මාන හතක ජනතාවට පොදු පහසුකම් මෙන්ම පානීය ජලය ඇතුළු අත්‍යාවශ්‍ය පහසුකම් නොමැතිවීම හේතුවෙන් දැඩි අසීරුතාවයකට පත්ව සිටින බව ඔවුහු පවසති.
ලග්ගල ප්‍රාදේශීය ලේකම් කොට්ඨාසයේ මහා ඝන වනාන්තරයක් හෙළි පෙහෙළි කොට මොරගහකන්ද සහ කළුගඟ ජලාශවලට ඉඩම් අත්පත්කර ගැනීමෙන් පසුව අවතැන් ජනතාව කොටස් වශයෙන් ශ්‍රී ලංකා මහවැලි අධිකාරිය මඟින් පදිංචිකොට දැනට වසර 13ට අධික කාලයක් ගෙවී ගොස් ඇතැයි ඔවුහු පවසති.
මෙතෙක් එම ජනතාවට පානීය ජලය ලබා නොදෙන බව ද සතියකට එක් අවස්ථාවක් බවුසර් රථයකින් ජලය ලබාදෙනතුරු සිටිය යුතු බවත් ලබා දෙන බවුසර් ජලයෙන් සියලු ජල අවශ්‍යතාවයන් සපුරා ගැනීමට නොහැකිවීමෙන් මෙම අවතැන් ජනතාව කබලෙන්ත ලිපට වැටී ඇතයි ඔවුහු පෙන්වා දෙති.
රටේ සංවර්ධනය උදෙසා සමුද්‍ර වැනි ජලාශ ඉදිකිරීම සඳහා තම දේපොළ සියල්ල දන් දී අවසානයේදී මහවැලි අධිකාරියෙන් වතුර ගෙනත් දෙනතුරු පිපාසයෙන් මෙන්ම අනෙකුත් සෑම ජල අවශ්‍යතාවයන්ම, අඩුම තරමේ වැසිකිළියකට ගොස් පස්සා පැත්ත සෝදා ගැනීමටවත් නොහැකිව ලතවෙන බව මොරගහකන්ද සහ කළුගඟ ජලාශවලට ඉඩම් ලබාදුන් ලග්ගල ප්‍රදේශයේ නැවත පදිංචි වූ ජනතාව හඬ නඟා පවසති.
ජනතාව වැඩිදුරටත් පවසා සිටින්නේ තම දුවා දරුවන්ට පාසැල් වෙත යාමට කිලෝමීටර් ගණනාවක් පයින් යා යුතුව තිබෙන බවයි. රෝහලක්, පාසලක් හෝ රජයේ කාර්යාලයක් ආදී කිසිඳු පහසුකමක් නොමැතිව ඉඩම් පවරාදුන්නද තමන් දැඩි දුෂ්කරතාවයකට පත්ව ඇත්තේ අඩුම තරමේ තරුණ තරුණියන්ට විවාහ මංගල්‍යයක් හෝ ආවා විවාහ පවා ගම්මානයේ සිදු නොවන තැනට පත්ව තිබෙන බැවිනි. ඊට ප්‍රධානතම හේතුව ගම්මානවල පවතින උග්‍ර ජල හිඟය සහ පොදු පහසුකම් නොමැතිවීමයි. ලබාදෙන ජලයද අපිරිසිදු බව මෙම ජනතාව පවසා සිටිති.
මොරගහකන්ද කළුගඟ ජලාශවලට යටවූ ගම්මානවල ජනතාව අඹන් ගඟ, හීන් ගඟ මෙන්ම දිය උල්පත් රැසකින් පෝෂණීයව ජීවත් වූ පිරිසක් බවත් එම ජනතාව ඉතා ස්වයංපෝෂිතව ජීවත් වෙද්දී රටේ සංවර්ධනය සඳහා මෙම කැපකිරීම සිදු කළ බවත් මේ වන විට ඔවුන්ට සිදුව ඇත්තේ දරුවන් සමඟ මොරගහකන්ද ජලාශයට පැන සිය දිවි තොර කර ගැනීම බව එහි ජනතාව හඬා වැටෙමින් අප සමඟ සඳහන් කරන්නට වූහ.
මහවැලි අධිකාරිය මඟින් මෙම ජනතාවට දින පහකට වරක් පානීය ජලය හා දින පහකට වරක් දියනෑමට, වැසිකිළි කැසිකිළි පහසුකම් සපයා ගැනීමට අවශ්‍ය ජලය බවුසර් රථ මඟින් ගෙනත් දෙන බව මහවැලි අධිකාරියේ නිලධාරීන් අප සමඟ සඳහන් කරන්නට විය.
ඔවුන් වැඩිදුරටත් පවසා සිටියේ මහවැලි අධිකාරිය ලබාදෙන නියෝග අනුව අති විශාල ප්‍රමාණයක ජනතාවකට ජලය බෙදීමේ කටයුත්ත සිදු කරද්දී ප්‍රමාදයන් සිදුවන බව එහි සේවකයන්ගෙන් විමසීමේදී අප සමඟ ඔවුන් සඳහන් කරන්නට විය.
