මිනුවන්ගොඩ ප්‍රදේශයේදී ඊයේ (01) දහවල් මිනුවන්ගොඩ මාර්ග බාධකයකදී මත්ද්‍රව්‍ය පරීක්ෂාවක් අතරතුර පොලීසියෙන් මිදී පලා යාමට උත්සහ කළ සැකකරුවෙකුට පොලීසිය වෙඩිතැබීමෙන් තුවාල ලබා රෝහල්ගත කර ඇති අතර තවත් අයෙකු අත්අඩංගුවට ගත් බව පොලීසිය පවසයි.
ගම්පහ කොට්ඨාස අපරාධ විමර්ශන කාර්යාංශයේ නිලධාරින් විසින් වැල්හේන පොලිස් මාර්ග බාධකයේදී යතුරුපැදියකට නතර කිරීමට අණකර ඇති අතර එහිදී යතුරුපැදිය නොනවත්වා ධාවනය කර තිබේ.
අනතුරුව නිලධාරීන් දෙදෙනෙකු අදාළ යතුරුපැදිය හඹාගොස් නතර කරගෙන ඇති අතර එහිදී යතුරුපැදියේ සිටි තරුණයින් දෙදෙනා නිලධාරීයෙක් සතු රාජකාරී ගිනිඅවිය පැහැරගැනීමට උත්සාහ දරා ඇති බව පොලීසිය පවසයි.
එහිදී පොලිස් නිලධාරීන් වෙඩිතැබීමක් සිදුකර ඇති අතර ඉන් එක් තරුණයෙකු තුවාල ලබා ගම්පහ රෝහලට ඇතුළත් කර තිබේ.
වෙඩි වැදීමෙන් තුවාල ලබා ඇත්තේ මිනුවන්ගොඩ රාජසිංහපුර ප්‍රදේශයේ පදිංචි 27 හැවිරිදි පුද්ගලයෙකි.
අත්අඩංගුවට ගෙන ඇති සැකකරු වන්නේ තරිඳු හේෂාන් නම් උග්ගල්බොඩ, උණපඳුරවත්ත ප්‍රදේශයේ පදිංචි 21 හැවිරිදි අයෙකි.
සැකකරුවන් සන්තකයේ තිබී අයිස් මත්ද්‍රව්‍ය සහ හෙරොයින් මත්ද්‍රව්‍ය සොයාගෙන තිබේ.
