ආණමඩුව විවිධ සේවා සමුපකාර ප්‍රධාන කාර්යාලය කලින් පවත්වාගෙන ගිය පැරණි ගොඩනැඟිලි සහිත භූමියේ තිබූ කොහොඹ ගස් විශාල සංඛ්‍යාවක් කිසිදු නීත්‍යනුකූල නොවන අයුරින් කැපීම සම්බන්ධව ආණමඩුව ප්‍රාදේශීය ලේකම්වරිය විසින් ආණමඩුව පොලීසියට කළ පැමිණිල්ලකට විශේෂ පරීක්ෂණයක් පැවැත්වීමට කටයුතු කර ඇත. මෙලෙස පරීක්ෂණයක් ආරම්භ කර ඇත්තේ කිසිදු නිත්‍යානුකූල නොවන අයුරින් අදාළ භුමියේ පිහිටි දැවැන්ත කොහොඹ ගස් විශාල සංඛ්‍යාවක් කපා බිම හෙළා දැමීම සම්බන්ධයෙන් මතුවූ විරෝධතා හේතුවෙන් බව වාර්තා වෙයි. මෙම භූමිය ආණමඩුව ප්‍රාදේශීය ලේකම් සතු ඉඩමක් වන අතර එය 656 සී පෙරමාකුත්තුව ග්‍රාම නිලධාරී වසමට අයත් බව පවසයි. මෙම ස්ථානයේ වසර ගණනාවකට පෙර ආණමඩුව විවිධ සේවා සමුපකාරයෙ ප්‍රධාන කාර්යාලය පවත්වාගෙන ගොස් තිබූ නමුත් පසුව ප්‍රධාන කාර්යාලය ආණමඩුව නගරයට රැගෙන ඒමත් සමඟ පැරණි ගොඩනැඟිලි සහිත භූමිය වල්බිහිවී තිබුණි.
කෙසේ වෙතත් මෙම භූමියේ තිබූ විශාල හා කුඩා ප්‍රමාණයේ කොහොඹ ගස් රැසක් මෙලෙස කපා දමා ඇත්තේ නිසි අවසරයකින් තොරව බව කියයි. මේ හේතුවෙන් අදාළ සිද්ධිය දැන ගැනීමත් සමඟ අදාළ ඉඩමේ නීත්‍යනුකූල හිමිකාරිත්වය ආණමඩුව ප්‍රාදේශීය ලේකම් යටතේ තිබීම හේතුවෙන් ප්‍රාදේශීය ලේකම් සුභාෂීනී විජයතුංග මහත්මිය විසින් කඩිනම් පරීක්ෂණයක් පවත්වා තිබුණි. පසුව ඒ පිළිබඳව විධිමත් පරීක්ෂණයක් පවත්වන ලෙසට දන්වා ආණමඩුව පොලීසියට ලිපියක් යොමු කර තිබූ අතර අදාළ දැව තොගය දැව සංස්ථාවට නීත්‍යනුකූල පරිපාටිය යටතේ ලබාදීමට කටයුතු කර තිබුණි. අදාළ සිද්ධිය සම්බන්ධයෙන් චෝදනා එල්ලවන ආණමඩුව විවිධ සේවා සමුපකාර සමිතියේ සභාපති ජයරත්න මහතාගෙන් අප කළ විමසීමේදී ඔහු පවසා සිටියේ මෙම පැරණි ගොඩනැඟිලි සහිත ඉඩමේ එක් ගොඩනැඟිල්ලකට දිරා ගිය ගසක අත්තක් වැටීමට තිබූ අවදානම ගැන දැන ගැනීමත් සමඟ එම අත්ත ඉවත් කිරීමට පමණක් උපදෙස් ලබා දී තිබූ නමුත් එම කටයුත්ත භාරගත් තැනැත්තා විසින් ඉඩම තුළ සියලු ගස් කපා දමා ඇති බවට තමන්ද පසුව දැන ගත් බවයි.
