නුවරඑළිය මහනගර සභාව විසින් වාර්ෂිකව පවත්වනු ලබන 2025 වසරේ නුවරඑළිය වසන්ත උදානයේ සමාරම්භක උත්සවය ඊයේ (01) නුවරඑළිය මහජන වෙළෙඳපොළ ඉදිරිපිට ප්‍රධාන මාර්ගයේ දී පවත්වනු ලැබීය.
මධ්‍යම පළාත් ප්‍රධාන ලේකම් ජී.එච්.එම්. අජිත් ප්‍රේමසිංහ මහතාගේ ප්‍රධානත්වයෙන් පැවති වසන්ත උදානය සමාරම්භක උත්සවය නුවරඑළිය මහනගර සභාවේ නාගරික කොමසාරිස් විජේකෝන් බණ්ඩාර මහතා විසින් සංවිධානය කර තිබුණි.
පාසල් ළමුන් සහ රාජ්‍ය සහ පෞද්ගලික අංශයේ සහභාගිත්වයෙන් සංස්කෘතික සහ තූර්යවාදක පෙළපාළි ගණනාවකින් මෙම සමාරම්භක උත්සවය වර්ණවත් විය.
ඊයේ (01) සිට මෙ මස (30) දින දක්වා නුවරඑළිය වසන්ත උදානය පැවැත්වෙන අතර, එම කාලය තුළ නුවරඑළිය නගර සීමාව කේන්ද්‍ර කර ගනිමින් සැණකෙළි, සංගීත සංදර්ශන, තුරඟ තරග, මෝටර් රථ සහ යතුරුපැදි ධාවන තරග, මල් ප්‍රදර්ශන ඇතුළු තවත් ඉසව් ගණනාවක් පැවැත්වීමට නුවරඑළිය මහනගර සභාව විසින් පියවර ගෙන ඇත.
නුවරඑළිය වසන්ත උදානයට පැමිණෙන සංචාරකයන්ගේ ආරක්ෂාව උදෙසා විශේෂ ආරක්ෂිත වැඩපිළිවෙළක් සහ රථවාහන සැලැස්මක් දියත් කර ඇත.
මෙම සමාරම්භක උත්සවයට මධ්‍යම පළාත් ආණ්ඩුකාර ලේකම් මංජුලා මඩහාපොල මහත්මිය, නුවරඑළිය දිස්ත්‍රික් ලේකම් තුෂාරි තෙන්නකෝන් මහත්මිය ඇතුළු රාජ්‍ය සහ පෞද්ගලික අංශයේ නිලධාරීහු රැසක් සහභාගි වූහ.
