දක්ෂිණ අධිවේගී මාර්ගයේ දොඩංගොඩ ප්‍රදේශයේ දී එකිනෙක ආසන්නයේ සිදු වූ අනතුරු දෙකකින් සිව් දෙනකුගෙන් යුත් බ්‍රිතාන්‍ය ජාතික පවුලක් ඇතුළු හය දෙනකු තුවාල ලබා රෝහල්ගත කර ඇතැයි දක්ෂිණ අධිවේගී රථ වාහන පොලීසිය සඳහන් කළේය.
තුවාල ලද විදේශිකයන් අතර මව පියා සහ දියණියන් දෙදෙනකුද වන බව පොලීසිය කියයි.
එංගලන්ත ජාතික පවුලේ පිරිස රැගත් සුඛෝපභෝගී රථය කටුනායක ගුවන්තොටුපොළ කරා ධාවනය කරමින් තිබියදී ඉදිරියෙන් කොළඹ දෙසට ගමන් ගත් ලොරි රථයක පිටුපස ගැටී අනතුරට ලක්ව ඇත. එම අනතුරින් එංගලන්ත ජාතික යුවළ සහ ඔවුන්ගේ දියණියන් දෙදෙනා තුවාල ලබා ඇතැයි පොලීසිය පවසයි.
තුවාල ලැබූ විදේශීය යුවළ සහ ඔවුන්ගේ දරු දෙදෙනා කළුතර නාගොඩ රෝහල වෙතත් මෝටර් රථ රියැදුරු ලොරි රථයේ සහායකයා බණ්ඩාරගම දිසා රෝහල වෙතත් ප්‍රතිකාර සඳහා යොමු කිරීමට පියවර ගෙන ඇත.
අනතුරින් විදේශීය පවුල ගමන් ගත් සුඛෝභෝගී වෑන් රථයට බරපතළ අලාභ සිදු වී ඇති අතර, මෝටර් රථයට මෙන්ම ලොරි රථයට සහ අධිවේගී මාර්ගයට ද හානි සිදු වී ඇත.
එම අනතුරින් මඳ වේලාවකට පසු දොඩංගොඩ දෙස සිට කොළඹ දෙසට ගමන් ගත් ලොරියක් මෝටර් රථයක පිටුපස ගැටී මෝටර් රථය වට හතරක් කැරකී ගොස් අනතුරුව අධිවේගී මාර්ගයේ මැද ආරක්‍ෂිත වැටෙහි ගැටී අනතුරට ලක් වී ඇතැයි පොලීසිය සඳහන් කරයි.
දක්ෂිණ අධිවේගී රථවාහන කොට්ඨාසයේ ස්ථානාධිපති ප්‍රධාන පොලිස් පරීක්ෂක සම්පත් පෙරේරා මහතාගේ උපදෙස් මත ගැලනිගම රථ වාහන පොලීසියේ ස්ථානාධිපති ප්‍රධාන පොලිස් පරීක්ෂක අශෝක කරුණාරත්න මහතාගේ මෙහෙයවීමෙන් පොලිස් සැරයන්වරුන් වන (14612) බණ්ඩාර, (49428) චමින්ද මහත්වරුන් පරීක්ෂණ පවත්වයි.
