චීන මහජන විමුක්ති හමුදාවේ නැගෙනහිර විධානයට අයත් සේනාංක, තායිවාන සමූද්‍ර සන්ධි කලාපයේ මධ්‍යම ප්‍රදේශය හා දකුණු ප්‍රදේශය ආශ්‍රිතව අද (02) “Strait Thunder-2025A” නම් යුද අභ්‍යාසය පවත්වන බව චීන මහජන විමුක්ති හමුදාවේ නැගෙනහිර විධානයේ ප්‍රකාශක කර්නල් ෂී යී ප්‍රකාශ කළේය.
පරීක්ෂා කිරීම, හඳුනා ගැනීම, අනතුරු ඇඟවීම, ඉවත් කිරීම, බාධා කිරීම සහ අත්අඩංගුවට ගැනීම් ආදී අභ්‍යාස කෙරෙහි එහිදී වැඩි වශයෙන් අවධානය යොමු කර ඇත. එමගින් හමුදා කලාපීය පාලනය, ඒකාබද්ධ අවහිර කිරීම මෙන්ම නිවැරදිව ප්‍රහාර එල්ල කිරීමේ හැකියාව පරීක්ෂා කරන බව ෂී යී පැවසීය.
මේ අතර ඊයේ(01) පැවති මාධ්‍ය හමුවේදී චීන විදේශ අමාත්‍යංශයේ ප්‍රකාශක Guo Jiakun පැවසුවේ, චීනයේ තායිවාන දූපත වටා පවත්වන ඒකාබද්ධ අභ්‍යාස සහ පුහුණුවීම්, චීන තායිවාන ප්‍රදේශයේ බෙදුම්වාදී බලවේගවලට සිදු කරන බරපතල අනතුරු ඇඟවීමක් බවයි.
තායිවානය චීනයෙන් වෙන් කළ නොහැකි කොටසක් බවත් තායිවාන ප්‍රශ්නය සම්පූර්ණයෙන්ම චීනයේ අභ්‍යන්තර කටයුත්තක් වන අතර, කිසිදු බාහිර බලවේගයකට ඒ සඳහා මැදිහත් වීමට අවසර නොලැබෙන බව ත් Guo Jiakun යළිත් අවධාරණය කර ඇත.
