ඉංග්‍රීසි පාලකයන්ට එරෙහිව දියත් කළ 1818 සුප්‍රකට කැරැල්ලට නායකත්වය දුන් හඟුරන්කෙත ඩිංගිරාල රණවිරුවා සිහිපත් කිරීම සඳහා කුරුණෑගල ගැට්ටුවාන මහින්ද මහා විද්‍යාලය ඉදිරිපිට පිහිටුවන ලද රණවිරු ස්මාරකයේ තැන්පත් කර තිබූ සුදු සඳුන් දැවයෙන් නිර්මාණය කළ ඩිංගිරාල විරුවාගේ පිළිරුව එම ස්ථානයෙන් අතුරුදන්ව තිබේ.
දර්ශනීය ලෙස තනන ලද වීදුරු කුටියක් තුළ තබා තිබූ එම පිළිරුව මීට දින කිහිපයක සිට අතුරුදන්ව තිබෙන බව ප්‍රදේශවාසීහු පෙන්වා දෙන අතර ඔවුන් පවසන්නේ එය කවුරුන් හෝ සොරකම් කරන්නට ඇති බවයි.
“සත්කෝරළයේ රජු” ලෙසින් කිරුළු පැලැඳි ඩිංගිරාල රණවිරුවා ලක් ඉතිහාසයට එක් වන්නේ ඉංග්‍රීසි අධිරාජ්‍යවාදීන් අතින් ඔවුන්ගේ පාලන සමයේදී අතිශය කුරිරු ලෙස ඝාතනයට ලක්වූ එකම ශ්‍රී ලාංකිකයා ලෙසින්ය.
එසේම ඉංග්‍රීසින් විසින් පවත්වන ලද නඩු විභාගයකින් අනතුරුව ලබා දුන් නඩු තීන්දුවකට අනුව මරණ දඬුවමකට නියම කෙරුණු පළමු ශ්‍රී ලාංකිකයා වශයෙන්ද හඟුරන්කෙත ඩිංගිරාල රණවිරුවා අපේ ඉතිහාසයට එක් වෙයි.
බ්‍රිතාන්‍ය කිරීටයට එරෙහි වන්නන්ට ලැබෙන දඬුවම් මෙය බව සිංහලයින්ට ඒත්තු ගැන්වීම සඳහා ඩිංගිරාල රණවිරුවාට වෙඩි තබා මරා දමා ඔහුගේ සිරුර ඉතාම ම්ලේච්ඡ ආකාරයට කොටස් කීපයකට වෙන්කොට එම කොටස් නුග ගසක එල්ලා ජනතාවට ප්‍රදර්ශනය කළ බව ඉතිහාසයේ සඳහන් වේ. එසේ ඔහුගේ සිරුරු කොටස් එල්ලා ප්‍රදර්ශනය කරන ලද සුවිසල් නුග ගස කුරුණෑගල දඹුල්ල මාර්ගයේ පිහිටි ගැට්ටුවාන මහින්ද විද්‍යාලය ආසන්නයේ තිබූ බව පැවසේ. ඔහුගේ සිරුරේ කොටස් ජනතාව රැගෙන ගොස් ඒ ආසන්නයේම ස්ථානයක ඉතාම ගෞරවනීය ආකාරයට මිහිදන් කර තිබූ අතර මෑතක් වනතුරුම එම ස්ථානය හඳුනාගැනීම සඳහා සිහිවටන පුවරුවක්ද පිහිටුවා තිබුණි. කුරුණෑගල දඹුල්ල මාර්ගය සංවර්ධනය කිරීමේදී එම පුවරුව ගලවා තිබූ අතර පසුව එය ආරක්ෂාව සඳහා පැරැණි වයඹ පළාත් ආණ්ඩුකාර කාර්යාල භූමියේ ඇති කෞතුකාගාරය වෙත ගෙන යනු ලැබීය.
මේ කරුණු සැලකිල්ලට ගෙන ඩිංගිරාල රණවිරුවා සිහිපත් කරමින් ගෞරව දැක්වීම සඳහා කුරුණෑගල හිටපු නගරාධිපතිවරයෙකු වන ගාමිණී පෙරමුණගේ මහතා ඉදිරිපත් වී මහින්ද විද්‍යාලය ඉදිරිපිට පිළිරුවක් සහිත සිහිවටන කුටියක් පිහිටුවනු ලැබීය. සුදු සඳුන් දැවයෙන් නිමවන ලද අඩි එක හමාරක් පමණ උසැති ඩිංගිරාල විරුවාගේ පිළිරුව මේ ආකාරයට කිසිවෙකු විසින් සොරකම් කර ඇති බවට සැක කරන බව පෙරමුණගේ මහතා පැවසීය. හිටපු නගරාධිපතිවරයා පැවසුවේ මෙය සත්කෝරළයට අභිමානයක් ගෙන දුන් හඟුරන්කෙත ඩිංගිරාල රණවිරුවාට සිදු කළ අගෞරවයක් වන බවයි. ඇතැමුන් මෙම පිළිරුවට දේවත්වයෙන් සැලකූ බවද ඔහු පැවසීය.
