ඌව පළාත් සභාවට අයත් බදුල්ල ජාතික ඉතිරි කිරීම් බැංකුවේ කල් පිරීමට තිබූ ස්ථිර තැන්පතු ඉවත් කර ගෙන රජයට රුපියල් ලක්ෂ 173ක පාඩුවක් සිදු කිරීම සම්බන්ධයෙන් අල්ලස් කොමිසම විසින් අත්අඩංගුවට ගත් නව ප්‍රජාතන්ත්‍රවාදී පෙරමුණේ බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් දසනායක මහතා අප්‍රේල් 8 වන දින දක්වා තවදුරටත් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (01) නියෝග කළාය.
ඌව පළාත් සභාවේ හිටපු ප්‍රධාන ලේකම් ඇතුළු සිද්ධියට අදාළ සියලුම සාක්ෂිකරුවන්ගෙන් සතියක් ඇතුළත ප්‍රකාශ ලබාගෙන විමර්ශන කටයුතු අවසන් කර අධිකරණයට වාර්තාවක් ඉදිරිපත් කරන ලෙසටද මහේස්ත්‍රාත්වරිය නියෝග කළාය.
සිද්ධියට අදාළව සාක්ෂිකරුවන්ගෙන් ප්‍රකාශ සටහන් කර ගැනීමට තිබෙන බවත්, සැකකරුට ඇප ලබා දුනහොත් සාක්ෂිකරුවන්ට බාධා ඇතිවෙන බවට අල්ලස් හෝ දූෂණ චෝදනා විමර්ශන කොමිසම අධිකරණයට කරන ලද ඉල්ලීම සලකා බැලීමෙන් අනතුරුව මෙලෙස නියෝග කෙරිණි.
ඌව පළාත් සභාවට අයත් පෙර පාසල් දරුවන්හට පාසල් බෑග් ලබා දෙන ලෙසට පාර්ලිමේන්තු මන්ත්‍රී චාමර සම්පත් දසනායක මහතා බදුල්ල ජාතික ඉතිරි කිරී‍ෙම් බැංකුවෙන් අරමුදලක් ලබා දෙන ලෙසට ඉල්ලා සිටියද එම බැංකුව මඟින් එම ඉල්ලීම ප්‍රතික්ෂේප කිරීම නිසා මෙලෙස කල් පිරීමට නියමිතව තිබූ ස්ථිර තැන්පතු ඉවත් කරගෙන ඇති බව අල්ලස් හෝ දූෂණ චෝදනා විමර්ශන කොමිසම අධිකරණයට කරන ලද කරුණු දැක්වීමෙන් අනතුරුව මෙලෙස නියෝග කෙරිණි.
බන්ධනාගාර නිලධාරීන් විසින් ඊයේ උදෑසන සැකකාර පාර්ලිමේන්තු මන්ත්‍රීවරයා අධිකරණයට ඉදිරිපත් කෙරුණු අතර දෙවැනි වරට නඩුව දහවල් 12.00 ට නැවත කැඳවනු ලැබීය.
පාර්ලිමේන්තු මන්ත්‍රී සමන්ත විද්‍යාරත්න මහතා අල්ලස් කොමිසමට කරන ලද පැමිණිල්ලකට අනුව මෙලෙස මෙම සැකකරු අත්අඩංගුවට ගෙන තිබුණි.
2016 වර්ෂයේ සමන්ත විද්‍යාරත්න මහතා විසින් අල්ලස් හෝ දූෂණ විමර්ශන කොමිසමට කරන ලද පැමිණිල්ලකට අනුව බී වාර්තා 3ක් යටතේ චෝදනා ගොනුකර තිබුණි.
ඌව පළාතේ පෙර පාසල් දරුවන්ට පාසල් බෑග් ලබා දෙන බව පවසමින් එම පළාත් සභාවට අයත් රුපියල් මිලියන 26 කට ආසන්න මුදලක් චාමර සම්පත් දසනායක පදනමට බැර කළ බව කියන සිද්ධියක් සම්බන්ධයෙන් මෙම සැකකරු හට ශරීර ඇප සහ මුදල් නියම කර තිබුණි.
ඌව පළාතේ පෙර පාසල් දරුවන්ට පාසල් බෑග් ලබා දෙන බව පවසමින් එම පළාත් සභාවට අයත් බදුල්ල ලංකා බැංකුව මඟින් ලබාගත් ලක්ෂ දහයක මුදල චාමර සම්පත් දසනායක පදනමට බැර කර ගැනීම, මහජන බැංකුවේ තිබුණු ලක්ෂ විසිපහක අරමුදලක් චාමර සම්පත් දසනායක පදනමට බැර කර ගැනීම සහ ජාතික ඉතිරි කිරීම් බැංකුවෙන් අරමුදල් ඉල්ලා සිටි අවස්ථාවේදී සැකකරු හට ලබා නොදීම හේතුවෙන් කල් පිරීමට නියමිතව තිබූ ස්ථාවර ගිණුම් කල් පිරීමට පෙර ඉවත් කරගෙන රජයට ලක්ෂ 173ක පාඩුවක් සිදු කිරීම යන චෝදනා තුන යටතේ නඩු ගොනුකර තිබුණි.
