වරාපිටිය හා වෙහෙරගල කෘෂිකර්ම පර්යේෂණ නිෂ්පාදන සහකාර නිලධාරිවරයා, ගොවි සංවිධානයේ හිටපු භාණ්ඩාගාරික හා සභාපතිවරයා සමඟ එක්ව 2022 – 23 මහ කන්නයේ ගොවීන්ට ලබාදීමට නියමිතව තිබූ පොහොර මිටි පනහක් වංචා කිරීමේ සිද්ධිය පිළිබඳ වහාම පරීක්ෂණයක් සිදු කරන ලෙස ඉල්ලා දිඹුලාගල කජුවත්ත අරුණලු ගොවි සංවිධානයේ සභාපතිවරයා අල්ලස් හෝ දූෂණ විමර්ශන කොමිසමට ඊයේ (01) ලිඛිතව පැමිණිල්ලක් සිදු කර තිබේ.
දිඹුලාගල, කජුවත්ත අරුණලු ගොවි සංවිධානයේ සභාපති කේ.ජී. කුෂාන් උමයංග මහතා විසින් මෙම ලිපිය යොමු කොට ඇති අතර, තමන් මේ පිළිබඳ ප්‍රදේශයේ ගොවිජන සේවා බලධාරීන් දැනුවත් කළ ද ඊට කිසිදු විසඳුමක් නොමැති බවත්, අදාළ නිලධාරීන්ගේ වංචාව වසන් කිරීමට උත්සාහ දරන බවද ඒ මහතා සඳහන් කළේය.
රජයේ පොහොර සහනාධාර වැඩපිළිවෙළට අනුව ගොවියකුට, රුපියල් දහදාහකට යූරියා පොහොර මිටි හතරක් ලබා දුන් අතර, ඉන් ගොවියකුට පොහොර මිටියක් පමණක් නිකුත් කර, පොහොර මිටි හතරම ලබාදුන් බවට ව්‍යාජ ලේඛන සකසා වංචාසහගතව ඉතිරි කරගත් පොහොර මිටි පනහක පමණ ප්‍රමාණයක් රුපියල් 25,000ත් 30,000ත් අතර මිලකට අදාළ කෘෂිකර්ම පර්යේෂණ නිෂ්පාදන සහකාරවරයා සහ ගොවි සංවිධානයේ හිටපු භාණ්ඩාගාරික සහ සභාපතිවරයා විසින් විකුණා ඇති බව අරුණලු ගොවි සංවිධානයේ සභාපති කේ.ජී. කුෂාන් උමයංග මහතා චෝදනා කරයි.
මෙම යූරියා පොහොර වංචාවේ සියලු සාක්ෂි සහ හඬපට තමා සතුව තිබෙන බවත්, මේ පිළිබඳව පොලොන්නරුව ගොවිජන සේවා සහකාර කොමසාරිස්වරයාට මෙන්ම අරලගංවිල ගොවිජන සේවා ප්‍රාදේශීය කළමනාකාරතුමියට ලිඛිතව දැනුවත් කළ බවද ඒ මහතා පවසා සිටියේය.
එම චෝදනාව සම්බන්ධයෙන් අප එම ගොවි සංවිධානයේ හිටපු භාණ්ඩාගාරික නුවන් අලගේවත්ත මහතාගෙන් දුරකතනයෙන් කළ විමසීමේදී ඒ මහතා සඳහන් කළේ තමා ඒ පිළිබඳ කිසිවක් නොදන්නා බවයි.
අනතුරුව මෙම චෝදනාව එල්ල වන වෙහෙරගල, වරාපිටිය වසම් භාර කෘෂිකර්ම පර්යේෂණ නිෂ්පාදන සහකාර නිලධාරි, බී.එම්.ඒ.පී. බණ්ඩාරනායක මහතාගෙන් දුරකතනයෙන් කළ විමසීමේ දී ඒ මහතා මෙලෙස පවසා සිටියේය.
‘රුපියල් දහදාහට පොහොර දෙන කාලේ ගොවියන්ට එකවරම සල්ලි දීමට නොහැකි වුණා. නිර්දේශ වුණ පොහොර ගෙනාවේ වට කිහිපයකදී, අපි පොහොර දුන්නේ ගොවි සංවිධාන හරහා, එයාල තමයි බෙදුවේ, අපි අධීක්ෂණය කරාට හැම වෙලාවේම යන්න බැරි වුණා. මේ පිළිබඳව අපේ ඩී.ඕ. මිස් පරීක්ෂණයක් කරනවා.’
