මියන්මාරයේ ඇති වූ ප්‍රබල භූකම්පනයෙන් මිය ගිය සංඛ්‍යාව, 2,700 දක්වා ඉහළ ගොස් තිබේ. තුවාල ලැබූවන් ගණන 4,500 ක් වන අතර, භූකම්පනයෙන් 441 දෙනෙකු අතුරුදන්ව ඇතැයි විදෙස් මාධ්‍ය වාර්තා කරයි.
අතුරුදන්වූවන් බොහෝ පිරිසක් මිය ගොස් ඇති බවට අනුමාන කෙරෙන බව මියන්මාර බලධාරින් ප්‍රකාශ කරයි.
භූකම්පනය හේතුවෙන් ගොඩනැගිලි දසදහසකට අධික සංඛ්‍යාවක් මුළුමනින්ම විනාශයට පත්විය. රෝහල් තුනක් සම්පූර්ණයෙන් විනාශ වී ඇති අතර රෝහල් 22 කට අර්ධ හානි සිදුව ඇති බැවින්, එම රෝහල්වල ද දෛනික කටයුතු සිදු කිරීම තාවකාලිකව අත්හිටුවීමට සිදුව ඇති බව එරට සෞඛ්‍ය අංශ ප්‍රකාශ කරයි.
බෞද්ධ ස්ථූප, මුස්ලිම් පල්ලි ඇතුළු සංස්කෘතික වටිනාකමකින් යුත් ස්ථාන 3,000 කට අධික සංඛ්‍යාවක් විනාශ වී ඇත.
මියන්මාරයේ දෙවැනි විශාලතම නගරය වන, “බෞද්ධ ගෘහ නිර්මාණවලට සුවිශේෂි වූ “මැන්ඩලෙයි” මාලිගයේ කොටසක් ද කඩා වැටී තිබේ.
එම නගරයේ 403 දෙනෙකු මුදා ගෙන ඇති බව මියන්මාර ගිනි නිවන ආරක්ෂක දෙපාර්තමේන්තුව සදහන් කර ඇත.