සිද්ධියට අදාළව ලංකා බැංකුව මඟින් ලබාගන්නා ලද ලක්ෂ දහයක අරමුදල සම්බන්ධයෙන් පොදු දේපළ පනත යටතේ මෙම පාර්ලිමේන්තු මන්ත්‍රීවරයා සැකකරුවෙක් බවට බදුල්ල මහේස්ත්‍රාත් අධිකරණයේ කරුණු වාර්තා කර ඇති බවත් 2025/5/19 දින බදුල්ල මහේස්ත්‍රාත් අධිකරණයට ඉදිරිපත් කිරීමට බන්ධනාගාර නිලධාරීන්ට නියෝගයක් ලබා දෙන ලෙසට අපරාධ පරීක්ෂණ දෙපාර්තමේන්තුව අධිකරණයට දැන්වීය.
මෙම සිද්ධියට අදාළව පොදු දේපළ පනත යටතේ වරදක් අනාවරණය වී තිබේ නම් ඒ පිළිබඳ විමර්ශනය කිරීමටද අපරාධ පරීක්ෂණ දෙපාර්තමේන්තුවට පෙර නඩු දිනයකදී මහේස්ත්‍රාත්වරිය විසින් නියෝග කර තිබුණි.
සිද්ධිය සම්බන්ධයෙන් කරුණු දැක්වූ අල්ලස් හෝ දූෂණ චෝදනා විමර්ශන කොමිසමේ සහකාර අධ්‍යක්‍ෂ නීති, සුලෝචනා මහත්මිය අධිකරණයට පවසා සිටියේ,
Òස්වාමීනි, සිද්ධියට අදාළව සාක්ෂිකරුවන්ගෙන් ප්‍රකාශ ලබා ගැනීමට අල්ලස් කොමිසමට කාලය ප්‍රමාණවත් වුණේ නෑ, මේ සතිය තුළ නිවාඩු දින තිබ්බා, අල්ලස් කොමිසම වැඩ කරේ සිකුරාදා දවසේ පමණයි, අද දින තුළ පවා සිද්ධියට අදාළව ප්‍රකාශ සටහන් කරනවා, ස්වාමීනි, එම නිසා සතියක කාලයක් විමර්ශන කටයුතු සඳහා අපට ලබා දෙන්න, සැකකරුට ඇප ලබා දුන්නොත් සාක්ෂිකරුවන්ට තර්ජන, බලපෑම් ඇතිවිය හැකියිÓ යනුවෙනි.
එහිදී ප්‍රශ්නයක් යොමු කරමින් කොළඹ ප්‍රධාන මහේස්ත්‍රාත් තනූජා ලක්මාලි මහත්මිය අල්ලස් කොමිසමෙන් විමසා සිටියේ,
Òසිද්ධියට අදාළව තවත් කී දෙනෙක්ගෙන් ප්‍රකාශ ලබා ගැනීමට තිබේද, සතියක් ඇතුළත එම ප්‍රකාශ ලබාගෙන විමර්ශන කටයුතු අවසන් කිරීමට හැකිවේදÓ යනුවෙනි.
ඊට පිළිතුරු දෙමින්, අල්ලස් හෝ දූෂණ චෝදනා විමර්ශන කොමිසමේ සහකාර අධ්‍යක්‍ෂ නීති, සුලෝචනා මහත්මිය අධිකරණයට පවසා සිටියේ,
Òඌව පළාත් සභාවේ හිටපු ප්‍රධාන ලේකම්තුමාගෙන් අද ප්‍රකාශ සටහන් කරගන්නවා, වැඩබලන ප්‍රධාන ලේකම්වරයාගෙන්, නියෝජ්‍ය ප්‍රධාන ලේකම්වරයාගෙන් මෙම සිද්ධියට අදාළ තවත් බොහෝ සාක්ෂිකරුවන්ගෙන් ප්‍රකාශ ලබා ගැනීමට තිබෙනවා, අද දින ඇප ලබා දුන්නොත් ප්‍රකාශ ලබාදීමට පැමිණි ප්‍රධාන ලේකම්තුමාට පවා බලපෑම් ඇති විය හැකියි, ස්වාමීනි, මහජන බැංකුවේ නියෝජ්‍ය කළමනාකාරතුමා ප්‍රකාශ සටහන් කිරීමේදී බලපෑමක් කර තිබූ බව සඳහන් කර තිබුණා, මෙම සැකකරුට ඇප ලබා දීම විමර්ශනයට කරන බාධාවක්. එම නිසා විමර්ශන කටයුතු අවසන් වන තෙක් තවදුරටත් සැකකරු රක්ෂිත බන්ධනාගාරගත කරන්න කියලා නියෝගයක් ලබා දෙන්න යැයි මම ඉල්ලනවාÓ යනුවෙන් පැවසීය.
