පසුගිය මහමැතිවරණයේදී සිලින්ඩරය ගත් ඡන්ද සංඛ්‍යාවට වඩා සියයට විස්සක් මෙවර මැතිවරණයේදී ගැනීම එක්සත් ජාතික පක්ෂයේ ඉලක්කය බව එහි උප සභාපති නවීන් දිසානායක මහතා පැවැසීය.
ඒ මහතා මේ බව පැවැසුවේ මාධ්‍ය වෙත අදහස් දක්වමිනි.
එහිදී වැඩිදුරටත් අදහස් දැක්වූ ඒ මහතා මෙසේ ද කීවේය.
“විපක්ෂය කණ්ඩායම් හතරකට පහකට බෙදිලා. ආණ්ඩුවේ එසේ බෙදීමක් නෑ. ඒ සියලු දෙයින් වාසිය අත්වන්නේ ආණ්ඩුවටයි.
මෙවර මැතිවරණය සඳහා සජබය, පුටුව, නාමල් රාජපක්ෂ, දිලිත් ජයවීරගේ වෙන වෙනම කණ්ඩායම් ලෙස ඉදිරිපත් වෙනවා. එයින් විපක්ෂයට විශාල ජයග්‍රහණයක් ගැනීමට බෑ. පසුගිය මහමැතිවරණයේදී සජබය ගත්තේ ඡන්ද සියයට 17ක් පමණයි. පසුගියදා පැවැත්වූ විපක්ෂයේ කණ්ඩායම් අතර සාකච්ඡාවලදී මේ සම්බන්ධයෙන් සලකා බැලුණා. විපක්ෂයේ කණ්ඩායම්වලට එකතු වීමට අමාරු නම් ආණ්ඩුව පරද්දන්නත් අමාරුයි. මහමැතිවරණයේදී ගෑස් සිලින්ඩරය ගත් ඡන්ද ලක්ෂ පහට වඩා සියයට විස්සක පමණ ඡන්ද සංඛ්‍යාවක් ගැනීමට එජාපය ඉලක්ක කරනවා. නව මාර්ගයක ගමන් කරන එජාපය සමඟ හිට ගැනීමට පිරිසක් අවශ්‍යයි. ඒ පිරිස ශුද්ධ එජාප පාක්ෂිකයන්. පක්ෂයේ මතවාදය ඉදිරියට ගෙන යෑමට එවැනි පිරිසක් අවශ්‍යයි.
මහජනතාව තුළ ආණ්ඩුව සම්බන්ධයෙන් යම්කිසි කලකිරීමක් තිබෙනවා. එය වර්ධනය කරලීමට ගතයුතු උපායමාර්ග සාකච්ඡා කළ යුතුයි.”
