අලුත්කඩේ මහේස්ත්‍රාත් අධිකරණයේදී ගණේමුල්ලේ සංජීව නමැති පාතාලයේ ප්‍රබල මත්කුඩු ජාවාරම්කරුට වෙඩි තබා ඝාතනය කිරීම සම්බන්ධයෙන් අත්අඩංගුවට ගැනීමට සොයන ඉෂාරා සෙව්වන්දි නමැති කාන්තාව, අනුරාධපුර නගරයේ හෝටලයක නවාතැන් ගෙන සිටින බවට ලද තොරතුරකට අනුව කළ වැටලීමකදී ඇගේ රුවට, බෙහෙවින් සමාන කාන්තාවක් සහ හිටපු හමුදා මේජර්වරයකු අයිස්, කුෂ් හා කේරල ගංජා තොගයක්, සමඟ පෙරේදා (31දා) අත්අඩංගුවට ගත් බව අනුරාධපුර කොට්ඨාස අපරාධ විමර්ශන අංශය පවසයි.
මෙම යුවළ පැමිණ සිටි සුඛෝපභෝගී මෝටර් රථ දෙකක් ද මෙහිදී පොලිස් භාරයට ගෙන තිබේ.
මෙලෙස අත්අඩංගුවට පත්ව ඇත්තේ කුරුණෑගල, උඩවල පාරේ පදිංචි 53 හැවිරිදි හිටපු හමුදා මේජර්වරයකු සහ 33 හැවිරිදි කාන්තාවකි.
අනුරාධපුර වලිසිංහ හරිස්චන්ද්‍ර මාවතේ පිහිටි ප්‍රසිද්ධ හෝටලයක ඉෂාරා සෙව්වන්දි නමැති කාන්තාව සිටින බවට බුද්ධි අංශ වෙත ලැබුණු තොරතුරකට අනුව අනුරාධපුර කොට්ඨාස අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක නුවන් වික්‍රමසිංහ මහතා ඇතුළු නිලධාරීහු කණ්ඩායමක් මෙම වැටලීම සිදු කළහ.
එම වැටලීම සඳහා පොලිස් නිල සුනඛ අංශයේද සහාය ලබා ගෙන තිබුණි.
අත්අඩංගුවට ගත් සැකකාර කාන්තාව සහ හිටපු මේජර්වරයා අනියම් සබඳතාවයක් පවත්වා ගෙන යමින් මත්ද්‍රව්‍ය ජාවාරමේ යෙදෙන බවට අනාවරණය කරගත් බවත් සැකකාර හිටපු මේජර්වරයා මත්ද්‍රව්‍ය චෝදනාවලට කීප වතාවක් අනුරාධපුරයේදී අත්අඩංගුවට ගත් අයකු බවද පොලීසිය සඳහන් කළේය.
මීට දින හතරකට පමණ පෙර අදාළ හෝටලයට පැමිණ නවාතැන් ගෙන ඇති සැකකාර යුවළ අත්අඩංගුවට ගෙන සිදු කළ පරීක්ෂා කිරීම්වලදී, අයිස්, කුෂ් කේරල ගංජා මත්ද්‍රව්‍යවලට අමතරව, රන් ආභරණ, ජංගම දුරකතන තොගයක්, පවර් බැන්ක් 5ක්, විවිධ යතුරු කිහිපයක්, ගම්ටේප්, ගම්බෝතල් ඇතුළු භාණ්ඩ රැසක් සොයා ගත් බව පොලීසිය සඳහන් කළේය.
අත්අඩංගුවට ගත් සැකකාර යුවළ අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතය.
උතුරු මැද පළාත භාර වැඩ බලන ජ්‍යෙෂ්ඨ නියෝජ්‍ය පොලිස්පති බුද්ධික සිරිවර්ධන සහ උතුරු මැද දිසාව භාර නියෝජ්‍ය පොලිස්පති අයි.බී.සී.ටී. සුගතපාල යන මහත්වරුන්ගේ උපදෙස් මත අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී තිළිණ හේවා පතිරණ මහතාගේ සෘජු අධීක්ෂණය යටතේ අනුරාධපුර කොට්ඨාස අපරාධ විමර්ශන කාර්යාංශයේ ස්ථානාධිපති ප්‍රධාන පොලිස් පරීක්ෂක නුවන් වික්‍රමසිංහ මහතා ඇතුළු නිලධාරීහු කණ්ඩායමක් මෙම වැටලීම සිදු කළහ.