සැකකාර පාර්ශ්වය වෙනුවෙන් අධිකරණයේ පෙනී සිටි ජනාධිපති නීතිඥ කාලිංග ඉන්ද්‍රතිස්ස මහතා සඳහන් කරනු ලැබුවේ,
Ò2016 වර්ෂයේ කරන ලද පැමිණිල්ලකට අනුව 2019 වර්ෂයේ මෙම සිද්ධියට අදාළව ප්‍රකාශ ලබාගෙන අවුරුදු ගණනකට පසුව 2025 දී අත්අඩංගුවට ගෙන අධිකරණයට ඉදිරිපත් කිරීම දේශපාලන කුමන්ත්‍රණයක් බවය.
මෙම සිද්ධිය අවුරුදු නවයක කාලයක් විමර්ශනය කර නොමැති බවත්, චෝදනා තුන එක බී වාර්තාවකට ගොනු නොකර නඩු ගොනු තුනක් යොමු කරන්නේ කෙසේ හෝ තම සේවාදායකයා රක්ෂිත බන්ධනාගාරගත කිරීමට බව ද ජනාධිපති නීතිඥවරයා සඳහන් කළේය.
Òඌව පළාත් සභාවේ ආණ්ඩුකාරවරයා සහ ප්‍රධාන ලේකම්වරයා උපදෙස් මත මෙම ස්ථාවර තැන්පතු ඉවත් කරගෙන තිබෙන්නේ උත්සව, අවුරුදු අත්තිකාරකම් මුදල් රාජ්‍ය සේවකයන්ට ලබාදීමට ඌව පළාත් සභාවේ ආණ්ඩුකාරවරයා සහ හිටපු ප්‍රධාන ලේකම්වරයාගේ උපදෙස් මත මෙම ස්ථාවර තැන්පතු ඉවත් කරගෙන තිබෙනවා, ඒ සඳහා මිලියන තුන්සියයක මුදලක් අවශ්‍ය වී තිබුණා. එම අවධියේ පළාත් සභාවේ තිබූ ආර්ථික අපහසුතාවය නිසා ජාතික ඉතිරි කිරී‍ෙම් බැංකුවෙන් ස්ථාවර ගිණුම් ඉවත් කර ගැනීමට උපදෙස් ලැබී තිබුණා. ඌව පළාතේ ප්‍රධාන ලේකම්වරයා, එහි ආණ්ඩුකාරවරයාට මිලියන 2ක ස්ථාවර තැන්පතු ඉවත් කරගන්නා ලෙස ඌව පළාත් සභාවෙන්ම අනුමැතිය ලැබී තිබුණු බවට මෙම ලේඛනවල සඳහන් වෙනවා. මගේ සේවාදායකයා ජාතික ඉතිරි කිරීමේ බැංකුවේ කල් පිරීමට තිබූ ස්ථාවර තැන්පතු ඉවත් කරගත්තේ නැහැ. ඒක සිදුවුණේ ඌව පළාත් සභාවේ අවශ්‍යතාවයට, අල්ලස් කොමිසම ඒ පිළිබඳ විස්තර කිසිදු බී වාර්තාවක දක්වලා නැහැÓ යනුවෙන් ජනාධිපති නීතිඥවරයා දීර්ඝ ලෙස කරුණු ඉදිරිපත් කළේය.
එම අවස්ථාවේදී කොළඹ ප්‍රධාන මහේස්ත්‍රාත් තනූජා ලක්මාලි මහත්මිය අල්ලස් හෝ දූෂණ විමර්ශන කොමිසමේ නිලධාරීන්ගෙන් එම අවධිය තුළ විමර්ශන කටයුතු සිදු වූවාද යැයි ප්‍රශ්න කළේය.
