– රටවල් 15කට දැඩි බලපෑම්
– අප්‍රේල් 2දා අමෙරිකාවට විමුක්තිය උදාවන බවට ට්‍රම්ප්ගෙන් ප්‍රකාශයක්
– දැඩි ප්‍රතිචාර දැක්වීමට යුරෝපා සංගමය සූදානමින්
අමෙරිකාවට අපනයනය කරන සියලු රටවලට බලපෑම් එල්ලවන විශාලතම තීරුබදු ලැයිස්තුවක් ජනාධිපති ඩොනල්ඩ් ට්‍රම්ප් අද (2) නිවේදනය කිරීමට නියමිත බව විදෙස් මාධ්‍ය වාර්තා කරයි. දැනටමත් තීරුබදු වැඩි කර ඇති රටවලටත් නැවත අදාළ වන පරිදි ජනාධිපතිවරයා සැලසුම් කර ඇති නව තීරු බදු ලැයිස්තුවෙන් ගෝලීය ආර්ථිකයට දැඩි බලපෑම් එල්ල වනු ඇතැයි දැනටමත් ලෝක ආර්ථික විශේෂඥවරුන් අනාවැකි පළ කර ඇතැයි ද විදෙස් මාධ්‍ය වැඩිදුරටත් වාර්තා කරයි.
අමෙරිකාවේ භාණ්ඩාගාර ලේකම් ස්කොට් බෙසන්ට් ප්‍රකාශ කර ඇත්තේ අද නිකුත් කිරීමට නියමිත ලැයිස්තුවට අනුව අමෙරිකාවේ විශාලතම වෙළෙඳ ගනුදෙනු සිදුකරන රටවලට 15%කින් තීරුබදු අය කිරීමට ඩොනල්ඩ් ට්‍රම්ප් සැලසුම් කර ඇති බවය. ඒ අනුව දැනටමත් තීරුබදු ඉහළ නංවා ඇති රටවලට නව තීරුබදුවලින් දුෂ්කරතා රැසකට මුහුණ පෑමට සිදුවනු ඇතැයි විදෙස් මාධ්‍ය සඳහන් කරයි.
පෙරේදා වාර්තාකරුවන් අමතා ඩොනල්ඩ් ට්‍රම්ප් ප්‍රකාශ කර ඇත්තේ බදාදා (අද) නිවේදනය කරන නව තීරුබදු අමෙරිකාවේ ආර්ථිකය ඉහළ නැංවීමට ඉවහල් වනු ඇති බවය. ඔහු අද දිනය අමෙරිකාවේ විමුක්ති දිනය ලෙස හඳුන්වා ඇති අතර, මේ තීරුබදු ඉහළ නැංවීම දිගු කාලයක් පුරා අපේක්ෂා කළ දැවැන්ත මෙහෙයුමක් ලෙසත් සඳහන් කර තිබේ. අමෙරිකාවේ නිෂ්පාදන අංශය ආරක්ෂා කරගැනීමට සහ ශක්තිමත් කරගැනීමට නව තීරුබදුවලින් හැකියාව ඇතැයි ද, අමෙරිකාවට භාණ්ඩ අපනයන කරන සියලුම රටවලට තීරුබදු ඉහළ නැංවීමට පියවර ගන්නා බව ද ප්‍රකාශ කර ඇතැයි වාර්තා වේ.
ඩොනල්ඩ් ට්‍රම්ප්ගේ නව තීරුබදු සංකල්පය ලොව ප්‍රබලතම රටවල් රැසක ආර්ථිකයට බලපානු ඇති අතර, යුරෝපීය රටවලට එය දැඩිව බලපානු ඇතැයි වාර්තා වේ. ඩොනල්ඩ් ට්‍රම්ප්ගේ තීරුබදු සැලසුමට ප්‍රතිචාර දැක්වීමට තම රටවල් සූදානම් බව ඊයේ යුරෝපා සංගමයේ සභාපතිනිය උර්සුලා වැන් ඩර් ලේයන් ප්‍රකාශ කළ බවත්, පළිගැනීම සිය ප්‍රතිපත්තිය නොවූවත් අමෙරිකාවේ සැලසුමට දැඩි ප්‍රතිචාර දැක්වීමට යුරෝපා සංගමයේ සියලු රටවල් එකඟතාව පළ කළ බවත් ඇය සඳහන් කර තිබේ.
ආනයනික තීරුබදු ඉහළ නැංවීමෙන් පසු අමෙරිකාවෙන් ආනයනය කරනු ලබන භාණ්ඩ සඳහා යම්කිසි රටක් තීරුබදු ඉහළ නංවන්නේ නම් එම රටවලට නැවත තීරුබදු පැනවීමට පියවර ගන්නා බවට ද ට්‍රම්ප් අනතුරු අඟවා ඇතැයි වාර්තා වේ. අමෙරිකාවට විශාල වශයෙන් භාණ්ඩ අපනයනය කරන රටවල් ලැයිස්තුව මෙතෙක් හෙළි නොකළද, චීනය, යුරෝපා සංගමය, මෙක්සිකෝව, වියට්නාමය, අයර්ලන්තය, ජර්මනිය, තායිවානය, ජපානය, දකුණු කොරියාව, කැනඩාව, ඉන්දියාව, තායිලන්තය, ඉතාලිය, ස්විට්සර්ලන්තය, මැලේසියාව, ඉන්දුනීසියාව, ප්‍රංශය, ඔස්ට්‍රියාව සහ ස්වීඩනය එම රටවල් අතර සිටින බවද වාර්තා වේ. එම රටවලට පනවන බව කියන 15%ක අතිරේක තීරුබද්ද ගෝලීය වෙළෙඳපොළට දරුණු ලෙස බලපානු ඇතැයි ආර්ථික විශ්ලේෂකයන් ප්‍රකාශ කර තිබේ.
