මෙවර පළාත් පාලන මැතිවරණයේදී ගමින් ගමට ගොස් ජනතාවගේ ඇත්ත ප්‍රශ්න සම්බන්ධයෙන් විශේෂ අවධානය යොමු කරන බව ශ්‍රී ලංකා පොදුජන පෙරමුණේ මහ ලේකම්, හිටපු පාර්ලිමේන්තු මන්ත්‍රී, නීතිඥ සාගර කාරියවසම් මහතා ප්‍රකාශ කළේය.
ඒ මහතා මේ බව පැවැසුවේ ශ්‍රී ලංකා පොදුජන පෙරමුණු පක්ෂ මූලස්ථානයේ පැවැති ප්‍රවෘත්ති සාකච්ඡාවකට එක්වෙමිනි.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“මෙවර මැතිවරණයේදී රටේ ජනතාව තෙවැනි වරටත් රැවටෙනවාද යන්න තීරණය කළ යුතුයි. එළැඹෙන පළාත් පාලන මැතිවරණය සුවිශේෂී තත්ත්වයක්. ගමේ සංවර්ධනය වෙනුවෙන් වැඩි අවධානයක් යොමු කළ යුතුයි. ප්‍රජාතන්ත්‍රවාදී රටක ජනතාවගේ නිදහස වැදගත්ම සාධකයක්. නිදහසේ තමන්ට අවශ්‍ය දේ කිරීමට පුළුවන් විය යුතුයි. ඒ සහතිකය ක්‍රියාත්මක වෙන්නේ එක් ප්‍රධාන කරුණක් මතයි. නීතියේ ආධිපත්‍ය කියන කාරණය මත එය තීරණය වෙනවා. රටක නීතියේ ආධිපත්‍ය තිබෙනවා නම් ජනතාවගේ අයිතීන් සහ නිදහස භුක්ති විඳින්න පුළුවන් වෙනවා. එය නැති කිරීමෙන් ජනතාවගේ අයිතීන් නැතිවී යනවා. රටක නීතියේ ආධිපත්‍ය සුරකින්න ප්‍රධාන ආයතන තුනක් කටයුතු කරනවා. ඒ අධිකරණය, නීතිපති දෙපාර්තමේන්තුව සහ පොලීසිය. ඒ ආයතන රට තුළ නීතියේ ආධිපත්‍ය රැක ගැනීමට අවශ්‍ය ක්‍රියාමාර්ග ගන්නවා. මේ වන විට ශ්‍රී ලංකා පොලීසිය අභිමානයෙන් තොර තැනක් බවට පත්කර තිබෙනවා.
පොලීසියට දේශපාලන අතපෙවීම් කරනවා. ස්වාධීන පොලිස් කොමිසම සම්බන්ධයෙන් ද විශාල වශයෙන් චෝදනා එල්ල වෙනවා. අනවශ්‍ය විදියට කරන දේශපාලන බලපෑම් නිසා පොලීසියේ අභිමානය නැතිවී යනවා. පොලීසියේ නියම කාර්යභාරය ඉටු කිරීමට නොහැකි තත්ත්වයක් උද්ගත කරමින් ඉන්නවා. නීතිපති දෙපාර්තමේන්තුවට බලපෑම් කිරීම පසුගිය කාලයේ දැක්කා. මේ ආණ්ඩුව නීතිපතිවරයාගේ නඩු පැවරීමේ අයිතිය පවා දේශපාලනීකරණය වූ ආයතනයකට පැවරීමට පිඹුරුපත් සකස් කරනවා දැක්කා. ඒ අනුව නීතිපති දෙපාර්තමේන්තුවටත් මේ වන විට බලපෑම් කරනවා. අධිකරණයත් වැදගත් වෙනවා. නීතියේ ආධිපත්‍යය නැති රටකට විදෙස් ආයෝජකයන් කිසිදා එන්නේ නෑ.”
හිටපු මන්ත්‍රී සංජීව එදිරිමාන්න මහතා
“මියන්මාරයේ භූ කම්පනයෙන් පසුව ලංකාවට යුතුකමක් තිබුණා, එක්දහස් හත්සියයකට වඩා අහිංසක මිනිස් ජීවිත නැති වෙලා රටෙන් සැලකිය යුතු භූ කලාපයක ව්‍යසනයක් සිදු වෙලා තිබෙන අවස්ථාවක හමුදා අනු කණ්ඩායමක් හෝ යවලා ඒ පසු තත්ත්වයන් කළමනාකරණය කරන්න මියන්මාරයට උදවු කරන්න. නමුත් මේ ආණ්ඩුව ඒ වෙනුවෙන් කිසිම දෙයක් කරනවා අපි දැක්කේ නෑ. නේපාලයේ මෙවැනිම ඛේදවාචකයක් සිදු වූ අවස්ථාවේ සහන කණ්ඩායමක් විදිහට අපි මෙරට යුද හමුදා අනු කණ්ඩයක් ඒ වෙනුවෙන් සහභාගි කළා.
මේ ලෝක දේශපාලන සිතියම තුළ ලංකාවේ ගෞරවය සහ අපේ මනුස්සකම ප්‍රදර්ශනය කරන්න තිබූ අවස්ථාව මේ පාලකයන් මඟහැර තිබෙනවා. බුදුදහම සහ මේ ඓතිහාසික සබඳතා එක්ක අපි දෙපිරිස අතර තිබෙන්නේ සංස්කෘතික නෑදෑකමක්. අනෙකාගේ පපුවේ තෙතමනය ගැන කතා කරමින් තමයි මේ ආණ්ඩුව බලයට පත්වුණේ. නමුත් අපි දකිනවා එහෙම මනුස්සකමක්වත් මේ ආණ්ඩුවට නෑ කියලා. රාජ්‍යතාන්ත්‍රික ලෝක දේශපාලනය සම්බන්ධයෙන් මේ ආණ්ඩුව සිටින්නේ ඉතාම ප්‍රාථමික තැනක.”