ඊට පිළිතුරු දෙමින් අල්ලස් කොමිසම දන්වා සිටියේ,
Òස්වාමීනි, ජාතික ඉතිරි කිරී‍ෙම් බැංකුවේ හිටපු කළමනාකාරවරයකු වන පී.පී.එම්.පී. බණ්ඩාර මහතාට ස්ථාවර තැන්පතු හතරක් ඉවත් කරගන්නා ලෙස පාර්ලිමේන්තු මන්ත්‍රී චාමර සම්පත් දසනායක මහතා ඉල්ලලා තිබෙනවා. මෙම බැංකුව එලෙස ක්‍රියා නොකිරීම නිසා මෙම කළමනාකරුට විනය පරීක්ෂාවක් පවා පවත්වා තිබෙනවා. ස්වාමීනි, කරන ලද විමර්ශනවලදී මෙම සැකකරු ලේකම්වරයාට සහ වෙනත් අයට බලපෑම් කර තිබෙනවා, 2016 වසරේ උත්සව අරමුදල් සඳහා ලංකා බැංකුවල, මහජන බැංකුවල කල් පිරුණු ස්ථාවර තැන්පතු තිබුණා. ඒවා ඉවත් කරගන්නේ නැතුව ජාතික ඉතිරි කිරී‍ෙම් බැංකුවේ කල් පිරීමට තිබූ ස්ථාවර තැන්පතු ඉවත් කරගෙන තිබෙනවා. මොනම රාජ්‍ය ආයතනයක් මඟින්වත් උත්සව අත්තිකාරම් දීම සඳහා රජයට පාඩු වන ලෙස කටයුතු කිරීමට අවස්ථාව ලබා දීලා නැහැ. එලෙස ක්‍රියා කිරීම පොදු දේපළ යටතේ දඬුවම් ලැබිය හැකි වරදක්. සිද්ධියට අදාළව ඌව පළාත් සභාවේ ගිණුම ඉවත් කිරීමේ ගොනුවේ පළමු ලේඛන තුළම සඳහන් වන්නේ චාමර දසනායක පදනම යන්න ලිපිගොනුවයි. සැකකරු මෙම වරදට සම්බන්ධ බව එමඟින්ම පෙනී යනවාÓ යනුවෙනි.
සිද්ධිය සම්බන්ධයෙන් කරුණු දැක්වූ අල්ලස් හෝ දූෂණ චෝදනා විමර්ශන කොමිසමේ නිලධාරීන් තවදුරටත් සඳහන් කරනු ලැබුවේ, ලංකා බැංකුවේ සහ මහජන බැංකුව එහි පවතින ගිණුම් ඉවත් ඉවත් කර ගනිති යැයි යන බියෙන් එම ආධාර මුදල ලබා දුන් බවත්, ජාතික ඉතුරි කිරීමේ බැංකුව ලබාදීමට ප්‍රතික්ෂේප කිරීම නිසා කල් පිරීමට තිබූ ස්ථිර තැන්පතු ඉවත් කරගෙන රජයට විශාල පාඩුවක් කර ඇති බවය.
ශ්‍රී ලංකා මහ බැංකුවේ රජයට අයත් කිසිදු ස්ථාවර තැන්පතු ගිණුමක් කල් පිරීමට පෙර ඉවත් කරගෙන රජයට පාඩු වන ආකාරයේ ක්‍රියා සිදු කිරීමට අවස්ථාව ලබා නොදී තිබෙන බවත්, එම ලබාගන්නා ලද මුදල් අවභාවිත කර තිබෙන බවට ද පැමිණිල්ල වෙනුවෙන් අධිකරණයේ පෙනී සිටි සහකාර අධ්‍යක්‍ෂ නීති, සුලෝචනා මහත්මිය අධිකරණයට කරුණු දැක්වීය.
ඒ අනුව ඉදිරිපත් වූ කරුණු සලකා බැලූ මහේස්ත්‍රාත්වරිය විමර්ශනයට බාධා වන අයුරින් සාක්ෂිකරුවන්ට බාධා ඇති විය බව පවසා සැකකරු ලබන 8 දින දක්වා රක්ෂිත බන්ධනාගාරගත කිරීමට නියෝග කළාය.
සිද්ධිය සම්බන්ධයෙන් කඩිනම් ඉදිරි විමර්ශන වාර්තාවක් ලබන 8 දිනට අධිකරණයට ඉදිරිපත් කරන ලෙසද අල්ලස් හෝ චෝදනා විමර්ශන කොමිසමට නියෝග කළාය.
සිද්ධියට අදාළව ප්‍රකාශ ලබා ගැනීමට තිබෙන සියලුම සාක්ෂිකරුවන්ගෙන් සතියක් ඇතුළත සියලුම ප්‍රකාශ ලබා ගැනීමටද අල්ලස් කොමිසමට මහේස්ත්‍රාත්වරිය විසින් නියෝග කරනු ලැබීය.
නඩු කටයුතු අවසන් වීමෙන් පසුව බන්ධනාගාර නිලධාරීන් විසින් පාර්ලිමේන්තු මන්ත්‍රී චාමර සම්පත් දසනායක මහතා බන්ධනාගාරය වෙත රැගෙන යනු ලැබිණි.
ඡායාරූපය – දුෂ්‍යන්ත මායාදුන්නේ
