පොරොන්දු දේශපාලනයෙන් බැටකෑ ජනතාව මෙවර ප්‍රාදේශීය සභා මැතිවරණයේදීත් පවතින රජයට ගමේ බලය දෙන බව විශ්වාස යැයි හිටපු යුද හමුදාපති, ෆීල්ඩ් මාර්ෂල් සරත් ෆොන්සේකා මහතා පැවසීය.
ඒ මහතා මේ බව පැවැසුවේ කඩවත ඉන්ද්‍රා හෝටලයේ ඉකුත්දා (30) පැවැති ජන හමුවකදීය.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“පාතාලයට හිස ඔසවන්න ඉඩ දුන්නොත් රට අස්ථාවර වෙනවා. තිස් වසරක යුද්ධය මෙහෙයවූවා සේ පාතාලයත් නිසි ක්‍ර‍මවේදයකට අනුව මර්දනය කළ යුතුයි. රටේ ජාතික ආරක්ෂාව කඩ වැටිලා කියලා විවිධ අන්දමින් විවිධ වාසි බලාගෙන විරුද්ධ කණ්ඩායම් මත පළ කළත් රට තුළ එවැන්නක් සිදුවී නෑ. ආයුධ සන්නද්ධ ත්‍රිවිධ හමුදාව යොදවා ආරක්ෂාව සැපයීමට තරම් අනතුරුදායක තත්ත්වයකට මේ රට තවම පත්ව නෑ. නමුත් සිවිල් සමාජයේ සමහර පිරිසක් ගිනි අවි භාවිත කරන්න පටන් අරන්. ඒ නිසා රටේ මහජනතාවගේ ආරක්ෂාව පිළිබඳව දැඩි අවධානයක් යොමු කළ යුතු කාලයක් අපි ගතකරමින් ඉන්නවා. ඒක රටේ ජාතික ආරක්ෂාව කඩා වැටීම නිසා ඇති වූ දෙයක් නම් නෙවේ. පෞද්ගලික කෝන්‍තරවලට අසල්වැසියාට කොකා ගැස්සීම ජාතික ආරක්ෂාවට තර්ජනයක් වෙලා කියන ගිණුමට බැර කරන්න බෑ.
ටී 56 වගේ ගිනි අවි සිවිල් සමාජය ඇතුළෙ භාවිත වෙනවා. පෞද්ගලික ආරවුල්, මත්ද්‍රව්‍ය ජාවාරම, නීති විරෝධී මත්පැන් පෙරීම, ණය ගනුදෙනු, පැරණි ආරවුල්, අනියම් සබඳතා, ප්‍රේම සම්බන්ධතා මේ වගේ සුළු සිදුවීම්වලට වෙඩි උණ්ඩයෙන් පිළිතුරු දෙනවා. ලෙයට ලෙයින් පළි ගන්නවා. මිනිස් ඝාතන මුදලට සහ කොන්ත්‍රාත් ක්‍රමයට සිදු කරනවා. ඒ හැරුණුවිට රටේ ජාතික ආරක්ෂාවට තර්ජනයක් නෑ. මේක පාතාල කල්ලි අතරින් එන නියෝග මත සිද්ධ වෙන්නේ. ඒ නිසා රට ගිලගෙන තියෙන මත්ද්‍රව්‍ය ජාවාරමත්, ගිනිඅවි භාවිතයත් ගැන පාලකයන් විශේෂ අවධානයක් යොමු කළ යුතුයි. මෙය පාලනය කිරීමට මනා දැක්මක්, ශූර ක්‍රමවේදයක්, හොඳ සැලැස්මක් අවශ්‍යයි. රටක නීතිය හරියට ක්‍රියාත්මක කරන්න පොලීසිය නිසි පරිදි ක්‍රියාත්මක විය යුතුයි. දවසක් හැර දවසක් මිනිස් ඝාතනයක් රටේ කොතැනහරි සිදු වෙනවා. මෙය අනිවාර්යයෙන්ම මර්දනය කළ යුතුයි.
රටේ නීතිය ක්‍රියාත්මක කරන්න නීත්‍යානුකූලව නිලධාරීන් පත්කර තියෙන කොට නීතිය අවනීතිය කරන්න ඉඩදී පිටරට ඉඳන් එක කෝල් එකෙන් මිනිසුන් ඝාතනය කරන මේ රැල්ල වහාම නවතා දැමීමට පියවර ගත යුතුයි. මේක බැරි දෙයක් නෙවේ.කුමන දේශපාලන පක්ෂයක් හෝ කණ්ඩායමක් මේ මිනිස් ඝාතන පිටුපස ඉන්නවා නම් තරාතිරම නොබලා ඔවුන් එක මිටට නීතිය හමුවට ගෙනා යුතුයි. එදා මෙදාතුර මම තනි දේශපාලන මතයක් දරමින් තනි ගමනක් ගිය කෙනෙක්. තවත් කෙනකු යටතේ උපදේශකයෙක් වෙලා ආණ්ඩුවෙන් වැටුප්, යාන වාහන ගෙන වැඩ කරන්න නම් මගේ සූදානමක් නෑ. මට වගකීමක් පැවරුවොත් එය මම හරියටම ඉටු කරනවා. නමුත් සිවිල් පුරවැසියකු ලෙස මට රටේ ආරක්ෂාව පිළිබඳව වගකීමක් භාර දුන්නොත් තිස්දහසක ත්‍රස්තවාදී හමුදාව මෙල්ල කළා වගේ දහක් එක්දාස් පන්සීයක් ඉන්න පාතාලය මර්දනය කරන එක වැඩක් නෙවේ. මම ආණ්ඩුවට කඩේ යනවා නෙවේ. නමුත් මේ පළාත් පාලන මැතිවරණ ජයග්‍රහණයත් වත්මන් රජයටම පැවරුවොත් රටේ වෙනසක් සිදු වේවි. නැවත වාරයක් ගමේ බලය හොරුන්ට, දූෂිතයන්ට දෙනවාට වඩා ඒක හොඳයි කියලා මම විශ්වාස කරනවා.”
