“අපේ රටේ ගමේ ආණ්ඩුව කියන එක දුර්වලයි. ඒක අපි ශක්තිමත් කරමු. එහෙම නොකර අපි බලාපොරොත්තු වන සංවර්ධනය සිදු වෙන්නේ නෑ. එම නිසා ප්‍රාදේශීය සභා ජයග්‍රහණය කරමු.” යැයි කෘෂිකර්ම, පශු සම්පත්,ඉඩම් හා වාර්මාර්ග ඇමැති කේ. ඩී. ලාල්කාන්ත මහතා පවසයි.
ඇමැතිවරයා මේ බව කියා සිටියේ මෙවර පළාත් පාලන මැතිවරණයට ජාතික ජන බලවේගයෙන් ඉදිරිපත් වන අපේක්ෂකයන් දැනුම්වත් කිරීමට කටුගස්තොට ප්‍රදේශයේ පෙරේදා (31) පැවති ජන හමුවකට එක් වෙමිනි.
එහිදී වැඩිදුරටත් අදහස් දැක්වු ඇමැතිවරයා මෙසේ ද කීවේය.
“අද ඇති වෙලා තියෙන හිඩැස තමයි, ගමේ ආණ්ඩුවේ නියෝජිතයන් ප්‍රාදේශීය සංවර්ධන කමිටුවේ නොමැතිකම. එම නිසා ප්‍රාදේශීය සංවර්ධන කමිටුව අංගවිකලයි. ඒක අංගවිකල කළේ රනිල් වික්‍රමසිංහ. ප්‍රාදේශීය සභා මැතිවරණය 2023 මාර්තුවල පවත්වන්න තිබුණේ. ඒ මැතිවරණය තිබ්බේ නෑ. අපි මැයි මාසෙ 06 වැනිදා මාලිමාවට කතිරේ ගහලා ප්‍රාදේශීය සභාව පිහිටුවා ගත්තාම තමයි ප්‍රාදේශීය සභාවේ අය ප්‍රාදේශීය සංවර්ධන කමිටුවට එකතු වෙන්නේ. රට පුරා ජාතික වශයෙන් තිබෙන සංවර්ධනයේ බිමේ කොටස අංගවිකල වෙලා තියෙන්නේ. ඒක සම්පූර්ණ කරන්න වෙන්නේ එළැඹෙන මැයි මාසෙ 06 වැනිදායින් පස්සේ. අපි ප්‍රාදේශීය සභාව පිහිටුවනවා. ඒක තවත් ආයතනයක්. ඒ ආයතනයෙන් ආදායම් උපයනවා. එම ආදායම වියදම් කරනවා ගමේ ව්‍යාපෘතිවලට. ඒ ආයතන දැන් නෑ. ඒ ආයතනවල නිලධාරීන් හිටියාට දේශපාලන නායකත්වයක් නෑ.ප්‍රාදේශීය සභාව දැන් දුවන්නේ තනිකරම නිලධාරීන්ගෙන්. එහෙම වුණාම හරි මතය එන්නේ නෑ. ඒවා කඩා වැටිලා. 06 වැනිදා මාලිමාවට ඡන්දය දීලා ප්‍රාදේශීය සභාවට සභාපතිවරයෙක් සහ සභාව හදා ගත්තාම ඒකත් සම්පූර්ණයි. මේවා ඉස්සර තිබුණා. නමුත් ඒවත් හොර ගුහා. ප්‍රාදේශීය සභාව අනිත් ඒවා වගේම හොර ගුහාවක් වෙලා තිබුණා. එම නිසා හොරකම,වංචාව, දූෂණය, නාස්තිය ආණ්ඩුවේ නෑ වගේම ප්‍රාදේශීය සභාවත් හදාගන්න ඕන එහෙම නොවන විදියට. එවිට සියල්ල සම්පූර්ණයි. මැයි 06 වැනිදා පැවත්වෙන මැතිවරණය ජාතික මැතිවරණය වගේම ගමට අදාළව බැලුවාම දැවැන්ත වටිනාකමක් තියෙන මැතිවරණයක්. දැනට දුර්වලම ආයතනයක් තමයි ප්‍රාදේශීය සභාව. ගම්මාන ඇතුළේ තියෙන පාරවල් තමයි හදලා නැත්තේ. සෑම පළාතකම ඒ වගේ. ඒ කියන්නේ ප්‍රාදේශීය සභාවේ වැඩේ කෙරිලා නෑ. ප්‍රාදේශීය සභාවේ මොන්ටිසෝරිය තමයි දුප්පත්ම මොන්ටිසෝරිය. මෙරට ගමේ ආණ්ඩුව කියන එක දුර්වලයි. ඒක අපි ශක්තිමත් කරමු. එහෙම නොකර අපි බලාපොරොත්තු වන සංවර්ධනය සිදු වෙන්නේ නෑ.”
