ජනතාවට කඩිනම් සේවාවක් සහ ඵලදායි සේවාවක් සැපයීමට කම්කරු අමාත්‍යාංශය ඩිජිටල්කරණය කිරීමේ වැඩපිළිවෙළක් ආරම්භ කෙරේ.
වත්මන් රජයේ ප්‍රමුඛතම ව්‍යාපෘතියක් ලෙස ඩිජිටල්කරණ ව්‍යාපෘතිය ක්‍රියාත්මක වන අතර ඩිජිටල් ආර්ථික ඇමැතිවරයා වශයෙන් ජනාධිපති අනුර කුමාර දිසානායක මහතාගේ උපදෙස් පරිදි මෙය රාජ්‍ය යන්ත්‍රණය තුළ මේ වන විට ක්‍රියාවට නංවා තිබේ.
මේ වැඩපිළිවෙළ කම්කරු අමාත්‍යාංශය තුළ ක්‍රියාත්මක කිරීම සම්බන්ධයෙන් කම්කරු ඇමැති ආචාර්ය අනිල් ජයන්ත ප්‍රනාන්දු සහ නියෝජ්‍ය ඇමැති මහින්ද ජයසිංහ, ඩිජිටල් ආර්ථික නියෝජ්‍ය ඇමැති එරංග වීරරත්න මහත්වරුන්ගේ ප්‍රධානත්වයෙන් කම්කරු අමාත්‍යාංශයේදී පසුගියදා (27) සාකච්ඡාවක්ද පැවැත්විණි.
එම සාකච්ඡාවේදී කම්කරු අමාත්‍යාංශය යටතේ පවතින ප්‍රධාන ආයතනයක් වන කම්කරු දෙපාර්තමේන්තුවේ සේවා, වඩා කඩිනම් සහ ඵලදායි කිරීමේ අවශ්‍යතාව පිළිබඳ අවධනයට ලක් කෙරිණ.
ඒ සඳහා ඩිජිටල්කරණ ව්‍යාපෘතිය ආදේශ කරගන්නා ආකාරය සම්බන්ධයෙන් මෙහි දී අදහස් පළකෙරිණ.
ඒ අනුව සේවා ලබා ගැනීමට පැමිණෙන ජනතාවට කඩිනමින් අදාළ සේවා අවම කාලයකින් සැපයීමත් මාර්ගගතව සහ ඩිජිටල්කරණය මඟින් ලබා දිය හැකි සේවා කාර්යක්ෂමව ලබා දීමටත් අවධානය යොමු විණ.
විශේෂයෙන් කම්කරු දෙපාර්තමේන්තුව, මහ බැංකුව, සේවක අර්ථසාධක අරමුදල ආදී ආයතනවලින් කම්කරු ජනතාවට සේවා සැපයීමේදී ඒකාබද්ධ ඩිජිටල් වේදිකාවක් නිර්මාණය කිරීමේ අවශ්‍යතාවද මෙහි දී මතු කරන ලදි.
මෙම ඩිජිටල්කරණ වැඩපිළිවෙළ හරහා කම්කරු ජනතාවට සිය ප්‍රතිලාභ ලබා ගැනීමේ දී සහ සෙසු සේවා ලබා ගැනීමේදී කාලය හා ශ්‍රමය ඉතිරි කර ගැනීමත්, වඩා තෘප්තිමත් රාජ්‍ය සේවයක් නිර්මාණය කිරීමටත් හැකිවනු ඇති බව මෙම සාකච්ඡාවේදී අවධාරණය කෙරිණ.
මෙම සාකච්ඡාවට කම්කරු අමාත්‍යාංශයේ ලේකම් එස්.එම්. පියතිස්ස, කම්කරු කොමසාරිස් ජනරාල් නදීකා වටලියද්ද, ඩිජිටල් ආර්ථික අමාත්‍යාංශයේ නිලධාරීන්, මහ බැංකු නිලධාරීන් මෙන්ම මොරටුව විශ්වවිද්‍යාලයේ ආචාර්යවරුන් ඇතුළු පිරිසක් එක්ව සිටියහ.
