ශ්‍රී ලංකාව තව අවුරුදු පහකින් හෝ දහයකින් හෝ හැදෙයි කියා තවමත් නොපෙනෙන බව සර්වජන බලය නායක, පාර්ලිමේන්තු මන්ත්‍රී දිලිත් ජයවීර මහතා පැවැසීය.
මන්ත්‍රීවරයා මේ බව පැවසුවේ සර්වජන බලය පක්ෂයෙන් පළාත් පාලන මැතිවරණට ඉදිරිපත් වී සිටින අපේක්ෂකයන් දිරි ගැන්වීම වෙනුවෙන් රත්මලානේ පෙරේදා (31) පැවැති ජන හමුවක් අමතමිනි.
එහිදී වැඩිදුරටත් අදහස් දැක්වූ මන්ත්‍රීවරයා මෙලෙස ද කීවේය.
“අපි මධ්‍ය කාලීන වැඩපිළිවෙළක ඉන්නේ. දීර්ඝ කාලීන වැඩපිළිවෙළක් ද අප සතුව තියෙනවා. අපේ රටට ව්‍යවසායකයන් අවශ්‍යයි. නිර්මාණශීලීව රට ගොඩනැඟිය හැකි පිරිසක් අවශ්‍යයි. එය අප මේ වන විට සිදු කරමින් ඉන්නවා. මෙවර පළාත් පාලන මැතිවරණයේදී අපට විශාල ජනතා ප්‍රසාදයක් දිනාගත හැකියි. ගම හදලා රට හදන තැනට යන්න අපට හැකියාව ඇති බවට විශ්වාසයක් තිබෙනවා. එම නිසා මෙවර පළාත් පාලන මැතිවරණයේදී සර්වජන බලය පක්ෂයට වැඩි බලයක් දෙන්න කියලා ජනතාවගෙන් ඉල්ලා සිටිනවා.”
