මිනිරන් (ග්‍රැෆයිට්) අමුද්‍රව්‍යක් ලෙස අපනයනය කිරීම වෙනුවට අගය එකතු කොට ග්‍රැෆීන් නිෂ්පාදනය කිරීමට රාජ්‍ය පෞද්ගලික හවුල්කාරී ක්‍රමයට ආයෝජන කැඳවීමට කර්මාන්ත සේවා අමාත්‍ය සුනිල් හඳුන්නෙත්ති මහතා තීරණය කර ඇත.
දොඩංගස්ලන්ද කහටගහ මිනිරන් පතල නිරීක්ෂණයට ඊයේ (31) දින සහභාගි වූ අමාත්‍යවරයා ග්‍රැෆීන් නිෂ්පාදනයට අමතරව මෙම කර්මාන්තය හා සම්බන්ධව ආර්ථිකමය වශයෙන් වටිනාකම් සහිත පියවර ගණනාවක් ගැනීමට කටයුතු කරන බව සඳහන් කරයි.
මෙතෙක් පතල් කැණීමේදී අනුගමනය කළ ක්‍රමවලට එහා ගොස්, පතල් කැණීම පහසු කිරීමට, නිෂ්පාදන ධාරිතාව වැඩි කිරීමට හා සේවකයන්ගේ ආරක්ෂාව වෙනුවෙන් නවීන තාක්ෂයෙන් යුක්ත උපකරණ කැණීම් වෙනුවෙන් භාවිතා කිරීමත්, දේශීය, විදේශීය සංචාරකයින්ට විශේෂ අත්දැකීමක් ලෙස කැණීම් කටයුතු නැරඹීමට හැකිවන ආකාරයට අවශ්‍ය පහසුකම් සැපයීමටත්, ඊට අමතරව
නිවාඩු නිකේතන ඉදිකිරීම හා පාසල් හා විශ්වවිද්‍යාල සිසුන්ට අධ්‍යාපනික වටිනාකමක් ඇති නැරඹුම් මධ්‍යස්ථානයක් ලෙස සකස් කිරීමටත්, කටයුතු කරන බව ඔහු සඳහන් කරයි.
දැනට කහටගහ මිනිරන් පතලෙහි සේවය කරන සේවකයින්ට දැනට තිබෙන වැටුප් ගැටලු විසඳීම හා ඔවුන්ගේ වෘත්තීය වටපිටාව දියුණු කිරීම වෙනුවෙන් අවශ්‍ය තීරණ ගැනීමත් මේ නිරීක්ෂණයෙන් පසුව සිදු කරන බව අමාත්‍යවරයා සඳහන් කරයි.
ඔවුන්ට තිබෙන ගැටලු සම්බන්ධව මිනිරන් පතලෙහි සේවය කරන සේවකයින් සමඟද සාකච්ඡාවක් පැවැති අතර එම අවස්ථාවට කාන්තා හා ළමා කටයුතු නියෝජ්‍ය අමාත්‍ය, කුරුණෑගල දිස්ත්‍රික් පාර්ලිමේන්තු මන්ත්‍රී වෛද්‍ය නාමල් සුදර්ශන මහතා, කහටගහ ග්‍රැෆයිට් ලංකා ආයතනයේ සභාපති පී.වී.ඒ. හේමලාල් මහතා සහ ආයතයේ නිලධාරීන් මෙන්ම සේවකයින් එක්වූහ.
