මියන්මාර සහ තායිලන්ත මිත්‍ර රටවලට බලපෑ භූ කම්පන තත්ත්වය හේතුවෙන් විපතට පත් ජනතාව වෙත වියළි ආහාර, ඇඳුම් පැලඳුම් සහ සනීපාරක්ෂක ද්‍රව්‍ය ඇතුළු අත්‍යවශ්‍ය දෑ කඩිනමින් දීමට රජය පියවර ගෙන තිබේ.
මේ සම්බන්ධයෙන් ඊයේ (01) විශේෂ නිවේදනයක් නිකුත් කළ වැඩබලන බුද්ධශාසන හා සංස්කෘතික කටයුතු අමාත්‍ය ගමගෙදර දිසානායක මහතා සඳහන් කළේ එම ආධාර විධිමත් යන්ත්‍රණයක් ඔස්සේ දැනටමත් එක්රැස් කරමින් පවතින බවයි.
මියන්මාර සහ තායිලන්ත මිත්‍ර රටවලට බලපෑ භූ කම්පන තත්ත්වය හේතුවෙන් දිවි අහිමි වූ, තුවාල ලැබූ සහ දේපොළ විනාශ වූ සහෝදර ජනතාව වෙනුවෙන් බුද්ධශාසන ආගමික හා සංස්කෘතික කටයුතු අමාත්‍යාංශයේ බලවත් සංවේගය පළ කරන බව ද එම නිවේදනයේ සඳහන්ය.
විපතට පත් සහෝදර මියන්මාර සහ තායිලන්ත ජනතාව වෙත සහන සැලසීම සඳහා ත්‍රෛනිකායික මහා සංඝරත්නයේ අනුශාසනා පරිදි සර්වාගමික නායකයන්ගේ ද අදහස් සැලකිල්ලට ගනිමින් බුද්ධශාසන, ආගමික හා සංස්කෘතික කටයුතු අමාත්‍යාංශය විශේෂ මැදිහත්වීමක් සිදු කර ඇති බව ද එහි දැක්වේ.
විපතට පත් ජනතාව සඳහා මෙරටින් යැවීමට නියමිත වියළි ආහාර ඇඳුම් පැලඳුම් සහ සනීපාරක්ෂක ද්‍රව්‍ය ඇතුළු අත්‍යවශ්‍ය දෑ කඩිනමින් මියන්මාරය සහ තායිලන්තය වෙත දීමට රජය අවශ්‍ය කටයුතු සූදානම් කර පවතින බව ද සඳහන්ය.
එම ආධාර විධිමත් යන්ත්‍රණයක් ඔස්සේ දැනටමත් එක්රැස් කරමින් පවතින අතර ඊට අනුගත වෙමින් එම ආධාර අදාළ නීත්‍යනුකූල පාර්ශ්වයන්ට දීමට කටයුතු කරන ලෙස කාරුණිකව ඉල්ලා සිටින බව බුද්ධශාසන හා සංස්කෘතික කටයුතු අමාත්‍යාංශය සඳහන් කරයි. භූ කම්පන තත්ත්වය හේතුවෙන් මියගිය ජනතාවට පුණ්‍යානුමෝදනා කිරීම සහ තුවාල ලැබූවන්ට ඉක්මන් සුවය ප්‍රාර්ථනා කිරීමත් අරමුණු කර ගනිමින් පින්කම් සංවිධානය කරන ලෙස දිවයිනේ සියලු විහාරස්ථානවල ගෞරවනීය ස්වාමීන් වහන්සේගෙන් මෙන්ම සියලු පාර්ශවවලින් බුද්ධශාසන ආගමික හා සංස්කෘතික කටයුතු අමාත්‍යාංශය ඉල්ලීමක් ද කරයි.
