අධ්‍යාපන අමාත්‍යාංශයේ ලේකම්වරයාගේ නියෝගයන්ට අනුව ස්ථාන මාරු ලැබූ ප්‍රධාන පෙළේ පාසල් රැසක ගුරුවරුන් 100ක පමණ පිරිසක් අදාළ ස්ථාන මාරු නියෝග පිළිනොගෙන තවදුරටත් එම පාසල්වල රැඳී සිටින බව ලංකා ගුරු සංගමයේ ප්‍රධාන ලේකම් ජෝශප් ස්ටාලින් මහතා පවසයි. ඇතැම් ගුරුවරුන් වසර 10කට වැඩි කාලයක් අදාළ ප්‍රධාන පෙළේ පාසල්වල රැඳී සිටින බව ද ඒ මහතා පැවසුවේය.
අධ්‍යාපන ලේකම්වරයා ස්ථාන මාරු නියෝග ලබාදී තිබියදීත් ස්ථාන මාරු ක්‍රියාත්මක නොකර එසේ රැඳී සිටිය නොහැකි බවත් වහාම අදාළ ස්ථාන මාරු නියෝග ක්‍රියාත්මක විය යුතු බවත් ඒ මහතා ප්‍රකාශ කළේය. ස්ථාන මාරු නොගිය ගුරුවරුන් විවිධ බලපෑම් කරමින් පාසල්වල රැඳී සිටින්නේ යැයි ද ඒ මහතා පැවසුවේය. ඇතැම් පාසල්වල විදුහල්පතිවරුන් අදාළ ස්ථාන මාරුව සිදු කිරීමට අනුප්‍රාප්තිකයන් පැමිණෙනතුරු සිටින බව ද ඔහු කීය.
අධ්‍යාපන අමාත්‍යාංශයේ විධිමත් කාර්ය පටිපාටියකට අනුව මාරු මණ්ඩලයක් මඟින් සිදු කරන මෙම ස්ථාන මාරු පොදුවේ සියලු ගුරුවරුන් පිළිපැදිය යුතු බවත් මෙම මාරු මණ්ඩලයෙන් ගුරුවරුන් 6000කට පමණ ස්ථාන මාරු දී ඇති බවත් ඒ මහතා පැවසුවේය.
