භූකම්පන හේතුවෙන් මියන්මාරයේ හා තායිලන්තයේ විපතට පත් ජනතාවට සහන සැලසීම සඳහා දිස්ත්‍රික් ශාසනාරක්ෂක බලමණ්ඩලය හා ප්‍රාදේශීය ශාසනාරක්ෂක බලමණ්ඩලය යටතේ තිබෙන වෙහෙර විහාර මූලික කරගනිමින් මූල්‍යාධාර එකතු කිරීමේ චාරිකාවක් අප්‍රේල් මස 11 වන දින මහා සංඝරත්නය විසින් සිදු කරන බව තුම්මුල්ලේ සීලක්ඛන්ද හිමියෝ පැවැසූහ.
උන්වහන්සේ ඒ බව සඳහන් කර සිටියේ බුද්ධශාසන ආගමික හා සංස්කෘතික කටයුතු අමාත්‍යාංශ ශ්‍රවණාගාරයේදී ඊයේ (01) පැවැති මාධ්‍ය හමුවකදීය.
මෙම සහන සැලසීමේ ක්‍රියාවලිය ත්‍රෛනිකායික මහා සංඝරත්නයේ අනුශාසනා පරිදි සර්ව ආගමික නායකයන්ගේ ද අදහස් සැලකිල්ලට ගෙන බුද්ධශාසන හා ආගමික කටයුතු අමාත්‍යාංශයේ විශේෂ මැදිහත් වීමකින් සිදු වන බව ද උන්වහන්සේ පැවැසූහ.
විපතට පත් ජනතාවට වියළි ආහාර, ඇඳුම් පැලඳුම් සහ සනීපාරක්ෂක ද්‍රව්‍ය ඇතුළු අත්‍යවශ්‍ය භාණ්ඩ කඩිනමින් තායිලන්තය වෙත ලබාදීමට කටයුතු සූදානම් කර ඇති බව ද උන්වහන්සේ ප්‍රකාශ කර සිටියහ.
මෙම ක්‍රියාව පියවර කිහිපයක් ඔස්සේ සිදු වන බව ද උන්වහන්සේ සඳහන් කළහ.
ඒ අනුව 11 වැනිදා පෙ.ව. 9.00ට මූල්‍යාධාර එකතු කිරීමේ චාරිකාව ක්‍රියාත්මක කිරීම, එදිනම ප.ව.3.00 වන විට එම මූල්‍යාධාර බැංකුගත කිරීම, 12 වැනි බක් මහ පොහෝ දින සවස 5.00ට මියගිය අය වෙනුවෙන් මතකවස්ත්‍ර පූජා කර පින් අනුමෝදන් කිරීම සහ සවස 6.00ට සෙත් පිරිත් සජ්ඣායනාව සහ බෝධි පූජාවක් පැවැත්වීමට නියමිත බවද උන්වහන්සේ ප්‍රකාශ කර සිටියහ.
තුම්මුල්ලේ සීලක්ඛන්ද හිමි සභාපතිත්වයෙන්, කළුතර දිස්ත්‍රික් ශාසනාරක්ෂක බලමණ්ඩල ලේඛකාධිකාරී අලගල ශ්‍රී සීලරතන හිමි සහ කෑගල්ල දිස්ත්‍රික් ශාසනාරක්ෂක බලමණ්ඩල ලේඛකාධිකාරි දුනුකේවත්තේ සීලවිමල හිමියන්ගෙන් සමන්විත කමිටුවක් මඟින් සියලු කටයුතු සම්බන්ධීකරණය කරනු ඇත.
මෙම කටයුත්ත සම්බන්ධයෙන් වැඩිදුර තොරතුරු දැනගැනීමට,
0714394440 දුරකතන අංකයෙන් තුම්මුල්ලේ සීලක්ඛන්ද හිමි සහ
0718152993 දුරකතන අංකයෙන් දුනුකේවත්තේ සීලවිමල හිමි ඇමැතිය හැකිය.
ඡායාරූපය – නිශ්ශංක විජේරත්න
