බොරැල්ල වනාතමුල්ලේ කොණ්ඩා කපන ස්ථානයකදී 2014 වසරේදී පුද්ගලයකු වෙඩි තබා ඝාතනය කිරීමේ චෝදනාවට වරදකරු කෙරුණු කේ.එම්. සරත් බණ්ඩාර හෙවත් එස්.එෆ්. සරත් නමැති පාතාල කල්ලි සාමාජිකයකුට කොළඹ මහාධිකරණය ඊයේ (01) මරණ දඬුවම නියම කළේය.
නඩුවේ සෙසු විත්තිකරුවන් වූ චමින්ද රවී ජයනාත් හෙවත් දෙමටගොඩ චමින්ද, සුමුදු දුෂ්මන්ත සහ සමීර සාරංග යන තිදෙනා වෙඩි තැබීමට සම්බන්ධ බවට සාක්ෂි ඉදිරිපත් නොවූයෙන් ඔවුන් නිදොස් කොට නිදහස් කිරීමට නියම කරන ලදි.
දීර්ඝ නඩු විභාගයකින් අනතුරුව කොළඹ මහාධිකරණ විනිසුරු නවරත්න මාරසිංහ මහතා විසින් මෙම තීන්දුව ප්‍රකාශ කළේය.
නඩුව ඊයේ (01) කැඳවූ අවස්ථාවේ භාරත ලක්‍ෂ්මන් ප්‍රේමචන්ද්‍ර ඝාතනයට වරදකරුව මරණ දඬුවම නියමව සිටින දෙමටගොඩ චමින්ද, එස්.එෆ්. සරත් ඇතුළු විත්තිකරුවන් බන්ධනාගාරය මඟින් විශේෂ කාර්ය බළකායේ දැඩි ආරක්ෂාව මැද අධිකරණයට ඉදිරිපත් කරන ලදි.
මෙලෙස මරණ දඬුවම නියම වූයේ දෙමටගොඩ චමින්ද යන අයගේ සමීප ආධාරකරුවකු බව කියන කෝවිලේගෙදර දිසානායක මුදියන්සේලාගේ සරත් බණ්ඩාර නොහොත් එස්.එෆ්. සරත් නමැති තැනැත්තකුටය.
2014 වසරේ අගෝස්තු මස 01 වැනිදා බොරැල්ල ප්‍රදේශයේදී හෙට්ටිආරච්චිලාගේ දුමින්ද හෙවත් චානක නමැති 24 හැවිරිදි තැනැත්තකුට වෙඩි තබා මරා දැමීම විත්තිකරුවන්ට එරෙහිව ඉදිරිපත්ව ඇති චෝදනාවය. විත්තිකරු තවත් අය සමඟ බොරැල්ල ධර්මාශ්‍රමය විහාරය අසල පිහිටි යෝගා නම් සැලුනයේදී රාත්‍රී 8.00ට පමණ විත්තිකරුට වෙඩි තබා තිබේ.
නඩු විභාගයේදී අධිකරණ වෛද්‍ය සාක්ෂි සහ රසපරීක්ෂක වාර්තා දෙපක්ෂය මඟින් පිළිගන්නා ලදි. වෙඩි තැබීම සිදුවූදා මරණකරු සමඟ සැලුනයට පැමිණි ප්‍රසන්න ජීවන්ත සිල්වා යන අය සාක්ෂි දෙමින් තමන් දුමින්ද යන අය සමඟ සැලුනයට ගිය බවත් ඔහුගේ කොණ්ඩය කැපීමෙන් පසු රැවුල කපමින් සිටින අවස්ථාවේදී හෙල්මටයක් සහ ජැකට්ටුවක් පැලඳ සිටි විත්තිකරු පිස්තෝලයකින් වෙඩි තබන ලද බව කියා සිටින ලදි. විත්තිකරු වෙඩි 4ක් – 5ක් පමණ තබා පලා ගිය බවත් මියගිය අයගේ බෙල්ලට එම වෙඩි වැදුණු බවත් කියා සිටියේය. වෙඩි තැබීම සිදුවූ අවස්ථාවේ සැලුනයේ සිටි සේවකයන් පිටුපස දොරින් පලා ගිය බව කියා සිටියේය.
