තඹුත්තේගම විශේෂිත ආර්ථික මධ්‍යස්ථානයේ වැසිකිළි, කැසිකිළි පද්ධතිය අබලන් වීම හේතුවෙන් දැඩි දුෂ්කරතාවයට පත්ව ඇතැයි ව්‍යාපාරිකයෝ සහ ගොවි ජනතාව පවසති. වැසිකිළි පද්ධතියේ අභ්‍යන්තර නළ පුපුරා උතුරා යෑම හේතුවෙන් ඒ අවට කලාපය දැඩි ලෙස අපවිත්‍ර වී මැසි, මඳුරුවන් පිරී ඇතැයි ඔවුහු පෙන්වා දෙති. මේ හේතුවෙන් දැඩි දුර්ගන්ධයක් ද හමන බව නගරවාසීහු පෙන්වා දෙති. වැසිකිළිය අවට ප්‍රදේශය දැඩි අප්‍රසන්න ස්වභාවයක් ගෙන ඇති බවත්, වැසි දිනවලදී වැසිකිළි උතුරා අයාලේ විසිරී යෑම හේතුවෙන් දැඩි සෞඛ්‍ය තර්ජනයක් ද එල්ල වී ඇති බව ඔවුහු පවසති.
ආර්ථික මධ්‍යස්ථානයේ වෙළෙඳ සංගමයේ සභාපති සුනිල් සෙනෙවිරත්න මහතා පැවසුවේ මෙවැනි අදහසකි.
“මෙතැනට දවසකට ගොවියෝ, ව්‍යාපාරිකයෝ තුන්හාරදාහක් රටේ හැමතැනකම ඉඳලා එනවා. ඉතින් ඒ අයට වැසිකිළි, කැසිකිළි පහසුකමක් තියෙන්ඩ ඕන. ආර්ථික මධ්‍යස්ථානේ පටන් ගත්ත කාලේ මීට අවුරුදු විස්සකට විතර කලින් හදපු වැසිකිළිය තමයි අද වෙනකොට මේ විදිහට අබලන් වෙලා තියෙන්නේ. අපි මේ ගැන වසන්ත සමරසිංහ ඇමැතිතුමාගෙන් ඉල්ලීමක් කරලා තියෙනවා. එතුමා මෙතැන අලුතෙන්ම වැසිකිළි පද්ධතියක් හදනවා කියලා පොරොන්දු වෙලා තියෙනවා. ඉතින් අපි ඒ ගැන බලාපොරොත්තුවෙන් ඉන්නේ.”
දෛනිකව ව්‍යාපාරිකයෝ සහ ගොවීහු දහස් ගණනක් ආර්ථික මධ්‍යස්ථානය වෙත පැමිණෙන බව නගරවාසීහු සඳහන් කරති. එළවළු, පලතුරු, කුලබඩු, සහල් ඇතුළු ආහාර ද්‍රව්‍ය අලෙවිය සහ මිලට ගැනීම එහි සිදු කෙරන බව ඔවුහු පවසති. අලුයම හතරේ සිට රාත්‍රී නවය පමණ වන තෙක් ආර්ථික මධ්‍යස්ථානය තුළ ගනුදෙනු සිදු කෙරෙන බව ව්‍යාපාරිකයෝ සඳහන් කරති. මෙම පසුබිම තුළ නිසි වැසිකිළි පද්ධතියක් නොවීම හේතුවෙන් සියල්ලෝ දැඩි දුෂ්කරතාවයට පත්ව සිටින බව ගොවීහු පවසති.
ව්‍යාපාරිකයකු වන ටී.එම්. සංජය කුමාර මහතා මෙසේ පැවසුවේය.
“ඇත්තම කිව්වොත් මේ වැසිකිළිය හින්දා වහින කාලෙට මෙතැන එකම අපායක් වෙනවා. උතුරනවා ඉවරයක් නෑ. මෙතැන මිනිස්සු කන, බොන එළවළු, පලතුරු වගේ දේවල් විකුණන තැනක්. දවසකට එළවළු, පලතුරු කිලෝ ලක්ෂ දෙකක් දෙකහමාරක් අරගෙන එන තැනක්. එහෙම බලන කොට මෙතැන අංක එකට තියෙන්ඩ ඕන දේ පිරිසිදුකම. අපි මේ ආණ්ඩුවට දොස් කියනවා නෙමෙයි, මේක දැන් අවුරුදු ගාණක් තිස්සේ තියෙන ප්‍රශ්නයක්. මේකට ඉක්මන් විසඳුමක් දෙන්ඩ කියලා අපි ඉල්ලන්නේ.”
අවස්ථා ගණනාවකදී මෙම වැසිකිළි, කැසිකිළි පද්ධතිය ප්‍රතිසංස්කරණය කරදෙන ලෙස ඉල්ලීම් කළද මෙතෙක් ඵලක් වී නොමැති බවත් මේ කෙරෙහි කඩිනම් අවධානය යොමුකර අවශ්‍ය පියවර ගන්නා ලෙස නගරවාසීහු වගකිවයුත්තන් වෙතින් ඉල්ලීමක් කරති. බී.ඒ. නුවන් ගොවිමහතා මෙසේ පවසා සිටියේය.
“මනුස්සයෙකුට හදිසියකට යන්ඩ වැසිකිළියක් නෑ කියන එක ලොකු ප්‍රශ්නයක්. ගොඩක් දුර ඉඳලා සමහරු මෙතැනට එන්නේ. ඒ මිනිස්සු මේ හින්දා අසරණ වෙනවා. ආර්ථික මධ්‍යස්ථානේ වටේට ජීවත් වෙන මිනිස්සුන්ටත් මේක ලොකු ප්‍රශ්නයක්. මෙහෙම ගියොත් මෙතැනට එන මිනිස්සුන්ට මොන අසනීපේ හැදෙයිද දන්නෑ.”
අප මේ පිළිබඳව තඹුත්තේගම ආර්ථික මධ්‍යස්ථානයේ කළමනාකරු අසංක ප්‍රදීප් කුමාර මහතා වෙතින් කළ විමසීමකදී ඔහු පැවසුවේ වෙළෙඳ අමාත්‍යාංශය මඟින් ආර්ථික මධ්‍යස්ථානය තුළ නව වැසිකිළි පද්ධතියක් ඉදිකිරීමට සැලසුම්කොට ඇති බවයි. ඉදිරියේ දී එහි ඉදිකිරීම් ආරම්භ කෙරෙනු ඇති බව හෙතෙම පැවසුවේය.
