ආණ්ඩුවේ ක්‍රියා කලාපය පිළිබඳව ජනතාව දැනුම්වත් කිරීමට පුර්ණ ලෙස කටයුතු කරන්නැයි සිය පක්ෂයේ අපේක්ෂකයන් දැනුම්වත් කර ඇති බව සමගි ජන බලවේගයේ ජාතික සංවිධායක තිස්ස අත්තනායක මහතා ප්‍රකාශ කළේය.
ඒ මහතා මේ බව පැවැසුවේ සමගි ජන බලවේගය ප්‍රධාන කාර්යාලයේ ඊයේ (01) පැවැති මාධ්‍ය හමුවට සහභාගි වෙමිණි.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“සමගි ජන බලවේගයේ ප්‍රචාරක කටයුතු, ඡන්ද දායකයන් දැනුම්වත් කිරීම සහ අනෙකුත් වැඩසටහන් මැතිවරණ නීති උල්ලංඝනය නොවන පරිදි සිදු කිරීමට සැලසුම් කර තිබෙනවා. සමඟි ජන බලවේගයේ මහා සමුළුව ලබන 03 වැනිදා පස්වරු 1.00ට හයිඩ්පාක් පිටියේදී ආරම්භ කරන්න සුදානම් කර තිබෙනවා.
පළාත් පාලන මැතිවරණයේ ප්‍රචාරක කටයුතු මේ වන විට ආරම්භ කර තිබෙනවා. නාම යෝජනාවලින් පසු දිස්ත්‍රික්ක මට්ටමින් අපේක්ෂකයන් මුණ ගැහෙන්න සමගි ජන බලවේගය කටයුතු කළා. ඒ අනුව පක්ෂ නායක සජිත් ප්‍රේමදාස මහතා සහ සමගි ජන බලවේගය කණ්ඩායම දිස්ත්‍රික්ක 18ක අපේක්ෂකයන් මුණ ගැහුණා. එහිදී මැතිවරණ ව්‍යාපාරය සංවිධානය කරන ආකාරයත්, මැතිවරණ ව්‍යාපාරය දිරිමත් කරන වැඩපිළිවෙළකුත් අපි ආරම්භ කළා. මැතිවරණ නීතිරීති අකුරටම ආරක්ෂා කරන්න කියලා අපි සියලුම අපේක්ෂකයන්ගෙන් ඉල්ලා තිබෙනවා. ආණ්ඩුවේ ක්‍රියා කලාපය පිළිබඳව ජනතාව දැනුම්වත් කිරීමට පුර්ණ ලෙස කටයුතු කරන්නැයි අපි අපේක්ෂකයන් දැනුම්වත් කර තිබෙනවා.”
